රත්මලාන වෘත්තිය තාක්ෂණ විශ්වවිද්‍යාලයේ (UNIVOTEC) අධ්‍යයන පාඨමාලා නැවත සමාලෝචනය කිරිම සහ ජාතික මෙන් ම ජාත්‍යන්තර මට්ටමට ගැළපෙන ලෙස ඒවායෙහි ගුණාත්මකභාවය ඉහළ නැංවීම සඳහා අධ්‍යාපන, උසස් අධ්‍යාපන හා වෘත්තිය අධ්‍යාපන අමාත්‍යතුමිය වෙත නිර්දේශ හා යෝජනා ලබා දීමට සාමාජිකයන් හය දෙනෙකුගෙන් (6) යුත් විශේෂඥ කමිටුවක් පත් කර ඇත. ඊට අදාළ පත් කිරීම් අමාත්‍යාංශ ලේකම් නාලක කලුවැව මහතා විසින් සිදු කරනු ලැබූ අතර එම කමිටු සාමාජිකයන්ගේ නම් පහත පරිදි වේ.

• ආචාර්ය ජානක ජයලත් – සභාපති (අධ්‍යාපන, උසස් අධ්‍යාපන සහ වෘත්තිය අධ්‍යාපන අමාත්‍යාංශයේ උපදේශන මණ්ඩල සභික)
• මහාචාර්ය තුෂාර චාමින්ද – සමාජික (ඉංජිනේරු පීඨය, රුහුණ විශ්වවිද්‍යාලය)
• මහාචාර්ය ජේ.සී. එන් රාජේන්ද්‍ර – සාමාජික( වෘත්තීය තාක්ෂණික විශ්වවිද්‍යාලයේ කවුන්සිල සාමාජික)
• ආචාර්ය කේ.ඒ. ලලිතධීර – සමාජික (අධ්‍යක්ෂ ජනරාල්, තෘතීයික හා වෘත්තිය අධ්‍යාපන කොමිෂන් සභාව)
• ඉංජිනේරු එස්.බී. අනුර දේශප්‍රිය සේමසිංහ – සාමාජික (ප්‍රධාන විධායක නිලධාරි, මධ්‍යයම ඉංජිනේරු සේවා (පුද්ගලික) සමාගම, ශ්‍රී ලංකා/ අබුඩාබි
• හිමාලි ඩබ්. කේ අතාවුදගේ – කැඳවුම්කරු (අතිරේක ලේකම්, වෘත්තීය අධ්‍යාපන අංශය, අධ්‍යාපන උසස් අධ්‍යාපන හා වෘත්තීය අධ්‍යාපන අමාත්‍යාංශය)

මාධ්‍ය ඒකකය

අධ්‍යාපන අමාත්‍යාංශය යටතේ ඇති ප්‍රධාන මුද්‍රණ ආයතනයක් වන ශ්‍රී ලංකා රාජ්‍ය මුද්‍රණ නීතිගත සංස්ථාවේ (State Printing Corporation – SPC) පානළුව ප්‍රදේශයේ පිහිටි ප්‍රධාන කර්මාන්ත ශාලාවේ නිල නිරීක්ෂණ චාරිකාවකට අධ්‍යාපන හා උසස් අධ්‍යාපන නියෝජ්‍ය අමාත්‍ය, වෛද්‍ය මධුර සෙනෙවිරත්න මහතා 2025.10.15 එක්විය. මෙම සංස්ථාව, පාසල් පෙළපොත් මුද්‍රණය, අමාත්‍යාංශ සහ විශ්වවිද්‍යාල සහතික පත්‍ර මුද්‍රණය වැනි විශේෂිත මුද්‍රණ කටයුතු සඳහා ප්‍රධාන කාර්යභාරයක් ඉටු කරන ආයතනයකි.

ආයතනික ප්‍රගති සමාලෝචනය, නිෂ්පාදන ක්‍රියාවලිය පිළිබඳ අධ්‍යයනය, ලබන වසර සඳහා උපාය මාර්ගික සැලසුම්කරණය, සේවක සුබසාධනය හා සංවර්ධනය පිළිබඳ අදහස් ලබා ගැනීම මෙම නිල නිරීක්ෂණ චාරිකාවේ මූලික අරමුණු විය.

නිරීක්ෂණ චාරිකාවේදී කර්මාන්ත ශාලාවේ නිෂ්පාදන ක්‍රියාවලිය නිරීක්ෂණය කළ නියෝජ්‍ය අමාත්‍යවරයා සේවකයින් සමග සුහද සංවාදයකද නිරත විය. සේවකයින් අමතා අදහස් දක්වමින් නියෝජ්‍ය අමාත්‍යවරයා පැවසූවේ, “මීළඟ වසර වන විට සම්පත්වල උපරිම දායකත්වය අත්පත් කරගෙන සංස්ථාවක් ලෙස වපසරිය තව තවත් පුළුල් කර ගනිමින් සේවක තෘප්තියද ඉහළ නැංවීම” සිය ඒකායන බලාපොරොත්තුව බවයි.

තවදුරටත් අදහස් දැක්වූ ඒ මහතා ප්‍රකාශ කර සිටියේ “පුළුල් වපසරියක් සහිත සංස්ථාවක් බවට රාජ්‍ය මුද්‍රණ නීතිගත සංස්ථාව පත් කර රටට මෙන්ම සේවකයින්ටද ප්‍රතිලාභ ලබා දීම” සිය පරමාර්ථය බවයි.

මෙම චාරිකාවේදී නියෝජ්‍ය අමාත්‍යවරයා රාජ්‍ය මුද්‍රණ නීතිගත සංස්ථාවේ ඉහළ කළමනාකාරිත්වය හමුවී සාකච්ඡාවකද නිරත වූ අතර එහිදී දැනට පවතින ප්‍රගතිය මෙන්ම ඉදිරි වර්ෂයේ අභිමතාර්ථ ජය ගැනීම සඳහා වන නව උපාය මාර්ගික සැලසුම් පිළිබඳ අවධාරණය කළේ ය.

මෙම අවස්ථාව සඳහා රාජ්‍ය මුද්‍රණ නීතිගත සංස්ථාවේ ගරු සභාපතිතුමන්, ඉහළ කළමනාකාරිත්වය ඇතුළු සේවක මණ්ඩලයේ නිලධාරීන්ද සහභාගී වී සිටියහ.

මාධ්‍ය ඒකකය

‘සමස්ත ලංකා පාසල් ක්‍රීඩා 2025’ ‍පාසල් ක්‍රීඩා උළෙල 38 වන වරටත් පැවති අතර එහි සමාප්ති උළෙල උත්කර්ෂවත් ව දියගම මහින්ද රාජපක්ෂ ක්‍රීඩාංගණයේදී ඊයේ (14)වන දින පැවැත්වුණි.

මෙහිදී දිවයින පුරා පාසල්වල අධ්‍යාපනය ලබන දරුවන් පහළොස් දහසකට ආසන්න පිරිසක් කණ්ඩායම් තරග සඳහාද, ජවන හා පිටිය මලල ක්‍රීඩා තරගාවලිය සඳහා ක්‍රීඩක – ක්‍රීඩිකාවෝ පන්දහසකට ආසන්න පිරිසක්ද සහභාගි වූ අතර, පාසල් 1,170 ක් නියෝජනය කරන ලදි.

අඹගමුව මධ්‍ය මහා විදුහල නියෝජනය කළ කේ. එල්. අයෝමාල් අකලංක සම්මාන ලබන අතර වාරයේ දී වත්තල ලයිසියම් ජාත්‍යන්තර පාසල නියෝජනය කළ ජිත්මා විජේතුංග අති ශූරතම මලල ක්‍රීඩිකාව ලෙස තිළිණ ලැබුවාය.

අවුරුදු 20 න් පහළ මීටර් 400 කඩුළු මතින් දිවීමේ ඉසව්වේ දී ප්‍රදර්ශනය කළ තත්. 49.90 ක දක්ෂතාවය පදනම් කර ගනිමින් අයෝමාල් අකලංක ද අවුරුදු 20 න් පහළ මීටර් 400 ඉසව්වේ දී ප්‍රදර්ශනය කළ තත්. 54.09 ක තරග නිමි කාලය පදනම් කර ගනිමින් ජිත්මා විජේතුංග ද අදාළ සම්මාන දිනා ගත්හ.

මෙවර මලල ක්‍රීඩා තරගාවලියේ දක්ෂතම ජවන ක්‍රීඩකයා හෝ ක්‍රීඩිකාව වෙනුවෙන් ප්‍රදානය කෙරෙන කුසලාන දිනා ගැනීමට කඳාන ශාන්ත සෙබෙස්තියන් විදුහල නියෝජනය කළ ඔමෙල් සශින්ත (අවුරුදු 20 න් පහළ මීටර් 400 – තත්. 46.17) සමත් වූ අතර දක්ෂතම විසි කිරීමේ ක්‍රීඩකයා හෝ ක්‍රීඩිකාව වෙනුවෙන් ප්‍රදානය කෙරෙන කුසලාන දිනා ගැනීමට වෙන්නප්පුව ශාන්ත ජෝශප් වාස් විදුහල නියෝජනය කළ එච්. යූ. ජයසිංහ (අවුරුදු 20 න් පහළ යගුලිය දැමීම – මීටර්. 16.27) ට හැකියාව ලැබිණි.

මෙවර දක්ෂතම කඬුළු මතින් දිවීමේ ක්‍රීඩකයා හෝ ක්‍රීඩිකාව වෙනුවෙන් ප්‍රදානය කෙරෙන කුසලාන දිනා ගැනීමට අඹගමුව මධ්‍ය මහා විදුහල නියෝජනය කළ කේ. එල්. අයෝමාල් අකලංක (අවුරුදු 20 න් පහළ මීටර් 400 කඩුළු මතින් දිවීම – තත්.49.90) සමත් වන අතර වාරයේ දී දක්ෂතම පැනීමේ ක්‍රීඩකයා හෝ ක්‍රීඩිකාව වෙනුවෙන් පිරිනැමෙන කුසලානය දිනා ගැනීමට කොළඹ 06, ශාන්ත ලෝරන්ස් විදුහල නියෝජනය කළ ඔෂිනී කොඩිකාර (අවුරුදු 20 න් පහළ බාලිකා දුර පැනිම මීටර් 06. 03) සමත් වූවාය.

අධ්‍යාපන අමාත්‍යාංශයේ ක්‍රීඩා සහ ශාරීරික අධ්‍යාපන අංශය විසින් සංවිධානය කර තිබුණු මෙවර තරගාවලියට ද මධ්‍යම, සබරගමුව, ඌව, උතුර, දකුණ, නැගෙනහිර, උතුරුමැද, වයඹ සහ බස්නාහිර පළාත් නියෝජනය කරමින් ක්‍රීඩක ක්‍රීඩිකාවන් සහභාගී වූහ.

මෙවර මලල ක්‍රීඩා තරගාවලිය ආශ්‍රිතව සමස්ත ලංකා පාසල් තරග වාර්තා 38 කින් ස්වයංපෝෂිත වීම ඒ අතරේ කැපී පෙණුනි.

දින 05 ක් පුරා ක්‍රියාත්මක කෙරුණු මෙවර මලල ක්‍රීඩා තරගාවලියේ සමස්ත බාලක ශූරතා කුසලාන මීගමුවට රැගෙන යාමට මාරිස්ටෙලා විදුහල (ලකුණු 148) සමත් වූ අතර වාරයේ දී සමස්ත බාලිකා ශූරතා කුසලාන වත්තලට රැගෙන යාමට ලයිසියම් ජාත්‍යන්තර පාසල (ලකුණු 213) ට සමත් විය. මාරිස්ටෙලා විදුහල මෙන්ම ලයිසියම් ජාත්‍යන්තර පාසල සමස්ත ලංකා පාසල් ක්‍රීඩා උළෙලේ සමස්ත මලල ක්‍රීඩා ශූරතා කුසලාන නොකඩවා දිනා ගන්නා ලද තෙවන අවස්ථාව මෙවර සටහන් වීම ඉහළ අගයක් ගත්තේය.

එකී බාලක අනු ශූරතාව වෙන්නප්පුව ශාන්ත ජෝශප් වාස් විදුහල ( ලකුණු 99) ට හිමි වූ අතර බාලිකා ලකුණු ශූරතාව වලල ඒ. රත්නායක මධ්‍ය මහා විදුහල (ලකුණු 93 ) සතු විය. සමස්ත බාලක සහ බාලිකා තෙවන ස්ථානය පිළිවෙලින් තහවුරු කර ගැනීමට තිඹිරිගස්කටුව මාරිස්ටෙලා විදුහල (ලකුණු 77) සහ පන්නිපිටිය ධර්මපාල විදුහල (ලකුණු 61) සමත් විය.

ලකුණු 1,277 වාර්තා කර ගනිමින් අන්තර් පළාත් සටනේ ප්‍රථම ස්ථානය දිනා ගැනීමට බස්නාහිර පළාත නියෝජනය කළ ක්‍රීඩක ක්‍රීඩිකාවන් සමත් වූහ. එකී අනු ශූරතාව මධ්‍යම පළාත (ලකුණු 414) ට හිමි වූ අතර තෙවැනි ස්ථානය වයඹ පළාත (ලකුණු 315.5) සතු විය.

මෙවර ක්‍රීඩා උළෙලේ සමාප්ත උත්සවය ක්‍රීඩා හා යෞවන කටයුතු අමාත්‍ය සුනිල් කුමාර ගමගේ මහතාගේ ප්‍රධානත්වයෙන්, අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතාගේ හා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශ ලේකම් නාලක කලුවැව මහතා ඇතුලු අමාත්‍යාංශ නිලධාරීන්ගේ සහභාගීත්වයෙන් පැවැත්විණි.

අවසන් දිනය වූ ඊයේ (14) බිහි වූ නව තරග වාර්තා සංඛ්‍යාව 09 කි. මෙවර ක්‍රීඩා උළෙල වර්ණවත් කළ ගම්පොල වික්‍රමබාහු ජාතික පාසලේ තරුෂී අභිෂේකා ප්‍රේමසිරි ක්‍රීඩීකාව තමන් සහභාගී වූ ඉසව් ත්‍රිත්වය ජය ගත්තේ නව තරග වාර්තා ත්‍රිත්වයක් බිහි කරමින් වීම ඉහළ අගයක් ගත්තේය.

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ අධ්‍යාපන ගුණාත්මක සංවර්ධන අංශයට අයත් විද්‍යා ශාඛාව හා ගණිත ශාඛාව මගින් වාර්ෂිකව අන්තර්ජාතික ගණිත හා විද්‍යා ඔලිම්පියාඩ් තරගය සඳහා සිසුන් සහභාගී කරවන අතර,

2025 තරගය මැලේසියාවේ කෙදා හිදී 2025.10.05 සිට 2025.10.09 දින දක්වා පැවැත්වීනි.

පාසල් , කලාප හා පළාත් මට්ටමේ තරග පවත්වා පළාත් තරගයෙන් ජයග්‍රහණය කළ සිසුන්ට, පවත්වන ලද ජාතික තරගයේ ඉහළම ලකුණු ලබාගත් සිසුන් මේ සඳහා තෝරාගනු ලැබේ. එසේ තෝරාගත් සිසුන්ට විධිමත් පුහුණුවක් ලබාදීමෙන් පසු විද්‍යා අංශයෙන් සිසුන් 12 ක් හා ගණිත අංශයෙන් සිසුන් 12 ක් අන්තර්ජාතික තරගාවලියට සහභාගී විය. එහිදි විද්‍යා අංශය නියෝජනය කරමින් සහභාගී වූ සිසුන් දොළොස් දෙනාගෙන්,

හිමෙත් කෙම්සර අබේසිංහ කොළඹ රාජකීය විද්‍යාලය, ඩී.එම්.එම්.කවිත්ම කොළඹ ආනන්ද විද්‍යාලය, ආර්. අක්ෂත් හින්දු විද්‍යාලය, යාපනය , එන්.බී.තෙනුක් වින්සිත බදුල්ල මධ්‍ය විද්‍යාලය යන සිසුන් විසින් රිදී පදක්කම් 04 ක් හිමිකරගත් අතර, සහභාගී වූ අනෙක් සිසුන් 8 දෙනාම ලෝකඩ පදක්කම් හිමිකරගෙන ඇත.

ගණිත අංශය නියෝජනය කරමින් සහභාගී වූ සිසුන් දොළොස් දෙනාගෙන් සිසුන් හත් දෙනෙකු ලෝකඩ පදක්කම් හිමිකරගෙන ඇත.

එමෙන්ම මෙම තරගාවලියේ පැවති STEM කණ්ඩායම් තරගයෙන් සහභාගී වූ සියළුම රටවල් අතරින් හතරවන ස්ථානය දිනා ගැනීමට ශ්‍රී ලංකාව නියෝජනය කළ කණ්ඩායමට හැකිවිය.

අන්තර්ජාතික තරගයකින් මෙලෙස පදක්කම් රැසක් දිනාගැනීමට හැකිවීම ශ්‍රී ලංකාව ලබාගත් සුවිශාල ජයග්‍රහණයකි.

මාධ්‍ය ඒකකය.

නිදහස් අධ්‍යාපනයේ පියා යන විරුදාවලිය ලත් ආචාර්ය සී. ඩබ්. ඩබ්. කන්නන්ගර ශ්‍රීමතාණන්ගේ 141 වන ජන්ම දින සැමරුම් උළෙල 2025 ඔක්තෝබර් 13 දින අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතාගේ ප්‍රධානත්වයෙන් මතුගම ශ්‍රවණාගාරයේදී පැවැත්විණි.

නිදහස් අධ්‍යාපන ක්‍රමය රටට දායාද කිරීම වෙනුවෙන් කන්නන්ගර මහතා කළ මෙහෙය අගය කිරීම සහ එම ප්‍රතිපත්තිය තවදුරටත් ඉදිරියට ගෙන යාමේ වැදගත්කම සිහිපත් කිරීම මෙම සැමරුම සංවිධානය කිරීමේ ප්‍රධාන අරමුණ විය.

මෙම අවස්ථාවට සහභාගී වෙමින් අදහස් දැක්වූ නියෝජ්‍ය අමාත්‍ය වෛද්‍ය මධුර සෙනෙවිරත්න මහතා ප්‍රකාශ කළේ, සී. ඩබ්. ඩබ්. කන්නන්ගර මැතිතුමාගේ මඟ ඔස්සේ යමින් නූතන ලෝකයට ගැලපෙන අධ්‍යාපන ප්‍රතිසංස්කරණ ක්‍රියාවට නැංවීම සිය ඒකායන වෑයම බවයි.

ප්‍රායෝගිකත්වයට නැඹුරු වූ විෂය මාලාවක් හඳුන්වා දීම,තාක්ෂණය හා නවෝත්පාදනය අධ්‍යාපනයට මුසු කිරීම, ගෝලීය අවශ්‍යතාවන්ට ගැළපෙන පරපුරක් බිහි කිරීම,ගුරු පුහුණුවෙහි ගුණාත්මකභාවය ඉහළ නැංවීම සහ සෑම දරුවෙකුටම සමාන අවස්ථා උදාකරමින් සමාන පහසුකම් ඇති පාසල් ගොඩ නැඟීම පිළිබඳ ව ඒ මහතා මෙහිදී අවධාරණය කළේ ය.

කන්නන්ගර මහතා දැකීමට උත්සාහ කළ සමානාත්මතාව හා ගුණාත්මක අධ්‍යාපනය 21 වන සියවසේ දැනුම හා කුසලතාවලින් සන්නද්ධ කරමින් ඉදිරියට ගෙන යා යුතු බවත්, මෙය හුදෙක් පුද්ගල සැමරුමක් ලෙස නොගෙන සමස්ත නිදහස් අධ්‍යාපනය හා බැඳුණු ප්‍රතිපත්ති මාලාවක් ලෙස වටහා ගත යුතු බවත් ඒ මහතා වැඩි දුරටත් අවධාරණය කළේය.

මෙහිදී කන්නන්ගර ගුණානුස්මරණ පදනම දීපව්‍යාප්තව පැවැත්වූ කන්නංගර අනුස්මරණ නිර්මාණ තරගාවලියෙන් ජයග්‍රහණය ලැබූ සිසු සිසුවියන්ට ත්‍යාග බෙදාදීම ද සිදුකරන ලදි.

මෙම අවස්ථාව සඳහා පාර්ලිමේන්තු මන්ත්‍රී සංජීව රණසිංහ මහතා, අග්‍රාමාත්‍ය ලේකම් ප්‍රදීප් සපුතන්ත්‍රි මහතා ඇතුළු මැති ඇමතිවරුන් සහ කන්නන්ගර පවුලේ ඥාතීහු ද සහභාගී වී සිටියහ.

මාධ්‍ය ඒකකය.

— වැඩබලන අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය සහ වෘත්තීය අධ්‍යාපන නියෝජ්‍ය අමාත්‍ය නලින් හේවගේ

එක්තරා යුගයක එක් පැලැන්තියකට පමණක් සීමා වී තිබූ අධ්‍යාපනයේ දොර කවුළු පියන් හැර දමා අධ්‍යාපනය සඳහා සම බිමක් නිර්මාණය කරමින් අධ්‍යාපනය ලැබීමේ අයිතිය, ගම් දනව් කරා පතුරුවා හැරීමේ මං පෙත් විවර කළේ සී. ඩබ්ලිව්. ඩබ්ලිව්. කන්නංගර විද්වතාණන් බව වැඩබලන අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය මෙන් ම වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතා පැවසී ය.

අමාත්‍යවරයා මේ බව ප්‍රකාශ කළේ, අද දිනට (2025.10.13) යෙදෙන කන්නන්ගර මැතිතුමන්ගේ 141 වැනි ජන්ම දින සැමරුම නිමිත්තෙන් ‘ඉසුරුපාය’ අධ්‍යාපන අමාත්‍යාංශ පරිශ්‍රය ඉදිරිපිට ඇති කන්නංගර පිළිරුවට පුෂ්පෝපහාර දක්වමිනි.

මෙහි දී වැඩිදුරටත් අදහස් දක්වමින් හෙවගේ මහතා ප්‍රකාශ කළේ, නිදහස් අධ්‍යාපන ප්‍රතිපත්තිය ඉදිරිපත් කරමින් අධ්‍යාපන ක්ෂේත්‍රයේ දැවැන්ත පෙරළියක් සිදු කළ කන්නංගර විද්වතාණන් ලාංකික ජන හදවත් තුළ අමරණීය මතක සටහන් එක් කළ සීමිත පිරිස අතර ඉහළින් ම සිටින චරිතයක් ලෙස අවිවාදයෙන් ම හැඳින්විය හැකි බවයි.

විශේෂයෙන් ම 50-60 දශකයේ දී බොහෝ ග්‍රාමීය දරු දැරියන් පිරිසකට මෙම නිදහස් අධ්‍යාපනය යටතේ සරසවි වරම් විවර වූ අතර අධ්‍යාපනයේ සම අවස්ථා රටේ සැමට හිමි කර දීමට ක්‍රියා කළ ශ්‍රේෂ්ඨ පුද්ගලයකු වශයෙන් ඒ මහතා අද වන තෙක් මෙරට ජනතාවගේ ගෞරවාදරයට ලක් වන බවයි.

අද දින දිවයින පුර කන්නංගර ගුණානුස්මරණ වැඩසටහන් මගින් එතුමාගේ ගුණ සැමරෙන බවත් අමාත්‍යවරයා මෙහි දී වැඩිදුරටත් පැවසී ය.

මේ අවස්ථාවට අධ්‍යාපන අමාත්‍යාංශ නිලධාරීහු ද එක් ව සිටියහ.

මාධ්‍ය ඒකකය.

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය මඟින් පාසල් සිසුන් වෙනුවෙන් ලබා දෙන සුරක්ෂා සිසු රක්ෂණාවරණ වැඩසටහන යටතේ, ‘ශ්‍රී ලංකා ඉන්ෂුවරන්ස් කෝප‍රේෂන් ජෙනරල් ලිමිටඩ්’ ආයතනය සමග 2024.07.01 දින අත්සන් කරන ලද ගිවිසුම සංශෝධන සහිතව යාවත්කාලීන කර එහි නව ගිවිසුම සඳහා අත්සන් තැබීම අධ්‍යාපන අමාත්‍යාංශ ලේකම් නාලක කලුවැව මහතාගේ ප්‍රධානත්වයෙන් අමාත්‍යාංශ පරිශ්‍රයේ දී ඊයේ (09) දින සිදු විය.

ඒ අනුව යාවත්කාලීන කළ නව ගිවිසුම හරහා පාසල් සිසුන් වෙත ලබා දෙන ප්‍රතිලාභවල වැඩිවීමක් සිදු කර ඇති අතර එම නව සංශෝධිත ප්‍රතිලාභ මෙසේ ය.

සෞඛ්‍ය රක්ෂණාවරණ

• නේවාසික ප්‍රතිකාර ප්‍රතිලාභ – රු. 300,000 /- (රජයේ / පෞද්ගලික රෝහල්)
• බාහිර ප්‍රතිකාර ප්‍රතිලාභ – රු. 20,000/-
• අසාධ්‍ය රෝග ප්‍රතිලාභ – රු. 1,500,000/- සිට

අනතුරු රක්ෂණාවරණ

• පූර්ණ සදාකාලික අකර්මණ්‍යතා සඳහා – රු. 200,000/-
• සදාකාලික අර්ධ අකර්‌මණ්‍යතා සඳහා – රු. 150,000/-
• තාවකාලික අකර්මණ්‍යතා සඳහා – රු.25,000 /- සිට රු.100,000/- දක්වා

ජීවිත රක්ෂණාවරණය

වාර්ෂික ආදායම රු. 180,000/- කට වඩා අඩු ආදායම්ලාභී පවුල්වල සිසුන්ට අමතරව ”අස්වැසුම” වැඩසටහනට අයත් පවුල්වල සිසුන්ගේ මාපිය/නීත්‍යනුකූල භාරකරු වියෝවක දී සිසු දරුවකු සඳහා රු. 75,000/- බැගින් හිමි වේ. එක් මරණයක් වෙනුවෙන් වෙන් කරනු ලබන උපරිම මුදල රු. 225,000/- වන අතර පවුලේ සියලු ම සිසුන් අතර එම මුදල සමානව වෙන් කෙරේ. මාපියන් දෙදෙනාගේ ම හෝ නීත්‍යනුකූල භාරකරුගේ මරණ සඳහා වෙන් වෙන් වශයෙන් මෙම රක්ෂණාවරණය හිමි වේ.

මෙම වැඩසටහන 2025/2026 වර්ෂයේ දී ක්‍රියාත්මක වීමේ දී පෙර පැවති ප්‍රතිලාභවලට අමතරව නව සංශෝධන ඇතුළත් කරමින් 2025.10.09 දින ගිවිසුම සංශෝධනය කිරීමේ හේතුවෙන් නව ප්‍රතිලාභ ලබා ගැනීමට හැකියාව පවතින්නේ 2025.09.01 දින හෝ ඊට පසු සිදුවන සිදුවීම් සඳහා පමණි.

සිදු වූ එම සංශෝධන පහත පරිදි ය.

I. 2024/2025 වර්ෂයේ දී දෙමාපිය මරණයක දී හිමි වන ප්‍රතිලාභය ලබා දීම සඳහා සලකා බලනු ලැබූ වාර්ෂික ආදායම රු.180,000/- ක් වේ. එසේ වුව ද, 2025.09.01 දිනෙන් පසු එම ප්‍රතිලාභය ලබා දීමට සලකා බලනු ලබන වාර්ෂික ආදායම රු.240,000/- කට වඩා අඩු ආදායමක් ලෙස සංශෝධනය වේ.

II. මෙම වැඩසටහන යටතේ විවිධ වූ රෝග සඳහා දීර්ඝකාලීනව ඖෂධ ලබා ගන්නා සිසුන් මින්පෙර ආවරණය නොවුණි. එබැවින් 2025.09.01 දිනෙන් පසු අසාධ්‍ය රෝග කාණ්ඩයට අයත් රෝග සහ පහත සඳහන් රෝග සඳහා දීර්ඝකාලීනව ඖෂධ ලබා ගන්නා සිසුන්හට බාහිර ප්‍රතිලාභ ලෙස රු 20,000/- යටතේ ප්‍රතිලාභ ලබා ගැනීමට අවස්ථාව සලසා දී ඇත.

• Epilepsy
• Nephrotic syndrome
• Rheumatoid arthritis
• Systemic lupus erythematosus
• Ulcerative colitis
• Crohn’s disease
• Rheumatic valvular heart disease

III. කොඳු ඇට පෙළ විකෘති වීම නිවැරදි කිරීම සඳහා පළඳින උපාංගය (Scoliosis Brace) සඳහා රු.75,000.00 දක්වා ප්‍රතිලාභ ලබා ගැනීමට අවස්ථාව සැලසීම.

IV. කර්ණ ශංඛ උපකරණ සඳහා වන වියදම (උගුර, කන, නාසය පිළිබඳ ශල්‍ය වෛද්‍යවරයකු විසින් නිර්දේශිත) සඳහා රු.75,000.00 දක්වා ප්‍රතිලාභ ලබා ගැනීමට අවස්ථාව සැලසීම.

V. හදිසි අනතුරක දී පමණක් ලබා දුන් ‘Lumber Guards and cervical collars’ උපාංග සඳහා හදිසි අනතුරක් නොවන අසනීප අවස්ථාවක දී ද ප්‍රතිලාභ ලබා ගැනීමට අවස්ථාව සැලසීම (විශේෂඥ වෛද්‍යවරයකු විසින් නිර්දේශිත).

ප්‍රතිලාභ ලබා ගැනීමේ දී හිමිකම් පත්‍රය ඇතුළු අදාළ අනෙකුත් සියලු ම ලිපි ලේඛන පාසලේ විදුහල්පති විසින් සහතික කර ‘ශ්‍රී ලංකා ඉන්ෂුවරන්ස් කෝපරේෂන් ජෙනරල් ලිමිටඩ්’ ආයතනයේ ප්‍රාදේශීය ශාඛාවක් වෙත භාර දිය යුතු වේ.

මාධ්‍ය ඒකකය.

සමස්ත ලංකා පාසල් මලල ක්‍රීඩා තරගාවලියේ සමාරම්භක උත්සවය අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතාගේ ප්‍රධානත්වයෙන් 2025.10.10 ^වන දින දියගම දී ආරම්භ විය. දිවයිනේ පාසල් 1,170ක් නියෝජනය කරමින්, තරග අංශ 525කින් සමන්විත මෙම මලල ක්‍රීඩා තරගාවලිය මෙරට පාසල් ක්‍රීඩා ක්ෂේත්‍රයේ ප්‍රමුඛතම ක්‍රීඩා තරගාවලියයි.

ක්‍රීඩා උළෙල නිල වශයෙන් විවෘත කරමින් සමාරම්භක ප්‍රකාශය සිදු කළ නියෝජ්‍ය අමාත්‍ය වෛද්‍ය මධුර සෙනෙවිරත්න මහතා පවසා සිටියේ ක්‍රීඩාව පමණක් නොව දරුවෙකුගේ පෞරුෂය, තීරණ ගැනීමේ හැකියාව, සහ කණ්ඩායම් හැඟීම වර්ධනය සඳහා පාසල තුළ සිදු කරන ක්‍රීඩා ඉවහල් වන බවයි.

තවදුරටත් අදහස් දැක්වූ නියෝජ්‍ය අමාත්‍යවරයා සඳහන් කළේ, ක්‍රීඩාවේ වැදගත්කම දන්නා රජයක් ලෙස, ක්‍රීඩකයෙකුගේ අංකුර අවස්ථාවේ සිට ජාතික මට්ටම දක්වා ක්‍රීඩකයින් ප්‍රවර්ධනය කිරීමේ සැලසුම් මේ වන විට සකස් කරමින් පවතින බවයි. ඊට අමතරව, විශේෂ අවශ්‍යතා ඇති දරුවන්ට ද ක්‍රීඩාවේ සංවේදනය ලබා දිය හැකි වැඩපිළිවෙළක් සකස් කිරීම රජයේ ප්‍රධාන ඉලක්කයක් වී ඇති බව ද එතුමා වැඩිදුරටත් අවධාරණය කළේය.

මෙම අවස්ථාවට අධ්‍යාපන අමාත්‍යාංශයේ අතිරේක ලේකම් උදාරා දික්කුඹුර මහත්මිය, අධ්‍යාපන අමාත්‍යාංශයේ ක්‍රීඩා අධ්‍යක්ෂ ජී. ජී. අනුර අබේවික්‍රම මහතා ඇතුළු කලාප අධ්‍යක්ෂවරුන්, ශාරීරික අධ්‍යාපනය හා ක්‍රීඩා විෂය භාර කලාප අධ්‍යක්ෂවරුන්, පුහුණුකරුවන් සහ විදුහල්පතිවරුන් ඇතුළු සම්භාවනීය අමුත්තන් රැසක් සහභාගී වූහ.

අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය.

කුඩා කාලයේ දී දරුවන්ගේ මනසට වැටෙන වචන, සිතුවිලි සහ කතා ඔවුන්ගේ අනාගතය තීරණය කිරීමට බලපාන ප්‍රබල සාධකයක් බව අධ්‍යාපන, උසස් අධ්‍යාපන සහ වෘත්තීය අධ්‍යාපනය අග්‍රාමාත්‍ය ආචාර්ය හරිනි අමරසූරිය මහත්මිය පැවසුවා ය.

අමාත්‍යවරිය මේ අදහස් පළ කළේ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ මූලිකත්වයෙන් පිහිටුවා ගත් ළමා පොත් පිළිබඳ ජාතික සමුළුව මඟින් ඉංග්‍රීසි බසින් සම්පාදනය කළ ළමා පොත් පිළිබඳ ව උපදෙස් සංග්‍රහය වන “Fiction Wonderland : A Comprehensive Guide to Creating Children’s Fiction Books” යන කෘතිය අමාත්‍යතුමිය වෙත පිළිගැන්වීමේ වැඩසටහනට එක් වෙමිනි.

එහි දී වැඩිදුරටත් අදහස් දක්වමින් අමාත්‍යවරිය මෙසේ පැවසී ය:

“දරුවන්ගේ චින්තන රටාව හැඩගස්වන අතිශය බලවත් මාධ්‍යයක් ලෙස ළමා සාහිත්‍ය හඳුන්වන්න පුළුවන්. අපේ අරමුණ වන්නේ දරුවන්ට කියවීමේ රසයත් සමග නිරෝගී, සංවේදී මනසක් ගොඩනගා දීමයි. එබැවින් ළමා සාහිත්‍ය නිර්මාණය කළ යුත්තේ සරල වචන වලින් පමණක් නොව, දරුවාගේ මනස බබළවන විචාර සහ වටිනාකම් අන්තර්ගත කරමිනුයි.”

මෙවැනි ඉතා කාලෝචිත කෘතින් නිර්මාණය කිරීම හා එම පොත් පරිශීලනය කිරීමෙන් ඉදිරියේදී ළමා සාහිත්‍ය කෘති රචනා කරන ලේඛකයන්ට ඉතා උසස් නිර්මාණ බිහි කිරීමට මනා පිටිවහලක් ලැබෙන බවත් දරුවන් කුඩා කාලයේ සිට ම කියවීමට යොමු කරවීම හා උසස් රසවින්දනයක් ලබා දීම යුගයේ අවශ්‍යතාවක් බවට පත්ව ඇති බවත් අමාත්‍යවරිය මෙහි දී වැඩිදුරටත් ප්‍රකාශ කළා ය.

ඉංග්‍රීසි භාෂාවෙන් මේ වන විට ප්‍රකාශයට පත් කර ඇති මෙම කෘතිය සිංහල හා දමිළ භාෂාවන්ගෙන් ඉදිරියේ දී එළිදැක්වීමට නියමිත අතර ඒ සඳහා අධ්‍යාපන, උසස් අධ්‍යාපන සහ වෘත්තිය අධ්‍යාපන අමාත්‍යාංශය, “Room to Read” ආයතනය, මොරටුව විශ්වවිද්‍යාලය හා ශ්‍රී ලංකා පොත් ප්‍රකාශකයින්ගේ සංගමය විසින් ඒකාබද්ධව දියත් කරන මෙම වැඩසටහනට විශ්වවිද්‍යාල ආචාර්ය මහාචාර්යවරුන් ඇතුළු අමාත්‍යංශ නිලධාරිහූ එක් වූහ.

ඔක්තෝබර් 05 ලෝක ගුරු දිනයට සමගාමී ව අපේ රටේ ඔක්තෝබර් මස 06 වෙනිදාට යෙදී ඇති ජාතික ගුරු දිනය සමරමින් මෙවරත් දීපව්‍යාප්ත ව පවත්වනු ලබන විවිධ ගුරු ගුණ සැමරුම් උපහාරයන්ගෙන් පිදුම් ලබන සියලු ගුරු භවතුන්ට හෘදයාංගම ව සුබ පතමි.

මෙවර ජාතික ගුරු දින තේමා පාඨය වී ඇත්තේ, “ඉගැන්වීම, සාමුහික වෘත්තියක් ලෙසින් නව අරුතකින් හඳුනාගැනීම”, යන්නයි.

ඒ අනුව ගුරුවරුන්ගේ හඬට සවන් දී ගුරුවරුන් අගයන අතර ම අධ්‍යාපනය සඳහා වූ නව සමාජ කතිකාවතක ඉදිරියට ම යෑමට අප පියවර ඔසවා ඇත්තෙමු.

ජාතික ගුරු දිනයේ දී අපේ රටේ සමස්ත ගුරු භවතුන්ගෙන් ම මා ඉල්ලා සිටින්නේ, ඒ ගමන තුළ අධ්‍යාපන ඉතිහාසයේ නව පිටුවක් ලිවීමට අප හා එක් ව අත්වැල් බැඳ ගන්නා ලෙසයි.

අනාගත ලෝකයේ ඉදිරි දශකයක දුරට අවධානය යොමු කළත් අප සිසු පරපුර රැගෙන යා යුතු වෘත්තීයාභිමුඛ, තාක්ෂණික ඩිජිටල් අධ්‍යාපන රටාව පිළිබඳ පෙරදැක්මක්, දැයේ මාර්ගෝපදේශක ගුරු පරපුරට පවතිනු ඇතැයි යන්න මගේ විශ්වාසයයි.

එම අනාගතය දිනාගැනීම සඳහා දරුවන් ජානගත ව දක්ෂයන්, සුදුස්සන් බවට පත් කිරීමේ වගකීමෙහි වැඩි බරක් ගුරු පරපුරේ දෑත මතට පැවරී තිබෙන බව නොරහසක්.

ඉදිරියේ දී වෘත්තීය අධ්‍යාපනය, පාසල් විෂය නිර්දේශයේ උසස් පෙළ විෂය ධාරාවේ අනිවාර්ය විෂයක් වන අතර ඊට අවශ්‍ය ද්විතීයක පාසල් හා පුහුණු ගුරු භවතුන් ඇතුළු පහසුකම් හා මානව සම්පත් කඩිනමින් අප තෝරාබේරාගත යුතු ව ඇත.

අවම පහසුකම් මත ඉතා දුෂ්කර ප්‍රදේශවල පවා දරුවන්ට සිප් සත බෙදන ගුරු දෙමාපියවරුන් මේ අවස්ථාවේ දී ඉතා ගෞරවයෙන් සිහිපත් කරමි.

අද දින ඇගයෙන ගුරු ගුණ අතර ප්‍රසිද්ධියේ ඉස්මතු නොවන තම හෘද සාක්ෂ්‍යයට එකඟ ව අසීමිත කැපවීම් නිහඬ ව සිදු කළ ගුරුභවතුන් ද මේ මොහොතේ මම ඉතා ගෞරවාදරයෙන් සිහිපත් කරමි.

නව පරිවර්තනීය අධ්‍යාපන ක්‍රියාවලියට අනුගත ව ගුරු භවතුන්ගේ අසීමිත සේවය සිසු හදවත්වල සදා නොමැකෙන සේ සනිටුහන් කරවීමට සමත් සේවයක් ඉටු කිරීමට, අධ්‍යාපන පද්ධතිය තුළ වර්තමානයේ සේවයේ නියුතු විදුහල්පතිවරුන්ට හා ගුරු භවතුන්ට හැකි වේවායි, 2025 වසරේ ජාතික ගුරු දිනයේ දී මම ඉතසිතින් ම ශුභ ප්‍රාර්ථනා කරමි.

ආචාර්ය හරිනි අමරසූරිය
ශ්‍රී ලංකා ප්‍රජාතාන්ත්‍රික සමාජවාදී ජනරජයේ අග්‍රාමාත්‍ය
අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය

සමස්ත ලංකා පාසල් ක්‍රීඩා – 2025 නමින් මෙවර පාසල් ක්‍රීඩා උළෙල, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මියගේ ප්‍රධානත්වයෙන් 2025 ඔක්තෝම්බර් මස 10 සිට 14 දක්වා වූ දින පහක් පුරා දියගම මහින්ද රාජපක්ෂ ක්‍රීඩාංගණයේ දී උත්කර්ෂවත් අන්දමින් පැවැත්වීමට කටයුතු සංවිධානය කර ඇති බව අධ්‍යාපන ලේකම් නාලක කලුවැව මහතා අද දින මාධ්‍ය හමුවක් පවත්වමින් ප්‍රකාශ කළේ ය.

38 වන වරටත් පවත්වනු ලබන මෙම තරගාවාලියේ දී කණ්ඩායම් තරග 31ක් මෙන් ම ජවන හා පිටිය මලල ක්‍රීඩා තරගාවලියක් ද පැවැත්වීමට කටයුතු සංවිධානය කර ඇත. නිවාසාන්තර ක්‍රීඩා උළෙල පැවැත්වීමෙන් අනතුරුව පිළිවෙළින් කොට්ඨාස, කලාප හා පළාත් තරගවලට සහභාගී වී එහි දක්ෂතා පෙන්වන දූ දරුවන්ට සමස්ත ලංකා තරගාවලියට සහභාගී වීමේ සුදුසුකම් හිමි වනු ඇත.

දිවයින පුරා පාසල්වල අධ්‍යාපනය ලබන පහළොස් දහසකට ආසන්න දරු දැරියන් සංඛ්‍යාවක් මෙවර කණ්ඩායම් තරග සඳහා සහභාගී වන අතර, ජවන හා පිටිය මලල ක්‍රීඩා තරගාවලිය සඳහා ක්‍රීඩක-ක්‍රීඩිකාවන් පන්දහසකගේ සහභාගීත්වයක් අපේක්ෂා කරයි. පාසල් 1170ක් නියෝජනය වන මෙම උත්සවයේ දී ජයග්‍රාහක ක්‍රීඩක ක්‍රීඩිකාවන්ට ජය සංකේත, පදක්කම් සහ සහතික ප්‍රදානය කෙරෙනු ඇත.

මෙම මාධ්‍ය සාකච්ඡාව සඳහා අමාත්‍යාංශයේ අතිරේක ලේකම් උදාරා ටී. දික්කුඹුර මහත්මිය, අධ්‍යක්ෂ ජී. ජී. අනුර අබේවික්‍රම මහතා ඇතුළු නිලධාරීහු සහභාගී වූහ.

මාධ්‍ය ඒකකය

“අවුරුදු දහයකින් පහළොවකින් මේ රට කොහොමද තියෙන්න ඕන, අන්න ඒ සඳහා අවශ්‍ය DNA එක හදන එකයි, අධ්‍යාපනයෙන් අපි මේ කරන්නේ”

– අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය, ආචාර්ය හරිනි අමරසූරිය

නව අධ්‍යාපන ප්‍රතිසංස්කරණවලට සමගාමීව ජාතික අධ්‍යාපන ආයතනය මගින් සංවිධානය කරනු ලබන දිවයිනේ සියලු පළාත් ආවරණය වන පරිදි දිස්ත්‍රික් මට්ටමින් ජාතික හා පළාත් පාසල්වල විදුහල්පතිවරුන් දැනුම්වත් කිරීමේ වැඩසටහන මේ වනවිට ක්‍රියාත්මක වෙමින් පවතී.

මෙම වැඩසටහන යටතේ මේ දක්වා දිවයිනේ බොහෝ දිස්ත්‍රික්ක ආවරණය කර ඇති අතර, එහි අඛණ්ඩ පියවරක් ලෙස මාතලේ දිස්ත්‍රික්කයේ විදුහල්පතිවරුන් දැනුම්වත් කිරීමේ වැඩසටහන අද (2025.10.04) අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසුරිය මහත්මියගේ ප්‍රධානත්වයෙන් සහ බුද්ධ ශාසන හා සංස්කෘතික නියෝජ්‍ය අමාත්‍ය ගමගෙදර දිසානායක මහතාගේ සහභාගිත්වයෙන් මාතලේ දිස්ත්‍රික් ලේකම් කාර්යාල ශ්‍රවණාගාරයේදී පැවැත්විණි.

මෙම අවස්ථාවට මාතලේ දිස්ත්‍රික් ලේකම්, ජාතික අධ්‍යාපන ආයතනයේ අධ්‍යක්ෂ ජනරාල්, පළාත් අධ්‍යාපන අධ්‍යක්ෂවරුන්, හා විවිධ අධ්‍යාපන බලධාරීන් සහ මාතලේ දිස්ත්‍රික්කයේ තුන්සිය පනහකට ආසන්න විදුහල්පතිවරු පිරිසක් සහභාගි විය.

ජාතික අධ්‍යාපන ආයතනයේ මඟපෙන්වීම යටතේ සිදුකරනු ලබන මෙම වැඩසටහනේ අරමුණ වන්නේ අධ්‍යාපන ප්‍රතිසංස්කරණවල අරමුණු හා ක්‍රියාමාර්ග පිළිබඳ විදුහල්පතිවරුන් අතර සවිස්තර අවබෝධයක් ඇති කිරීමයි.

ඒ අනුව, අනාගතයේ දී දිවයිනේ අනෙකුත් දිස්ත්‍රික්කවලද මෙම වැඩසටහන ක්‍රියාත්මක කිරීමට නියමිතයි.

මාධ්‍ය ඒකකය

ඔක්තෝබර් 05 දින යෙදෙන ලෝක ගුරු දිනයට සමගාමී ව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය මගින්, සංවිධානය කරනු ලබන “ගුරු ප්‍රතිභා ප්‍රභා – 2025” ඇගයීම් උළෙල 2025.10.03 දින ශ්‍රී ලංකා ප්‍රජාතාන්ත්‍රික සමාජවාදී ජනරජයේ ගරු අග්‍රාමාත්‍ය, අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ අමාත්‍ය හරිනි අමරසූරිය මැතිණියගේ ප්‍රධානත්වයෙන් අමාත්‍යාංශ හත්වන මහල ශ්‍රවණාගාරයේ  දී පැවැත්වේ.

– අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය ආචාර්ය හරිනි අමරසූරිය

සියලු ආගම්වලට මෙන් ම සියලු සංස්කෘතීන්වලට ගෞරව දැක්වීම හා නිසි තැන ලබා දීම, අධ්‍යාපන ක්‍රමය තුළින් ම ප්‍රචලිත කර සමාජගත කළ යුතු බව අග්‍රාමාත්‍ය, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය ආචාර්ය හරිනි අමරසූරිය මහත්මිය අධ්‍යාපන අමාත්‍යාංශයේ පැවති නවරාත්‍රී උත්සව සැමරුමට සහභාගි වෙමින් ප්‍රකාශ කළා ය.

මෙහි දී වැඩිදුරටත් අදහස් දැක්වූ අමාත්‍යවරිය කියා සිටියේ, ‘ලස්සන අගය කරන, ගීතිකා පූජා පවත්වා ආදරය සතුට පතුරවන අද වැනි දවසක බෙදාහදාගැනීම, එකමුතුකම වැනි යහ ආකල්ප කෙරෙහි වැඩි අවධානයක්’ යොමු කළ යුතු බවයි.

අමාත්‍යාංශයේ දමිළ පාසල් කටයුතු අංශය මගින් සංවිධානය කර තිබූ මෙම උත්සව අවස්ථාවට අධ්‍යාපන, උසස් අධ්‍යාපන සහ වෘත්තීය අධ්‍යාපන ලේකම් නාලක කලුවැව මහතා, අමාත්‍යාංශ අතිරේක ලේකම්වරුන් ඇතුළු නිලධාරීන් මෙන් ම කාර්ය මණ්ඩලය ද එක් ව සිටියහ.

මාධ්‍ය ඒකකය

2023 මාර්තු මස 25 වන දින පාසල්වල සේවය කරන සංවර්ධන නිලධාරීන් ඇතුළුව රජයේ සේවයේ නියුතු උපාධිධාරී නිලධාරීන් ගුරු සේවයට ඇතුළත් කිරීම සම්බන්ධයෙන් පැවැත්වීමට නියමිත ව තිබු තරග විභාගයට අදාළව ශ්‍රේෂ්ඨාධිකරණයේ විභාග වූ නඩු කටයුතු කිහිපයක් මේ වන විට අවසන්ව ඇත. එහෙත් අභියාචනාධිකරණයේ විභාග වන නඩු කටයුත්ත මේ වන විටත් අවසන් ව නොමැති හෙයින් එම නඩුවේ ද තීන්දුව ලබා දීමෙන් පසුව ඉහත විභාගය සම්බන්ධයෙන් ඉදිරි කටයුතු සිදු කෙරෙනු ඇත.

නාලක කළුවැව

ලේකම්

මෙම යෝජිත සංශෝධනයට අදාළ පාර්ලිමේන්තුවේ කටයුතු අවසන් වීමෙන් පසුව එයට අදාළව ලබා දිය යුතු උපදෙස්/මාර්ගෝපදේශ වන්නේ නම් ඒවා පාසල් වෙත නිකුත් කිරීමට මෙම අමාත්‍යාංශය කටයුතු කරනු ඇත.

නාලක කළුවැව

ලේකම්

දඬුවම් දීම පිළිබඳ පනත පාසල් හෝ ගුරුවරුන් ඉලක්ක කරගෙන සංශෝධනය වූ නීතියක් නොවන බවත් සමස්ත සමාජයේ ම දරුවන්ගේ ආරක්ෂාව වෙනුවෙන් සිදු කළ සංශෝධනයක් බවත් අධ්‍යාපන උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය මහත්මිය පැවසුවා ය.

ජාතික පාසල් විදුහල්පතිවරුන් දැනුම්වත් කිරීම වෙනුවෙන් ඊයේ (27) අධ්‍යාපන අමාත්‍යාංශයේ පැවති වැඩසටහනක දී අග්‍රාමාත්‍යවරිය මේ බව සඳහන් කළා ය.

මෙහි දී වැඩිදුරටත් අදහස් දැක්වූ අග්‍රාමාත්‍යවරිය මෙසේ පැවසී ය:

“මේක පාසල් පිළිබඳ ප්‍රශ්නයක් පමණක් නොවෙයි. මේක දරුවන්ට දෙන ශාරීරික සහ මානසික දඬුවම් පිළිබඳ ප්‍රශ්නයක්. පාසලේ විතරක් නෙවෙයි, ඔබ දන්නවා පොලිසිය විසින් පරිවාසය භාරයට ගත්ත දරුවන්ට, ආයතනගත දරුවන්ට, අතරමං වෙච්ච දරුවන්ට වගේ ම සමාජයේ ඉන්න සියලු ම දරුවන්ට එල්ල වෙලා තියෙන ප්‍රශ්නයක්. ඒක ශාරීරික වත්, මානසික වත් සිදු වෙනවා. සමාජයේ වැඩිහිටියන්ගෙන් නැත්නම් වගකිව යුතු අයගෙන් ඒ දරුවන්ට සිද්ධ වෙලා තියෙන හිංසනය පිළිබඳ බරපතළ ප්‍රශ්න ගණනාවක් මතු වෙලා තියෙනවා. මේක පාසල් ඉලක්ක කරගෙන නැත්නම් ගුරුවරුන් ඉලක්ක කරගෙන සංශෝධනය වෙච්ච නීතියක් නෙවෙයි. මේක සමස්තයක් හැටියට දරුවන්ට දඬුවම් දීම පිළිබඳ සංශෝධනයක්. ශාරීරික දඬුවම් පිළිබඳ වත් මානසික හිංසනය පිළිබඳ වත් විශේෂයෙන් ම ආයතනගත වෙච්ච දරුවන්, පොලිසිය භාරයේ ඉන්න දරුවන්, පරිවාස භාරයේ ඉන්න දරුවන් යන මේ සියලු දෙනා ඉලක්ක කරගෙන කෙරෙන සංශෝධනයක්, මේක. මේකේ මීට වඩා පුළුල් අර්ථයක් තියෙනවා නමුත් දැන් ඇති වෙලා තියෙන සංවාදය තමයි අපිට දරුවන්ගේ විනය පවත්වාගෙන යාම සඳහා දරුවන්ට දඬුවම් කරන්න ම බැරි වෙනවා, කිසි ම දඬුවමක් කරන්න බැරි වෙනවා කියන කාරණය. අපි දඬුවම් දෙන එක කොතනින් වත් නතර කරලා නැහැ. විනය පවත්වාගෙන යෑම අපි තහනම් කරලා නැහැ. හැබැයි අපි සමාජයක් හැටියට හිතනවා නම් දඬුවම් දිය හැක්කේ දරුවන්ට ශාරීරික ව වද හිංසා දීම තුළින් පමණයි, එහෙම නැත්නම් ඔවුන්ව මානසික ව වට්ටලා විතරයි කියලා. අන්න එහෙනම් අපිට කතා කරන්න ගොඩක් දේවල් තියෙනවා. විනය පවත්වාගෙන යෑමට වද හිංසා දීම අත්‍යවශ්‍යයි කියලා හිතන සමාජයක් තුළ නම් අපි ජීවත් වෙන්නේ, අපිට කතා කරන්න ගොඩක් දේවල් ඉතුරු වෙලා තියෙනවා, මම හිතන්නෙ. ඒ නිසා තමයි අපි මේ විවාදය තව දික් කරලා තියෙන්නෙ. මේක සංවාදයට ගත යුතු කාරණාවක්. අපි කියන්නේ දඬුවම් දෙන්න, විනය පවත්වාගෙන යන්න ධනාත්මක දේවලුත් තියෙනවා, කරන්න කියලයි. දරුවෙක්ව ලැජ්ජාවට පත් කරන්නෙ නැතුව වද හිංසා නොකර පීඩනයට ලක් නොකර දඬුවම් දිය හැකි ක්‍රම ඕන තරම් තියෙනවා. ඒවා ගැන අපි වැඩමුළු තියලා සාකච්ඡා කරමු. මීට වඩා අපේ සමාජය තුළ අපිට හිතන්න ඕන කාරණාවක් තියෙනවා.

අපේ සමාජය තුළ ඔබ අද පොලිස් වාර්තා අරගෙන බලන්න. එහෙම නැත්නම් රෝහලකට ගිහිල්ලා බලන්න, අපේ රටේ ආර්ථික අර්බුදයක් පමණක් නෙවෙයි. සමාජ අර්බුද ගණනාවක් නිර්මාණය වෙලා තියෙන බව දකින්න පුළුවන්. ඒ අර්බුද තුළ ගැටුම් කියන්නෙ ප්‍රධාන ම අර්බුදයක්. ඕනෑ ම සමාජයක ගැටුම් තියෙන නමුත් අපේ සමාජයේ ගැටුම් නිරාකරණය කරන ප්‍රධාන ක්‍රමය ප්‍රචණ්ඩත්වය බවට පත් වෙලා තියෙනවා. එක්කයි, ගැටලුව. ගෘහස්ථ හිංසනය වැඩි වෙලා තියෙන රටක අපි ජීවත් වෙන්නේ. ගෘහස්ථ හිංසනය හිතන්න බැරි විදියට ප්‍රචණ්ඩත්වය බවට පත් වෙලා. අපේ පරම්පරාවේ අය නවක වදය ගැන හිතන කොට තව මත් ඉතා ම ප්‍රේමණීය විදිහටනේ හිතන්නේ. ඒ අපේ වයසෙ අය ලබපු අත්දැකීම් එක්ක. ඒත් අද නවකවදය ළමයින්ට දරාගන්න බැරි තත්වයකට පත් වෙලා. අපේ සමාජයේ ගැටුම් අපි නිරාකරණය කරන ප්‍රධාන ක්‍රමය ප්‍රචණ්ඩත්වය බවට පත් වෙලා තියෙනවා. ගෘහස්ථ හිංසනය වැඩි වෙලා තියෙන රටක අපි ජීවත් වෙන්නේ. ගෘහස්ථ හිංසනය හිතන්න බැරි විදියට ප්‍රචණ්ඩත්වය බවට පත් වෙලා. ඔබේ දරුවන්ගෙන් කතා කරලා අහන්න නේවාසිකාගාරවල වෙන සිද්ධීන් ගැන. ප්‍රචණ්ඩත්වය එතන තියෙන්නේ. ආයතන තුළ තරුණ තරුණියන් අතරේ, පන්සල් පල්ලි කෝවිල්වලත් මේ තත්වයන් නිර්මාණය වෙමින් යනවා. එක අතිශයින් ම භයානකයි. එතකොට අපි ගැටුම් නිරාකරණය කිරීම ප්‍රචණ්ඩත්වය තුළින් කළ හැකියි කියලා පිළිගන්න සමාජයක් බවට පත් වෙලා ද? එහෙමනම් ඒක ඉතා බරපතළයි. ඒක ශිෂ්ට සම්පන්න නෑ”.

මෙහි දී තවදුරටත් අදහස් දක්වමින් අමාත්‍යවරිය කියා සිටියේ, මීට වඩා දියුණු තැනකට සමාජය ගෙනයාම අත්‍යවශ්‍ය බවයි.

අල්ලස් කොමිසමේ අධ්‍යක්ෂ ජනරාල් රංග දිසානායක මහතා ද මෙහි දී අදහස් දැක්වී ය:

“අධ්‍යාපන දෙපාර්තමේන්තුව සම්බන්ධයෙන් සහ පාසල් සම්බන්ධයෙන් කියන්න වෙන දෙයක් තියෙනවා. ඒ තමයි පාසල් පවත්වාගෙන යෑම සඳහා ඉතා විශාල අරගලයක විදුහල්පතිවරුන් නියැළිලා ඉන්නවා කියන එක. බොහෝ වෙලාවට ළමයින්ගෙන් සල්ලි එකතු කරන දේවල් අපිටත් වාර්තා වෙනවා. දවසක් මම ලේකම්තුමාටත් කතා කළා මේ ගැන. චක්‍රලේඛත් නිකුත් කරලා තියෙනවා. පාසල් සංවර්ධන සමිතිත් තියෙනවා. ඒවට සල්ලිත් ගන්නවා. පාසලේ වැඩ කරන්නත් තියෙනවා. දැන් ඒවා යම් කෙනෙකුට අල්ලසක් විදිය පේන්නත් පුළුවන්. ඒ නිසා ඒවා ඇත්තට ම විධිමත් කරන්න ඕනේ. ඔබට ගත හැකි දේවල් සහ ගන්න බැරි දේවල් ලෙස. මොකද එහෙම නැත්නම් අවංක ව තමන්ගේ ඉස්කෝලේ හදන්න ඕන කියලා කියන ගුරු ගීතයේ වගේ ඉන්න විදුහල්පතිවරුන් අමාරුවෙ වැටෙනවා. ඒක නිසා ඒවා හදන්න ඕනේ. එතකොට අපිටත් ඇයි වැඩි දේවල් ගත්තේ කියලා ප්‍රශ්න කරන්න පුළුවන්. ළමයි ඉස්කෝලේ දාන ඒකත් ඇත්තට ම අපිට එක පැත්තක ඉඳන් බලන්න බෑ. විදුහල්පතිවරුන්ට තියෙන වැඩි ම චෝදනාව ළමයි ඉස්කෝලේ දාන්න සල්ලි ගන්නවා කියන එක. එතකොට ළමයි ඉස්කෝලේ දාන්න සමහරුන් සල්ලි දෙනවා. සල්ලි දීලා ළමයි ඉස්කෝලේ දාගත්ත අය කවදා වත් අපිට පැමිණිලි කරලත් නැහැ, මගේ ළමයා ඉස්කෝලෙට දැම්මේ සල්ලි දීලා කියලා. හැබැයි ඒ අයත් කියනවා ලංකාව මාර දූෂිතයි, ඉස්කෝලෙකට ළමයෙක් දාගන්න වත් බෑ සල්ලි දෙන්නේ නැතුව කියලා. එතනත් මානුෂික ප්‍රශ්නයක් තියනවා. ඒ නිසා ඒකට ‘සිස්ටම්’ එකක් හදන්න ඕනේ අනිවාර්යයෙන්.

මාධ්‍ය ඒකකය

– අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය

සියලු සංස්කෘතීන් තුළ ඇති සෞන්දර්ය විෂය අංග පිළිබඳ සරල අවබෝධයක් සහ හඳුනාගැනීමක් සියලු ශ්‍රී ලාංකික සිසුන්ට ලබා දීමට කටයුතු කළ යුතු බවත් ඒ තුළින් අන්‍යෝන්‍ය ගෞරවය සහ සැබෑ සංහිඳියාව ඇති වන බවත් ඉස්ලාම් ආගමික උපදේශක මණ්ඩලය අමතමින් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය පැවසී ය.

පාසල් පාදක ක්‍රියාකාරකම් සඳහා වැඩි නැඹුරුවක් ඇති කිරීම අධ්‍යාපන ප්‍රතිසංස්කරණවල අරමුණක් වන බවත් නව අධ්‍යාපන ප්‍රතිසංස්කරණවලින් අනතුරුව සිසුන් ක්‍රියාකාරකම් මූලික අධ්‍යාපන ක්‍රමවේදයක් සඳහා යොමු වීම හරහා ඉදිරියේ දී පාසල්වල ආගමික අධ්‍යාපනය ද ක්‍රියාකාරකම් පාදක වනු ඇති බවත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යවරිය මෙහි දී වැඩිදුරටත් පැවසුවා ය.

සිංහල මාධ්‍යයෙන් ඉස්ලාම් විෂය ඉගැන්වීම සඳහා ගුරුවරුන් බඳවා ගැනීම පිළිබඳ කරන ලද යෝජනාවට පිළිතුරු ලෙස අදාළ සංඛ්‍යාලේඛන විමසා බලා දත්ත මත පදනම් ව අවශ්‍යතාව අනුව බඳවා ගැනීම් කළ හැකි බව ද අමාත්‍යතුමිය මෙහි දී ප්‍රකාශ කළා ය.

මාධ්‍ය ඒකකය

– අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය.

නූතන ලෝකයේ මිනිසුන් මුහුණ දෙන ගැටලු විසඳා ගැනීම මඟින් වඩාත් යහපත් හෙටක් නිර්මාණය කිරීම සඳහා තාක්ෂණය යොදාගැනීමට අනාගත පරපුර මෙහෙයවීම අධ්‍යාපන ක්ෂේත්‍රයේ ප්‍රමුඛ වගකීමක් බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය පැවසුවා ය.

අමාත්‍යවරිය මේ බව පැවසූවේ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් සංවිධානය කරන ලද රොබෝ ෂූ -2025 රොබෝ තාක්ෂණ හා නව නිර්මාණ සමස්ත ලංකා පාසල් තරගාවලිය නමින් අද දින බත්තරමුල්ල අපේ ගම පරිශ්‍රයේ පැවති උත්සවයකට සහභාගී වෙමිනි.

එහි දී වැඩිදුරටත් අදහස් දැක්වූ අග්‍රාමාත්‍යතුමිය පැවසූවේ, රටක් වශයෙන් තාක්ෂණය මුල් කරගනිමින් අභියෝග ජයගත හැකි පරපුරක් බිහි කිරීමේ භුමිකාවක් අධ්‍යාපනයෙන් ඉටු කරන බවයි. ගෝලීය තාක්ෂණික පරිණාමයන් හා රැකියා වෙළඳපොළේ ඉල්ලුම සමග ගැළපෙන ආකාරයෙන් නව අධ්‍යාපන ප්‍රතිසංස්කරණ ක්‍රියාත්මක කරන බව ද, වර්තමානයේ කෘත්‍රීම බුද්ධිය සහ රොබෝ තාක්ෂණය, වෛද්‍ය විද්‍යාව සහ ඉංජිනේරු විද්‍යාව යන විෂයන් පමණක් නොව, කෘෂිකර්මය, කර්මාන්ත මෙන් ම එදිනෙදා සාමාන්‍ය ජීවිතය ද වෙනස් වෙමින් තාක්ෂණය ද ශීඝ්‍රයෙන් යාවත්කාලීන වෙමින් පවතින බව ද අමාත්‍යවරිය මෙහි දී පෙන්වා දුන්නා ය.

පාසල් දූ දරුවන්ගේ සැඟවුණු දක්ෂතා එළි දැක්වීම, ඔවුන් දිරිගැන්වීම හා ඇගයීම, අනාගත වැඩ ලෝකයේ දිශානතිය පිළිබඳ අවබෝධය යාවත්කාලීන කරවීම, නව්‍යතාවෙන් යුතුව සිතීමට දරුවන් යොමු කරවීම හා එමඟින් දරුවන්ගේ නවෝත්පාදන හැකියාව වැඩි දියුණු කිරීම, රොබෝ තාක්ෂණ අධ්‍යාපනය කෙරෙහි රජයේ මැදිහත්වීම ශක්තිමත් කර, පාසල් දූ දරුවන්ගේ හැකියාවන් දිවයින පුරා ප්‍රචලිත කරවීම මෙන් ම අනාගත වැඩ ලෝකයට සරිලන පරිදි ශ්‍රම වෙළඳ පොළට අවශ්‍ය රොබෝ ශිල්පීය කුසලතා සිසුන් තුළ වර්ධනය කිරීම එමඟින් ස්වංක්‍රීයකරණය පිළිබඳ ව්‍යවසායකත්ව සංකල්ප ස්ථාපනය කිරීම යන අරමුණු පෙරදැරිව මෙම රොබෝ තාක්ෂණ හා නව නිර්මාණ තරගාවලිය පැවැත්වෙන අතර නිෂ්පාදන කර්මාන්ත හා පරිසර අධ්‍යයන, අධ්‍යාපන, ඉංජිනේරු, නිෂ්පාදන, විනෝදාස්වාද, සෞඛ්‍ය හා වෛද්‍ය විද්‍යාත්මක යන ක්ෂේත්‍ර ඔස්සේ වාර්ෂික ව මෙම තරඟාවලිය පවත්වනු ලැබේ.

ශ්‍රී ලංකාවේ සියලු පළාත් ආවරණය වන පරිදි ජාතික හා පළාත් පාසල්වල 6 ශ්‍රේණියේ සිට 13 ශ්‍රේණිය දක්වා අධ්‍යයන කටයුතුවල නිරත වන වයස අවුරුදු 18ට අඩු පාසල් සිසුන් මෙම තරගය සඳහා සහභාගී වන අතර, ජයග්‍රාහකයන් සඳහා ප්‍රථම, දෙවන, තෙවන ස්ථාන සඳහා මූල්‍ය ත්‍යාග සහ කුසලතා සහතිකපත් ලබා දේ.

මෙම අවස්ථාවට විද්‍යා හා තාක්ෂණ අමාත්‍ය ක්‍රිෂාන්ත අබේසේන, අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශ ලේකම් නාලක කලුවැව විද්‍යා හා තාක්ෂණ අමාත්‍යාංශ ලේකම් වයි. එල්. මොහමඩ් නවවි යන මහත්ම මහත්මීන් එක් වූ අතර සිසු දරුවන්ගේ විවිධ නිර්මාණ නිරීක්ෂණයට අගමැතිනිය ද ඔවුන් හා එක් වූවා ය.

මාධ්‍ය ඒකකය

– අග්‍රාමාත්‍ය, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය ආචාර්ය හරිනි අමරසූරිය.

උපදේශනය හා මනෝ විද්‍යාව පාසල් විෂය නිර්දේශයට ඇතුළත් කළ යුතු බව ද ඒ සඳහා ගුරුවරුන් බඳවා ගැනීමට අවශ්‍ය සැලැස්මක් සකස් කළ යුතු බව ද අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මිය පැවසී ය.

අමාත්‍යවරිය මේ බව ප්‍රකාශ කළේ පාසල් තුළ අධ්‍යාපනය හදාරන සිසු සිසුවියන්ගේ මානසික මට්ටම යහපත් පරිදි පවත්වාගෙන යා හැකි මනෝ උපදේශන ජාතික ප්‍රතිපත්තියක් සකස් කිරීමේ වැඩටහනේ වර්තමාන තත්ත්වය පිළිබඳ දැනුම්වත් කිරීමේ සාකච්ඡාවකට එක් වෙමිනි.

එහි දී වැඩිදුරටත් අදහස් දැක්වූ අමාත්‍යවරිය පෙන්වා දුන්නේ දිවයිනේ සියලු ම පළාත් ආවරණය වන පරිදි විධිමත් සැලැස්මක් අනුව සියලු ම පාසල්වලට මෙම වැඩසටහන් ක්‍රියාත්මක කළ යුතු බවයි. පළාත් මනෝ සමාජීය සම්පත් මධ්‍යස්ථාන කළමනාකරුවන්ගේ පුරප්පාඩු සහ සම්පත් මධ්‍යස්ථාන සඳහා අවශ්‍ය පහසුකම් පිළිබඳ ව මෙන් ම අධ්‍යාපන ක්ෂේත්‍රයට අදාළ ධනාත්මක විනය පාලන ක්‍රම පිළිබඳ ව ද, මෙහි දී අවධානය යොමු කළ අමාත්‍යවරිය ගැටලු නිරාකරණය, මත්ද්‍රව්‍ය, අපයෝජන මෙන් ම ළමා හිංසනය ආදී ගැටලු සියල්ල ම එක ම තැනකින් විසඳීම හරහා වඩා ඵලදායීතාවක් ලබා ගත හැකි දැයි යන්න සලකා බලන ලෙස ද පැවසී ය.

ගුරුවරුන් ගුරු උපදේශකවරුන් හා විෂය අධ්‍යක්ෂවරුන් සමග සාකච්ඡා කරමින් අන්තර් ජාතික ප්‍රමිතීන් ද සැලකිල්ලට ගෙන ළමා ප්‍රචණ්ඩත්වයට එරෙහි ජාතික ප්‍රතිපත්තියක් සකස් කෙරෙමින් පවතින බවත් එහි නියමු ව්‍යාපෘතිය යටතේ සකස් කරන ලද පන්ති කාමර තුළ දරුවන් ඉතා සතුටින් සිටින බවත්, එහි නියමු වැඩසටහන මේ වන විට පළාතකින් පාසල් 10 බැගින් ගෙන පාසල් 50ක් ආවරණය වන පරිදි සාර්ථකව සිදු වන බවත් මෙහි දී අමාත්‍යවරියගේ අවධානයට යොමු විය.

මාධ්‍ය ඒකකය

නව අධ්‍යාපන ප්‍රතිසංස්කරණවලට සමගාමීව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ තොරතුරු හා සන්නිවේදන තාක්ෂණ ශාඛාව මගින් සාමාන්‍ය අධ්‍යාපනය ඩිජිටල් පරිවර්තනයට ලක් කිරීමේ දීර්ඝ කාලීන සැලැස්ම යටතේ පාසල් සඳහා ඩිජිටල් උපාංග ලබා දීමට සමාන්තරව පාසල් පද්ධතියේ මානව සම්පත් ධාරිතා සංවර්ධනය කිරීමේ ක්‍රියාකාරකමක් ලෙස චීන මහජන සමූහාණ්ඩුව සමග පවත්වන ලද වි‍දේශ පුහුණු වැඩසටහනෙහි ප්‍රගති සමාලෝචන රැස්වීම අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මහත්මියගේ ප්‍රධානත්වයෙන් අමාත්‍යාංශයේ දී පවත්වන ලදි.

ඩිජිටල් රාජ්‍ය ප්‍රතිපත්තිය ක්‍රියාත්මක කිරීම යටතේ විදේශ සම්පත් දෙපාර්තමේන්තුවේ සහාය ඇතිව පාසල්, කලාප හා පළාත් මට්ටමින් අඛණ්ඩව ක්‍රියාත්මක කිරීමට සැලසුම් කර ඇති ඩිජිටල් පරිවර්තන වැඩසටහන, මෙරට මානව සම්පත් සංවර්ධනය වෙනුවෙන් අධ්‍යාපන පද්ධතියට ලැබුණුු සුවිශේෂ අවස්ථාවක් වන අතර එහි පළමු වටය සඳහා 38 දෙනෙකුගෙන් යුත් කණ්ඩායමක් වි‍දේශ පුහුණු වැඩසටහනට සහභාගී වී ඇත.

බුද්ධ සාසන කාර්ය සාධක බලකාය සාමාජිකයින් වන රාජකීය පණ්ඩිත, ශාස්ත්‍රපති ත්‍රිකුණාමලයේ ආනන්ද හිමි, මහාචාර්ය අගලකඩ සිරිසුමන හිමි, ඇතුලු ගිහි පැවිදි සාමාජිකයින් සමග අධ්‍යාපන, උසස් අධ්‍යාපන වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනී අමරසූරිය අමාත්‍යාංශයේ දී සාකච්ඡාවක් පවත්වන ලදි.

එහි දී වත්මන් රජය ය‍ටතේ ආගමික අධ්‍යාපනයට මෙන්ම සෞන්දර්යය විෂයන්ද කිසිදු අයුරකින් කප්පාදු කිරීමක් නොකරන බව අධ්‍යාපන, උසස් අධ්‍යාපන වෘත්තීය අධ්‍යාපන ආචාර්ය හරිනී අමරසූරිය අග්‍රාමාත්‍යතුමිය අවධාරණය කරන ලදි.

එමෙන්ම නව විෂය නිර්දේශය යටතේ බුද්ධ ධර්මය පෙළ පොතේ අඩංගු කරුණු පිළිබඳව බුද්ධ සාසන කාර්ය සාධක බලකායේ සාමාජිකයින් කරන ලද විමසීමක දී ආගමික හා සාරධර්ම ශාඛාවේ අධ්‍යක්ෂතුමිය ප්‍රකාශ කර සිටියේ 2026 වර්ෂයේ ක්‍රියාත්මක කිරීමට නියමිත අධ්‍යාපන ප්‍රතිසංස්කරණ වලට සමගාමීව 6 ශ්‍රේණියේ පළමු මොඩියුලයේ පළමු පාඩම තුළින් සියලු ආගම් පිළිබඳ මූලික අවබෝධයක් සියලු දරුවන්ට ලබා දීමට අපේක්ෂිත බවත්, ඉන්පසුව තමන්ගේ ආගම පිළිබඳ අධ්‍යයනය කිරීමට අවස්ථාව ලැබෙන බවත්ය.

එසේම බුද්ධ ධර්මය විෂය ඉගැන්වීමේ ගුරුවරුන්ගේ හිඟය පිළිබඳවත් අවධානය යොමු වූ අතර ඒ සඳහා පිළියමක් වශයෙන් අග්‍රාමාත්‍ය හරිනී අමරසූරිය ප්‍රකාශ කර සිටියේ මේ දිනවල සියලු පළාත් ආවරණය වන පරිදි ගුරුවරුන්ගේ තොරතුරු රැස්කරමින් සිටින බවත්, ඉන්පසුව විධිමත් සැලස්මකට අනුව ගුරුවරුන් බඳවා ගැනීම හා අනුයුක්ත කිරීම මගින් ගුරු තුලනය කිරීම සිදු කරන බවයි.

මාධ්‍ය ඒකකය

– අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය

ශුද්ධ වූ මුහම්මද් නබිතුමන්ගේ ජන්ම දිනානුස්මරණ මිලාද් උන් නබී උත්සවයට සමගාමීව අධ්‍යාපන උසස් අධ්‍යාපන සහ වෘත්තීය අධ්‍යාපන අමාත්‍යාංශයේ මුස්ලිම් පාසල් සංවර්ධන ශාඛාව මගින් සංවිධානය කරන ලද වැඩසටහනක් 2025.09.16 වන අද දින අධ්‍යාපන අමාත්‍යාංශයේ සත්වන මහල් ශ්‍රවණාගාරයේ දී පැවැත්විණ.

මෙම අවස්ථාව සඳහා ප්‍රධාන ආරාධිතයා වශයෙන් සහභාගී වූ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය මහත්මිය මෙහි දී ප්‍රකාශ කර සිටියේ නබිනායක තුමන්ගේ ඉගැන්වීමේ හරයෙන් ඉස්මතු වන කරුණාව, අවංකභාවය, අන්‍යෝන්‍ය අවබෝධය, සහජීවනය සහ වෛර ‍නොකිරීම වැනි උසස් මානව ගුණාංග අද සමාජයට ගත හැකි හොඳ ම ආදර්ශයන් වන බවයි.

වැඩිදුරටත් අදහස් දක්වමින් එතුමිය ප්‍රකාශ කර සිටියේ, ගෞරවනීය මානව ප්‍රේමයක් ගොඩ නැගීමට කැප වූ නබි නායකතුමන් තම දහමේ හර පද්ධතිය සිය දේශනාවෙන් මෙන් ම පරිත්‍යාගශීලී ක්‍රියාවන්ගෙන් ද සමාජය වෙනුවෙන් ප්‍රකට කරමින් අපරිමිත කැපකිරීමක් සිදු කර ඇති බවයි.

මෙම උත්සවය සඳහා වැඩ බලන අධ්‍යාපන ලේකම් ඒ. ජේ. එස්. එස්. එදිරිසූරිය, විවෘත විශ්වවිද්‍යාලයේ සමාජීය විද්‍යා හා තෘතීයක අධ්‍යාපන අධ්‍යයනාංශයේ මහාචාර්ය ජේ. ඩී. කරීම්ඩීන් (J. D. Careemdeen) යන මහත්ම මහත්මීන් සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ අතිරේක ලේකම්වරුන් ඇතුළු අධ්‍යක්ෂවරු සහභාගී වූහ.

මාධ්‍ය ඒකකය

පාසල් ළමුන් සඳහා ආහාර ලබා දීමේ රජයේ පෝෂණ වැඩසටහන දිවයිනේ සියලු පළාත්වල අධ්‍යාපන කලාප 100 ම ආවරණය වන පරිදි ක්‍රියාත්මක වන අතර 2025 වර්ෂය සඳහා මෙම වැඩසටහනට රුපියල් බිලියන 32ක් අය-වැය ප්‍රතිපාදන මගින් වෙන් වී ඇත. පාසල් 8,943ක අධ්‍යාපනය ලබන මිලියන 1.4ක ශිෂ්‍ය ප්‍රජාවකට මෙම පාසල් පෝෂණ වැඩසටහනේ ප්‍රතිලාභ මේ වන විට හිමි වේ.

නිරෝගී ක්‍රියාශීලී දරු පරපුරක් දැයට දායාද කිරීමේ අභිමතාර්ථයෙන් පාසල් සිසුන්ගේ පෝෂණ ගැටලු අවම කිරීම, යහපත් ආහාර පුරුදු හා සෞඛ්‍ය පුරුදු ප්‍රවර්ධනය කිරීම මෙන් ම දේශීය ආහාර සංස්කෘතියක් ගොඩනැගීම මගින් රටට වැඩදායී පුද්ගලයකු බිහි කිරීම යන අරමුණු පෙරදැරි ව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් පාසල් ළමුන් සඳහා නොමිලේ ආහාර ලබා දීමේ වැඩසටහන වාර්ෂික ව ක්‍රියාවට නංවනු ලබයි.

2006 වර්ෂයේ සිට ජාතික වැඩසටහනක් ලෙස ක්‍රියාත්මක කෙරෙන මෙම පාසල් පෝෂණ වැඩසටහන සඳහා පාසල් තෝරාගැනීමේ දී සලකා බැ‍ලෙන නිර්ණායක කිහිපයකි. ඉන් පළමු නිර්ණායකයේ දී ශිෂ්‍ය සංඛ්‍යාව 100ට අඩු පාසල්වල සියලු ම ශිෂ්‍ය ශිෂ්‍යාවන් මෙම ආහාර ලබා දීමට සුදුසු සේ සැලකේ. එහෙත් ආරම්භයේ සිට අනුමත කර ඇති පාසලක් නම් වර්තමානයේ ශිෂ්‍ය සංඛ්‍යාව 100ට වැඩි වුව ද එය නොසලකා සියලු සිසුන්ට ආහාර ලබා දීම සිදු කෙරේ. දෙවෙනි නිර්ණායකයේ දී සියලු ම පාසල්වල 1 සිට 5 ‍දක්වා ප්‍රාථමික ශ්‍රේණිවල සියලු දරුවන් සුදුසු සේ සැලකේ. විශේෂ අධ්‍යාපන ඒකකවල හෝ විශේෂ අධ්‍යාපන පාසල්වල සියලු ම ශිෂ්‍ය ශිෂ්‍යාවන් මෙම ආහාර වැඩසටහන මගින් ප්‍රතිලාභ ලැබීමට සුදුසු වන බව තෙවෙනි නිර්ණායකයෙන් කියවෙයි. සිව් වෙනි නිර්ණායකයෙන් කියවෙන්නේ, තෝරාගත් පිරිවෙන්වල ගිහි සිසු සිසුවියන් මෙන් ම අවශ්‍යතාව මත පැවිදි ශිෂ්‍ය ප්‍රජාව ද මෙම වැඩසටහනට අයත් වන බවයි. 6 ශ්‍රේණියේ සිට 13 ශ්‍රේණිය දක්වා ශ්‍රේණිවල ශිෂ්‍ය ශිෂ්‍යාවන් ද පෝෂණ තත්වය හා අවශ්‍යතාව මත මෙම ආහාර වැඩසටහනට ඇතුළත් කරගන්නා බව පස් වන නිර්ණායකයෙන් අදහස් කර ඇත.

පාසල ආරම්භ වී පළමු පැය තුළ එනම් උදෑසන 7.30 ත් 8.30 ත් අතර ආහාර ලබා දීම සිදු කරන අතර එක් සිසුවකුගේ දෛනික ආහාර වේලක් වෙනුවෙන් රු. 110/- ක මුදලක් වෙන් වී ඇත. වත්මන් කාර්යබහුල සමාජ ජීවන රටාවට අනුව නිවසේ දී බොහෝ විට අතපසු වන දරුවන්ගේ උදෑසන කෑම වේල, පාසල තුළ දී ඔවුන්ට ප්‍රමාණවත් පරිදි හා පෝෂණීය අයුරින් ලබා දීම දිවයිනේ ප්‍රසිද්ධ පාසල් ඇතුළු සියලු ම පාසල්වලට භේදයකින් තොර ව ක්‍රියාවට නැංවීමට 14/2025 හා 2025.04.01 දිනැති ව නිකුත් කරන ලද නව චක්‍රලේඛය අනුව අධ්‍යාපන අමාත්‍යාංශය පියවර ගෙන තිබේ.

ඒ අනුව සිසු දරුවන්ට වඩාත් පෝෂ්‍යදායී ආහාර වේලක් ලබා දීමේ අරමුණින් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරියගේ ඉල්ලීම පරිදි ගිය වසරට සාපේක්ෂව මෙම වැඩසටහනට වෙන්කරන ලද මුදල දෙගුණයක් බවට පත් කෙරුණු අතර කලාප හා කොට්ඨාශ අධ්‍යාපන අධ්‍යක්ෂකවරුන්, ගුරු උපදේශකවරුන්, විදුහල්පතිවරුන්ගේ හා ගුරුවරුන්ගේ නියාමනයෙන් සෞඛ්‍ය අමාත්‍යා‍ංශයේ මහජන සෞඛ්‍ය පරීක්ෂකවරුන්ගේ අධීක්ෂණය යටතේ සෞඛ්‍ය ආරක්ෂීත මෙන්ම පෝෂදායී ආහාරවේලක් ලබා දීමේ අරමුණින් මෙම වැඩසටහන ක්‍රියාත්මක කෙරේ.

මාධ්‍ය ඒකකය

රජයේ හා රජයේ ආධාර ලබන පාසල් සිසුන් 4,418,404 ක් සඳහා 2026 වර්ෂයට නියමිත මුළු නිල ඇඳුම් ප්‍රමාණයම චීන රජයේ ප්‍රදානයක් ලෙස ලබා දීමට අදාළ එකඟතා සහතික හුවමාරු කිරීමේ නිල උත්සවය 2025.09.11 දින බත්තරමුල්ල අධ්‍යාපන අමාත්‍යාංශ පරිශ්‍රයේ දී පැවැත්වුණි. ඒ අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න, චීන තානාපති Qi Zhenhong යන මහත්වරුන්ගේ ප්‍රධානත්වයෙනි.

එහිදී 2026 වර්ෂයට අදාළ නිල ඇඳුම් ලබා දීමට එකඟතාව පල කළ සහතිකය හුවමාරු කිරීම අධ්‍යාපන අමාත්‍යාංශයේ ලේකම් නාලක කලුවැව මහතා සහ චීන නානාපති Qi Zhenhong මහතා අතර සිදු විය.

එහිදී අදහස් දැක්වූ අධ්‍යාපන හා උසස් අධ්‍යාපන අමාත්‍ය වෛද්‍ය මධුර සෙනෙවිරත්න මහතා,

“2025 වර්ෂය සඳහා ද චීනය රෙදි මීටර් මිලියන 11.82 ක් ශ්‍රී ලංකාවට ප්‍රදානය කළා. එමඟින් සමස්ත ජාතික අවශ්‍යතාව ආවරණය වුණා වගේම රට පුරා සිසුන් මිලියන 4.6 කට වැඩි පිරිසකට සෘජුවම ප්‍රතිලාභ සැලසුණා. රුපියල් බිලියන 5.17 කට වඩා වටිනා මෙම දායකත්වය, ලාබාලත ම සිසුවාගේ සිට ජාතික විභාග සඳහා සූදානම් වන ජ්‍යෙෂ්ඨ සිසුන් දක්වා සෑම දරුවෙකුටම ගෞරවයෙන් හා සමානාත්මතාවයෙන් යුතුව අධ්‍යාපනය හැදෑරීමට මඟ පෑදුවා. 2026 වසර සඳහාද එවැනි ම දායකත්වයක් ලබා දීම අගය කළ යුතු වෙනවා”

එහිදී වැඩිදුරටත් අදහස් දැක්වූ නියෝජ්‍ය අමාත්‍යවරයා ප්‍රකාශ කළේ චීනය 2026 නිල ඇඳුම් ප්‍රදානය පිළිබඳ කඩිනම් ප්‍රතිචාරයක් දැක්වීම ශ්‍රී ලංකා රජය සහ චීනය අතර පවතින අන්‍යෝන්‍ය මිත්‍රත්වය පිළිඹිබු කරන සාධකයක් බවයි.

මේ අවස්ථාව සඳහා ශ්‍රී ලංකාවේ චීන තානාපති කාර්යාලයේ නිලධාරීන් හා අධ්‍යාපන අමාත්‍යාංශයේ නිලධාරීන් පිරිසක් සහභාගි වූහ.

මාධ්‍ය ඒකකය

2025 වර්ෂයේ සිට පාසල්වල 2 ශ්‍රේණියේ සිට 11 ශ්‍රේණිය දක්වා සිසුන් ඇතුළත් කිරීම (5 සහ 6 ශ්‍රේණි හැර) සම්බන්ධයෙන් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය විසින් 2025.09.09 දිනැතිව 27/2025 චක්‍රලේඛය නිකුත් කර ඇත. එම චක්‍රලේඛය ප්‍රකාරව 2025 අධ්‍යයන වර්ෂයේ ජාතික පාසල්වල අතරමැදි ශ්‍රේණිවල පවතින පුරප්පාඩු සඳහා සිසුන් ඇතුළත් කර ගැනීම සිදු කරනු ලබයි.

ඒ අනුව, 2025.06.30 දිනට ජාතික පාසල්වල අතරමැදි ශ්‍රේණිවල පවත්නා පුරප්පාඩු මේ සමග අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශ වෙබ් අඩවියේ ප්‍රසිද්ධ කරනු ලබයි.  

එම පුරප්පාඩු සඳහා අයදුම් කිරීමට අපේක්ෂා කරන සියලු ම අයදුම්කරුවන් 27/2025 චක්‍රලේඛයෙහි  සඳහන් අයදුම්පත්‍රය සම්පූර්ණ කර  2025.09.26 දිනට පෙර සියලු අතිරේක ලේඛන ද සමග අදාළ පාසල්වල විදුහල්පතිවරුන් වෙත ලියාපදිංචි තැපෑල මඟින් යොමු කළ යුතුය.

මානව සම්පත් සංවර්ධන ක්‍රියාවලිය වේගවත් කිරීම වෙනුවෙන් පිහිට වූ කමිටුව විසින් යෝජිත අධ්‍යාපන සභාව කඩිනමින් පිහිටුවීමේ අරමුණින් ගුරු-විදුහල්පති වෘත්තීය සංගම් නියෝජිතයන් අද දින (2025.09.10) අධ්‍යාපන අමාත්‍යාංශ පරිශ්‍රයට කැඳවූ අතර එහි දී ඔවුන්ට විවෘත ව හා නිදහස් ව අදහස් සහ යෝජනා ඉදිරිපත් කිරීමේ අවස්ථාව හිමි විය.

මෙම හමුවේ දී ගුරු වෘත්තීය සංගම් සාමාජිකයන්ගෙන් ඉදිරිපත් වූ යෝජනා අතර අධ්‍යාපන සභාව මුළුමනින් ම දේශපාලනීකරණයෙන් තොර ස්ථාවර ප්‍රතිපත්ති මාලාවක් සහිත ප්‍රමිතිගත සංවිධානයක් විය යුතුය යන අදහසට සියලු දෙනාගේ ම එකඟත්වය පළ විය. පිහිටුවනු ලබන අධ්‍යාපන සභාවේ සාමාජිකයන්ගේ කාර්යභාරය හා වපසරිය, ආචාර ධර්ම පද්ධතිය මෙන් ම කාල රාමුව පිළිබඳ නිශ්චිත නිර්ණායක සැකසීමේ අවශ්‍යතාව ද මෙහි දී මූලික ව ම ඉස්මතු කෙරුණු අතර එය මෙරට ප්‍රකට වෙනත් වෘත්තික සභාවන් මෙන් අදාළ වෘත්තිකයන්ගේ අදහස් හා යෝජනා මත ප්‍රධාන වශයෙන් පිහිටා ස්ථාපනය කළ යුතු බව ද අවධාරණය කෙරිණ.

මෙම අවස්ථාවට පාර්ලිමේන්තු අධ්‍යාපන අනුකාරක සභාවේ අනුකමිටුවක් වන අධ්‍යාපන සභාව පිහිටු වීමේ අනුකමිටුවේ සභාපති කම්කරු නියෝජ්‍ය අමාත්‍ය මහින්ද ජයසිංහ මහතාද, ශ්‍රී ලංකා ගුරු සේවය හා ශ්‍රී ලංකා විදුහල්පති සේවය වෘත්තීය සංගම් වෘත්තීය සමිති රැසක් මෙම අවස්ථාවට එක් විය.

මාධ්‍ය ඒකකය

දිවයින පුරා පිහිටි 1AB ගණයේ සහ 1C ගණයේ පාසල් විද්‍යාගාරවල උපකරණ සහ රසායනික ද්‍රව්‍ය මිලදීගැනීම වෙනුවෙන් 2025 වර්ෂයේ ද්වීතීක අධ්‍යාපන ආංශික වැඩිදියුණු කිරීමේ වැඩසටහන (SESIP) යටතේ පාසල් පාදක ප්‍රදානයක් ලෙස මිලියන 500ක මුල්‍ය ප්‍රතිපාදන වෙන්කර තිබේ.

අධ්‍යාපන, උසස් අධ්‍යාපන සහ වෘත්තිය අධ්‍යාපන අමාත්‍යංශයේ විද්‍යා අංශය මගින් මේ වනවිට අදාල ප්‍රතිපාදන පාසල් සංවර්ධන සමිති ගිණුම් වෙත බැර කරමින් පවතින අතර පාසල්වල ශිෂ්‍ය සංඛ්‍යාව පදනම් කරගෙන ප්‍රතිපාදන වෙන් කිරීම සිදුකෙරේ.

මෙහිදී පාසලකට ලැබෙන උපරිම මුදල රුපියල් මිලියනයක් වන අතර අවම මුදල රුපියල් 40,000 කි.

විද්‍යා අධ්‍යාපනයේ ප්‍රවර්ධනය හා ප්‍රායෝගික ක්‍රියාකාරකම් කෙරෙහි වැඩි අවධානයක් ලබාදීමත්, ඉදිරියේදී ක්‍රියාත්මක කරනු ලබන අධ්‍යාපන ප්‍රතිසංස්කරණ සාර්ථක කර ගැනීමට අවශය යටිතල පහසුකම් වැඩිදියුණු කිරීමත් මෙහි අරමුණයි.

මාධ්‍ය ඒකකය

ශ්‍රී ලංකා උසස් තාක්ෂණ අධ්‍යාපන ආයතනයේ කථිකාචාර් වෘත්තීය සංගමය සහ අග්‍රාමාත්‍ය, අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය මහත්මිය අතර එම ආයතනයේ අධ්‍යයන හා වෙනත් ගැටලු සම්බන්ධයෙන් සාකච්ඡාවක් අද (2025.09.03) දින අධ්‍යාපන අමාත්‍යාංශයේ දී පැවති අතර එම ආයතනයේ අධ්‍යක්ෂ ජෙනරාල් චන්දන රුද්‍රිගූ මහතා ද එම අවස්ථාවට සහභාගි විය.

මෙහි දී අධ්‍යාපනයේ නව පරිවර්තනීය වෙනස්කම් හා ප්‍රතිසංස්කරණ හමුවේ ශ්‍රී ලංකා උසස් තාක්ෂණ අධ්‍යාපන ආයතනයට හිමි ස්ථානය හා ආයතනයේ ඉදිරි දිශානතිය පිළිබඳ අවධානය යොමු කරමින් වෘත්තීය සංගමයේ ආචාර්යවරුන් පවසා සිටියේ අධ්‍යයන හා වෘත්තීය යන දෙයංශයෙන් ම සිසුන්ට උසස් අධ්‍යාපන ප්‍රවේශ අවස්ථා සම්බන්ධයෙන් බාධා හා ගැටලු පවතින බවයි. මේ පිළිබඳ කරුණු පැහැදිලි කළ අග්‍රාමාත්‍යවරිය, එම අංශ දෙකට ම ඒකාබද්ධ ව ඉදිරියට හා හැකි නව ප්‍රවේශයක මිණුම් දඬු සකස් කිරීමට අවධානය යොමු කරන බව කියා සිටියා ය. අමාත්‍යවරිය මෙහි දී එම ආචාර්යවරුන්ට වැඩිදුරටත් දන්වා සිටියේ නවීන ලෝකයට උචිත පරිදි ආයතනයේ ආධ්‍යාපනික හා වෘත්තීය පාඨමාලා විෂය නිර්දේශ යාවත්කාලීන කිරීමට පියවර ගැනීම සම්බන්ධයෙන් අවධානය යොමු කරන ලෙසයි.

වෘත්තීය සංගමය විසින් ඉදිරිපත් කළ ආයතනයේ අධ්‍යයන/ අනධ්‍යයන සේවක දීමනා හා වැටුප් සම්බන්ධයෙන් ද අවධානය යොමු කළ අග්‍රාමාත්‍යවරිය එම ගැටලු විසඳීම පිළිබඳ ව මුදල් අමාත්‍යාංශය සමග සාකච්ඡා කරන බව පැවසුවා ය.

මාධ්‍ය ඒකකය

අන්තර් විශ්වවිද්‍යාල විද්‍යායතන ශිෂ්‍ය ක්‍රියාකාරි කමිටු සාමාජිකයන් හා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් අධ්‍යාපන අමාත්‍යාංශයේ දී පැවති අතර අමාත්‍යාංශ නිලධාරීහු ද එම අවස්ථාවට සහභාගි වී සිටියහ.

එහි දී එම ශිෂ්‍ය ක්‍රියාකාරීන් සිය සුභසාධන හා අධ්‍යයන ගැටලු පිළිබඳ ව අමාත්‍යවරිය හමුවේ කරුණු ඉදිරිපත් කරන ලදි. ජාතික වෘත්තීය තාක්ෂණ පුහුණුව ලබන සිසුන් වසර දෙක තුනක පුහුණුවෙන් අනතුරු ව වෘත්තීය තාක්ෂණ විශ්වවිද්‍යාලයට ඇතුළත් වීමෙන් පසු එහි ද තුන් අවුරුදු පාඨමාලාවක් හැදෑරීමට සිදු වීම හා එම කාලය අඩු කරගැනීම සම්බන්ධයෙන් ද මෙහි දී ශිෂ්‍ය ක්‍රියාකාරීහු කරුණු ඉදිරිපත් කළහ.

එසේ ම නව ජාතික නිපුණතා සම්මත වීමත් සමග රූපලාවන්‍ය විද්‍යා පාඨමාලාවේ යම් විෂය කොටස් ඉවත් වීමෙන් එම පාඨමාලාවේ ගුණාත්මක භාවයේ යම් පහළ යාමක් පෙන්නුම් කරන බව ද ඔවුන් කියා සිටි අතර තත්වය සොයා බලා කඩිනම් වාර්තාවක් ලබා දෙන ලෙස අග්‍රාමාත්‍යවරිය ඒ අවස්ථාවේ දී ම නිලධාරීන්ට පැවසී ය.

එසේ ම නව ජාතික නිපුණතා සම්මත වීමත් සමග රූපලාවන්‍ය විද්‍යා පාඨමාලාවේ යම් විෂය කොටස් ඉවත් වීමෙන් එම පාඨමාලාවේ ගුණාත්මක භාවයේ යම් පහළ යාමක් පෙන්නුම් කරන බව ද ඔවුන් කියා සිටි අතර තත්වය සොයා බලා කඩිනම් වාර්තාවක් ලබා දෙන ලෙස අග්‍රාමාත්‍යවරිය ඒ අවස්ථාවේ දී ම නිලධාරීන්ට පැවසී ය.

මාධ්‍ය ඒකකය

– අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය

රට තුළ පරිවර්තනීය වෙනසක් සිදු කිරීමේ වගකීම දේශපාලන නායකයන්ට පමණක් නොව රාජ්‍ය සේවය නායකත්වය දෙන නිලධාරීන්ටද අයත් වන බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය ප්‍රකාශ කළාය.

අමාත්‍යවරිය මේ අදහස් දැක්වුවේ, ශ්‍රී ලංකා අධ්‍යාපන පරිපාලන සේවයේ තුන්වන ශ්‍රේණිය සඳහා සීමිත පදනම මත බඳවාගත් නව නිලධාරීන්ට පත්වීම් ලිපි පිරිනැමීමේ උත්සවයට සහභාගී වෙමින්ය. අධ්‍යාපන අමාත්‍යාංශයේ දී පැවති මෙම උත්සවයේ දී නවක නිලධාරීන් 405 දෙනාට පත්වීම් ලිපි ලබාදෙන ලදි.

මෙහිදී වැඩිදුරටත් අදහස් දක්වමින් අමාත්‍යවරිය පැවසුවේ,

“ඉතිහාසය වෙනස් කළ හැකි මොහොතකයි ඔබ මේ පත්වීම් ලබන්නේ. අප බලාපොරොත්තු වන පරිවර්තන යුගය ගොඩනගා ගැනීමේ සිහිනයේ විශාල කොටසක් අධ්‍යාපන ක්ෂේත්‍රය සතුය. රටට ශක්තිමත් රාජ්‍ය සේවයක් අවශ්‍යයි. නමුත් එය රැකියාවක් පමණක් නොව, ජනතාවගේ අපේක්ෂාවන් ඉටු කිරීමට අත්‍යවශ්‍ය මෙහෙයුමක් බව ඔබ සැම තේරුම් ගත යුතුය,” යනුවෙනි.

තමන්ගේ කාර්යයයේ වගකීම නිවැරදිව ඉටුකළ හැකි හෘද සාක්ෂිය අවදිකරන තීරණ ගැනීමට හැකි සුවිශේෂී අධ්‍යාපන පරිපාලන සේවයක් අපේ රටට අවශ්‍ය වේ. අධ්‍යාපන කේෂ්ත්‍රෙය් මේ වන විට පවතින පැරණි ක්‍රමවේද ඉවත් කර පරිවර්තනීය යුගයක් කරා යාමට නම් ඔබ ජනතාවගේ ගැටලු හඳුනාගෙන ඉන් නොනැවතී ඒවා විසඳීමට අවශ්‍ය කටයුතු කිරීමට වගබලා ගත යුතු බව වැඩි දුරටත් අවධාරනය කරන ලදි.

ශක්තිමත් රාජ්‍ය සේවයක් සඳහා ශක්තිමත් දේශපාලන අධිකාරියක් සේම ශක්තිමත් සෘජු තීරණ ගතහැකි ශක්තිමත් රාජ්‍ය සේවයක් අවශ්‍යය බවත්, පුදගලික න්‍යායෙන් මිදී ජනතා අපේක්ෂා මල්ඵල ගැන්වීමම ප්‍රධාන අරමුණ කරගත යුතු බවත් අග්‍රාමාත්‍යතුමිය වැඩිදුරටත් ප්‍රකාශ කරන ලදි.

අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතාද මෙම උත්සවයට එක්ව සිටි අතර, නව නිලධාරීන්ට තමාගේ අනුග්‍රහය සැමවිටම ලැබෙන බවට සහතික කළේය. ඉදිරි දශකයේ අධ්‍යාපන ක්ෂේත්‍රයේ ගුණාත්මක වෙනස්කම් ගෙන ආ රටේ පරිවර්තන මඟ අලුත් නිලධාරීන්ගේ දක්ෂත්වය මත රඳා පවතී බවත්, ඔවුන්ගේ කැපවීමෙන් ශ්‍රී ලංකාවට අවශ්‍ය වූ ශක්තිමත් රාජ්‍ය සේවය ගොඩනගා ගත හැකි බවත් අද උත්සවය තුළ විශේෂයෙන් අවධාරණය විය.

මෙම අවස්ථාව සඳහා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශ ලේකම් නාලක කලුවැව, අධ්‍යාපන සේවා අංශයේ අතිරේක ලේකම් කමල් ආරියසිංහ ඇතුළු අමාත්‍යාංශයේ උසස් නිලධාරීන් විශාල පිරිසක්ද සහභාගී වූහ.

මාධ්‍ය ඒකකය

– අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය

රැකියා විරහිත උපාධිධාරී ඒකාබද්ධ සංගමයේ නියෝජිතයන් සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් අධ්‍යාපන අමාත්‍යාංශයේ දී පැවති අතර එම අවස්ථාවට තරුණ කටයුතු නියෝජ්‍ය අමාත්‍ය එරංග ගුණසේකර සහ පාර්ලිමේන්තු මන්ත්‍රී චන්දන සූරියආරච්චි යන මහත්වරු ද සහභාගි වී සිටියහ.

රැකියා විරහිත උපාධිධාරීන් ගුරුවරුන් ලෙස බඳවා ගැනීම පමා වීමට හේතුවක් ව, ශ්‍රේෂ්ඨාධිකරණයේ විභාග වෙමින් පැවති නඩු හතරේ අධිකරණ ක්‍රියාවලිය මේ වනවිට අවසන් අදියරේ පවතින බැවින් එම අධිකරණ කටයුතු අවසන් වූ වහා ම ගැසට් පත්‍රය නිකුත් කර උපාධිධාරින්ට ගුරු විභාගයට ඉල්ලුම් කිරීමට අවස්ථාව ලබාදීමට කටයුතු කරන බවත් මෙහි දී සඳහන් කෙරිණි. එසේ ම අවශ්‍ය කරන අනෙකුත් උපාධිධාරී බඳවාගැනීම් මේ වනවිට කැබිනට් අනුමැතිය ලැබී ඇති පරිදි ම සිදු කිරීමට අවශ්‍ය ක්‍රියාමාර්ග ගන්නා බවත් සඳහන් කෙරිණි.

එසේ ම ගුරු විභාගයට ඉල්ලුම් කිරීමේ වයස් සීමා සංශෝධනයට ලක් කරමින් එම වයස් සීමාව දීර්ඝ කිරීමටත් දැනට පවත්නා සියලු ගුරු පුරප්පාඩු සඳහා කඩිනමින් බඳවාගැනීම් සිදු කිරීමටත් මෙහි දී එකඟත්වය පළ විය.

– අග්‍රාමාත්‍ය ආචාර්ය හරිනි අමරසූරිය

නව අධ්‍යාපන ප්‍රතිසංස්කරණ පිළිබඳව අග්‍රාමාත්‍ය ආචාර්ය හරිනි අමරසූරිය හා විදුහල්පති සහ ගුරු සංගම් සමඟ පවත්වන ලද විශේෂ සාකච්ඡාවක් අධ්‍යාපන අමාත්‍යංශයේ දී පැවැත්වුණි. මෙහි දී නව අධ්‍යාපන ප්‍රතිසංස්කරණ පිළිබඳව විදුහල්පති සහ ගුරු සංගම් වෙත ඇති ගැටලු සහ නව ප්‍රතිසංස්කරණවල විෂය මොඩියුල සම්බන්ධව දීර්ඝව සාකච්ඡා විය.

එමෙන්ම අධ්‍යාපන අමාත්‍යශය, ජාතික අධ්‍යාපන ආයතනය සහ ජාතික අධ්‍යාපන කොමිසම ඇතුළු ආයතන අතර පැවතිය යුතු අනෙයෝන්‍ය සම්බන්ධතාවයේ වැදගත්කම සහ ඒ තුළින් අධ්‍යාපන ක්ෂේත්‍රය තුළ සිදුවන සංවර්ධනය සම්බන්ධව අවධාරණය කරන ලදී.

” මේ අධ්‍යාපන ක්‍රමය තුළින් පවතින විශමතාවය වෙනස් කිරිම අපට තිබෙන ප්‍රධාන අරමුණක්. ඒ අනුව දරුවන් පිරිසක් නොවෙයි සියලූම දරුවන්ට අපේ අධ්‍යාපන ක්‍රමය තුළ පිළිගත හැකි තැනකට එන්න පුලුවන් අධ්‍යාපන ක්‍රමයක් හදන එක අපේ මූලික ම පරමාර්ථයයි. ” යනුවෙන් අග්‍රාමාත්‍යවරිය වැඩිදුරටත් අදහස් ප්‍රකාශ කරමින් කියා සිටින ලදී.

තව ද මෙම නව අධ්‍යාපන ප්‍රතිසංස්කරණ වෙනුවෙන් වන විදුහල්පති සහ ගුරු සංගම්හි අදහස් හා යෝජනා ඉතාම වැදගත් වන බවත් ඉදිරියේ දී අධ්‍යාපන ප්‍රතිසංස්කරණ පිළිබඳව දිස්ත්‍රික් මට්ටමින් සියලු ගුරුවරුන් සමඟ සාකච්ඡා කිරීම වැදගත් බවත් අග්‍රාමාත්‍ය ආචාර්ය හරිනි අමරසූරිය ප්‍රකාශ කරන ලදී.

මෙම අවස්ථාව සඳහා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශ ලේකම් නාලක කළුවැව මහතා ඇතුළු අධ්‍යාපන අමාත්‍යංශ‍යේ සහ ජාතික අධ්‍යාපන අයතනයේ නිලධාරීන් ද විදුහල්පති සහ ගුරු සංගම් සාමාජිකයන් ද සම්බන්ධ විය.

මාධ්‍ය ඒකකය

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ප්‍රවාහන සුභසාධන සංගමය මගින් පස්වැනි වරටත් සංවිධානය කරන ලේ දන් දීමේ වැඩසටහන, 2025 අගෝස්තු 20 වන දින අධ්‍යාපන අමාත්‍යාංශ ඉසුරුපාය පරිශ්‍රයේදී පැවැත්විණි.

අග්‍රාමාත්‍ය, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය හරිනි අමරසූරිය මැතිනියගේ ප්‍රධානත්වයෙන් සහ අධ්‍යාපන හා උසස් අධ්‍යාපන නියෝජ්‍ය අමාත්‍ය මධුර සේනෙවිරත්න මහතා, සහ අධ්‍යාපන ලේකම්තුමාගේ සහභාගීත්වයෙන් ආරම්භ වූ අතර ශ්‍රී ජයවර්ධන පුර සහ අපේක්ෂා රෝහල් සඳහා අවශ්‍ය ලේ ප්‍රදානය කිරීම මෙම වැඩසටහනේ ප්‍රධාන අරමුණයි.

මාධ්‍ය ඒකකය.

කොළඹ දේශීය වෛද්‍ය පීඨයේ ශිෂ්‍ය ශිෂ්‍යාවන්ගේ සීමාවාසික පුහුණුව ප්‍රමාදවීම වළක්වා ගැනීම, නේවාසිකාගාර කළමනාකරණය, සම්පත් හිඟය ආදී ගැටලු රැසක් පිළිබඳ විසඳුම් ඉදිරිපත් කිරීමටත්, ඒ සඳහා ඉදිරි සාකච්ඡා පැවැත්වීමටත් එකඟතාව පළ කළ බව උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා පැවසී ය.

අමාත්‍යවරයා මේ බැව් පැවසූයේ 2025.08.12 වන දින කොළඹ දේශීය වෛද්‍ය පීඨයේ ශිෂ්‍ය නියෝජිතයන් පිරිසක් සමඟ කොළඹ 07, වෝඩ් පෙදෙස, උසස් අධ්‍යාපන අංශයේ පැවති සාකච්ඡාවකින් අනතුරු ව ය.

එහිදී තවදුරටත් අදහස් දැක්වූ අමාත්‍යවරයා,

සිසුන්ගේ සීමාවාසික පුහුණුව ප්‍රමාදයකින් තොරව සිදු කර ගැනීමට අධ්‍යාපන අමාත්‍යාංශය සහ සෞඛ්‍ය අමාත්‍යාංශය ඒකාබද්ධව කඩිනම් ක්‍රියාමාර්ගවලට යාමට බලාපොරොත්තු වෙනවා. ඒ වගේ ම මේ වන විට බොරැල්ල දේශීය වෛද්‍ය පීඨය සතුව පවතින නේවාසිකාගාර නිසි පරිදි කළමනාකරණය නොවීම, නේවාසිකාගාර නිසි පරිදි නඩත්තු නොකිරීම, නේවාසික ශිෂ්‍යයන් මුහුණ දෙන සුබසාධන ගැටලු, නේවාසිකගාර පහසුකම් ලබාදිය හැකි ව තිබිය දී කුලී නේවාසිකාගාර සඳහා විශාල මුදලක් වැය කිරීම ආදී ගැටලු ශිෂ්‍ය නියෝජිතයින් විසින් පෙන්වා දෙනු ලැබුවා. ඒ අනුව අපිට හැකියාව ලැබුණා පීඨයේ පරිපාලනය සමඟ සාකච්ඡා කරන්නට සහ අවශ්‍ය උපදෙස් අදාළ අංශ වෙත ලබා දෙන්නට. තවදුරටත් මේ පිළිබඳ සුවිශේෂ මැදිහත් වීමක් සිදු කරනමින් සිසුන්ගේ සුබසාධනය සහ අනෙකුත් ගැටලු ද ඉතා ඉක්මනින් විසඳීමට අපට හැකි වේවි.

ඉහළ යන ශිෂ්‍ය ලියාපදිංචියට සාපේක්ෂ ව භෞතික සහ මානව සම්පත් සංවර්ධනයක් සිදු කිරීමේ අවශ්‍යතාව සිසුන් විසින් මතු කරන ලද අතර රජයේ පාර්ශ්වයෙන් ඒ සඳහා ද කෙටි කාලයක් තුළ විසඳුම් ඉදිරිපත් කිරීමට අපිට හැකියාව ලැබේවි. විශේෂයෙන් ම විද්‍යාගාර පහසුකම්, පුස්තකාල පහසුකම්, අධ්‍යයන ශාලා පහසුකම්, ආපන ශාලා පහසුකම් සහ සනීපාරක්ෂක පහසුකම් සංවර්ධනය සඳහා අවශ්‍ය මැදිහත්වීම සිදු කරන්නටත් කටයුතු කරනවා.

මීට අමතර ව විෂය නිර්දේශයන්හි ඇති ගැටලුකාරී තත්ත්වයන්, සායනික පුහුණුව සම්බන්ධ ඇති ගැටලු, සීමාවාසික වෛද්‍ය පුහුණුව සම්බන්ධ මතු ව තිබෙන ගැටලු පිළිබඳ අධ්‍යාපන අමාත්‍යංශය, සෞඛ්‍ය අමාත්‍යංශය, කොළඹ විශ්වවිද්‍යාලය සහ පීඨ නියෝජිතයන්, ශිෂ්‍ය නියෝජිතයන් ඇතුළු සියලු ම පාර්ශ්වයන්ගේ සහභාගිත්වයෙන් සාකච්ඡා කිරීමට බලාපොරොත්තු වෙනවා. ඒ සම්බන්ධ පුළුල් සාකච්ඡාවක් ඇත්තට ම අවශ්‍ය යි. ඒ නිසා එම ගැටලුවලට විසඳුම් ඉදිරි කාලයේ දී ලබාදීමට අපට හැකියාව ලැබේවි. යනුවෙන් ද පැවසී ය.

මෙම අවස්ථාව සඳහා අමාත්‍යංශ නිලධාරීන් ඇතුළු පිරිසක් ද එක්වූහ.

– අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය

රැකියාවක් ඉලක්ක කරගනිමින් අධ්‍යාපනය ලබා දෙනවාට වඩා එහා ගිය පුලුල් දැක්මක් අධ්‍යාපන ක්ෂේත්‍රයට අවශ්‍ය බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසුවාය.

අධ්‍යාපන පරිපාලන සේවයේ නිලධාරීන්ගේ ධාරිතා සංවර්ධනය වෙනුවෙන් පසුගිය ජුනි 8 ^දින සිට 21 ^දින දක්වා ඉන්දියාවේ පැවති පුහුණු සැසිය නිමාකර මෙරටට පැමිණි අධ්‍යාපන පරිපාලන සේවයේ නිලධාරීන් සමග අධ්‍යාපන අමාත්‍යංශයේ පැවති සාකච්ඡාවකදී අග්‍රාමාත්‍යතුමිය මේ බව පැවසුවා ය.

දිවයිනේ සියලු පළාත් නියෝජනය වන පරිදි නිලධාරීන් දෙදෙනෙකු බැගින් මෙම පුහුණුව සඳහා තෝරාගෙන පැවති අතර පොදු රාජ්‍ය මණ්ඩලයීය ආසියානු ඉගෙනුම් මාධ්‍ය කේන්ද්‍රය විසින් මෙම පුහුණුව පැවැත් විය. මෙතෙක් කිසිදු විදේශ පුහුණුවක් නොලත් දිවයින පුරා සේවයේ නියුතු අධ්‍යාපන පරිපාලන සේවයේ නිලධාරීන් මෙම පුහුණුව සඳහා තොරා ගෙන තිබීම විශේෂත්වයකි.

ඉන්දියාවේදී ලද පුහුණුව අනුව මෙරට අධ්‍යාපන ක්ෂේත්‍රයේ සිදු විය යුතු වෙනස්කම් සහ එම පුහුණුව ලත් නිලධාරීන්ගෙන් ගුණාත්මක සේවාවක් අධ්‍යාපන ක්ෂේත්‍රයේ ගුණාත්මක සංවර්ධනය සඳහා යොදා ගැනීම මෙහි අරමුණ විය.

අධ්‍යාපන අමාත්‍යංශයේ විදේශ ආයතන සහ විදේශ කටයුතු ශාඛාව සංවිධානය කළ මෙම වැඩසටහනට අධ්‍යාපන අමාත්‍යංශයේ අතිරේක ලේකම් අමල් එදිරිසූරිය, විභාග දෙපාර්තමේන්තුව, ජාතික අධ්‍යාපන ආයතනය, අධ්‍යාපන ප්‍රතිසංස්කරණ ශාඛාව නියෝජනය කරන නිලධාරීන් පිරිසක් සහභාගී වුහ.

මාධ්‍ය ඒකකය.

ශ්‍රී ලංකා විභාග දෙපාර්තමේන්තුව අ.පො.ස.(උ.පෙළ) විභාගය – 2024 නැවත සමීක්ෂණ ප්‍රතිඵල මත 2025 අ.පො.ස.(උ.පෙළ) විභාගය සඳහා අයදුම් කිරීමට බලාපොරොත්තු වන හා 2025 අ.පො.ස. (උ.පෙළ) විභාගය සඳහා අයදුම් කිරීමට ලබා දී තිබූ කාල සීමාව තුල අයදුම් කිරීමට නොහැකි වූ අයදුම්කරුවන්ට 2025.08.07 දින සිට 2025.08.12 දින මධ්‍යම රාත්‍රී 12.00 දක්වා මාර්ගගත ක්‍රමය ඔස්සේ අයදුම්පත් ඉදිරිපත් කිරීමේ අවස්ථාව සලසා දෙනු ලැබේ.
එසේම මෙම සහන කාල සීමාව කිසිදු හේතුවක් මත තව දුරටත් දීර්ඝ කරනු නොලබන බව ද දන්වා සිටිමි.

මාධ්‍ය ඒකකය.

“2025 වර්ෂයේ රජයේ පාසල් හා රජයේ අනුමත පෞද්ගලික පාසල්වල සිංහල හා දෙමළ පාසල් සඳහා දෙවන පාසල් වාරය 2025.08.07 වන බ්‍රහස්පතින්දා දින අවසන් වන අතර තෙවන පාසල් වාරය 2025.08.18 වන සඳුදා දින ආරම්භ වේ.

මුස්ලිම් පාසල් සඳහා දෙවන පාසල් වාරය 2025.08.19 වන අඟහරුවාදා දින අවසන් වන අතර තෙවන පාසල් වාරය 2025.08.25 වන සඳුදා දින ආරම්භ වේ.

– අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය

පාසල් සමබන්ධව ලැබෙන පැමිණිලි නිවැරදිව හා කාර්යක්ෂමව විමර්ශනය කිරීම සඳහා අධ්‍යාපන, උසස් අධ්‍යාපන සහ වෘත්තිය අධ්‍යාපන අමාත්‍යංශයේ විමර්ශන අංශය අවශ්‍ය නිලධාරීන්ගේ පුරප්පාඩු සම්පූර්ණ කර ශක්තිමත් කරන ලෙසත්, පවතින විමර්ශන කඩිනම් කරන ලෙසත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසුවා ය.

පාර්ලිමේන්තුවේ කමිටු කාමර අංක එකෙහි ඊයේ (06) පැවති අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශයේ පාර්ලිමේන්තු උපදේශන කාරක සභාවේ සභාපතිනිය ලෙස මතු වූ ගැටලුවලට පිළිතුරු ලබා දෙමින් අග්‍රාමාත්‍යතුමිය මේ බව පැවසීය.

දසවැනි පාර්ලිමේන්තුව විසින් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශය වෙනුවෙන් පත් කළ පාර්ලිමේන්තු උපදේශන කාරක සභාවේ තෙවන වර රැස්වීම පාර්ලිමේන්තුවේදී ඊයේ පැවත් විණි.

එහිදී අධ්‍යාපන ප්‍රතිසංස්කරණය සමබන්ධයෙන් වන ගුරු පුහුණුව සහ අවශ්‍ය යටිතල පහසුකම් සංවර්ධනය කිරීම, පාසල් වල පවතින අඩුපාඩු සකස් කිරීම, තාවකාලික ගොඩනැගිලි තුළ පවත්නාගෙන යන පාසල් ස්ථිර ස්ථානයක යළි පිහිටුවීම, විශේෂ අවශ්‍යතා සහිත දරුවන්හට වෘත්තීය අධ්‍යාපන ප්‍රවේශය ලබා දීම සහ විශ්වවිද්‍යාල ප්‍රවේශය ලබා දීම, ගුරු, විදුහල්පති සහ ගුරු අධ්‍යාපනඥ සේවයේ පත්වීම් සහ ස්ථානමාරු ප්‍රතිපත්තිය නිසි ලෙස ක්‍රියාත්මක කිරීම ඇතුළු කාරණා රැසක් පිළිබඳව සාකච්ඡා කෙරිණ.

පත්වීම් ලබා දීමේදී මානුෂිය අවශ්‍යතා මෙන්ම පුරප්පාඩු පිළිබඳ සැලකිළිමත් වීම අවශ්‍ය බවත්, ස්ථාන මාරු කිරීම් සහ අනියුක්ත කිරීම් සිදු කිරීමේ දී අධ්‍යාපන පද්ධතිය තුළ ගැටලූ ඇති නොවන පරිදි සිදු කිරීම අවශ්‍ය බවත් අග්‍රාමිත්‍යතුමිය මෙහිදි පෙන්වා දුන්නාය. අධ්‍යාපන ක්ෂේත්‍රය සම්බන්ධයෙන් ලැබෙන පැමිණිලි කඩිනමින් විමර්ෂනය කරන ලෙස පාර්ලිමේන්තු මන්ත්‍රීවරුන් කළ ඉල්ලීම අනුව අධ්‍යාපන අමාත්‍යංශයේ විමර්ශන අංශයේ පවතින පුරප්පාඩු සම්පුර්ණ කර කඩිනමින් හා විනිවිදභාවයෙන් යුතුව විමර්ශන සිදු කිරීමට කටයුතු කරන ලෙසද විෂය භාර අමාත්‍යවරිය ලෙස අග්‍රාමාත්‍ය ආචාර්ය හරිනි අමරසූරිය පැවසුවා ය.

අධ්‍යාපන ප්‍රතිසංස්කරණ සම්බන්ධයෙන් පත් කරන ලද අනු කම්ටුවල ප්‍රගතිය පිළිබඳවද මෙහිදී අදාල කමිටු සභිපතිවරු කරුණු ඉදිරිපත් කළහ.

මෙම අවස්ථාවට අධ්‍යාපන සහ උසස් අධ්‍යාපන අමාත්‍ය වෛද්‍ය මධුර සෙනෙවිරත්න, වෘත්තීය අධ්‍යාපන අමාත්‍ය නලින් හේවගේ සහ මැති ඇමතිවරුන්, පාර්ලිමේන්තු නියෝජ්‍ය මහලේකම් චමින්ද කුලරත්න, අධ්‍යාපන අමාත්‍යංශයේ ලේකම් නාලක කලුවැව ඇතුළු අධ්‍යාපන අමාත්‍යංශයේ නිලධාරීන් ඇතුළු පිරිසක් මෙම අවස්ථාවට සහභාගී වූහ.

මාධ්‍ය ඒකකය

– අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය

විශ්වවිද්‍යාලවලට ඇතුලත් වන දරුවන්ගේ ආරක්ෂාව, සුබ සාධන පහසුකම් සැපයීම සහ ඉගෙනුම් පහසුකම් පිලිබඳ විශ්වවිද්‍යාල වගකීමෙන් කටයුතු කළ යුතු බව අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය පැවසුවා ය.

යාපනය විශ්වවිද්‍යාලයේ උපකුලපති අතුළු අධ්‍යයන, අනධ්‍යය සේවකයින් අචාර්ය මණ්ඩලය සහ සිසුන් සමග අද (03) යාපනය විශ්වවිද්‍යාලයේ කිලිනොච්චි මණ්ඩපයේ පැවති සාකච්ඡාවකදී අග්‍රාමාත්‍යවරිය මේ බව පැවසීය.

විශ්වවිද්‍යාලයේ සිසුන් මුහුණ දෙන නේවාසික පහසුකම්, ජලය, විදුලිය ඇතුළු සුභසාධන පහසුකම් පිලිබඳ මෙහිදී අග්‍රාමාත්‍යතුමියගේ අවධානය යොමු වූ අතර මෙතෙක් විසඳා ගැනීමට කටයුතු නොකළ සිසුන්ගේ පානිය ජල ගැටලුව මසක් ඇතුළත විසඳීමට කටයුතු කරන ලෙස දිස්ත්‍රික් සංවර්ධන කමිටුවේ නිරන්තර අධික්ෂණය ඒ වෙනුවෙන් යොමු කරන ලෙසත් අග්‍රාමාත්‍යවරිය මෙහිදී පැවසීය.

වැඩිදුරටත් අදහස් දැක් වූ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය මෙසේද කීය,

උසස් පෙළ සමත්වෙලා වසරකට සිසුන් 40,000ක් රජයේ විශ්ව විද්‍යාලවලට ඇතුළත් වෙනවා. ඒ දරුවන්ගේ ආරක්ෂාව, සුභසාධනය සහ ඉගෙනුම් පහසුකම් නිසි පරිදි ලබාදීමට විශ්වවිද්‍යාල වගකීමෙන් කටයුතු කළ යුතුයි.

සාම්ප්‍රදායික උපාධියක් ලබාගෙන විශ්වවිද්‍යාලයෙන් පිටවන දරුවට අනාගත ජීවිතය පිළිබඳ විශ්වාසයක් ඇතිවිය යුතුයි. ඒ වගේම විශ්ව විද්‍යාල ගුණාත්මක ලෙස පශ්චාත් උපාධිය ලබා දෙන පර්යේෂණ ආයතනයක් ලෙස සංවර්ධනය කිරීම ඉතා වැදගත්.

විශ්වවිද්‍යාල තුළ දරුවන්ට සිදුවන විවිධ හිරිහැර, ලිංගික අඩත්තේට්ටම්, අපරාධ, බලපෑම් වගේම ප්‍රචණ්ඩත්වය වහාම නතර විය යුතුයි. ඒ වෙනුවෙන් රජය විදිහට ගතහැකි උපරිම ක්‍රියාමාර්ග ගන්න අපි සූදානම්.

විශ්වවිද්‍යාල දරුවන් විනයක් ඇතිව තමන්ට ලැබෙන නිදහස භුක්ති විඳින්න කටයුතු කිරීමත් වැදගත්, නමුත් ඔවුන්ගේ නිදහස අනවශ්‍ය ලෙස සීමා කිරීම සුදුසු නෑ.

අපේ විශ්වවිද්‍යාල පද්ධතියේ පීඨ, සහ පහසුකම් විවිධ අයුරින් වර්ධනය කරනවා අපි දකිනවා නමුත් දරුවන්ට තමන්ගේ ඉගෙනීම් කටයුතු කරගෙන යාමට අදාල පීඨ වල පහසුකම් තියෙනවද කියන ප්‍රශ්නය තිබෙනවා.

යාපනය විශ්වවිද්‍යාලයේ සිසුන්ගේ ආරකෂාව සහ පානීය ජල ගැටලුව සඳහා කඩිනමින් පියවර ගන්න අවශ්‍යයි.

විශ්වවිද්‍යාල සිසුන් සහ විශ්විද්‍යාල පරිපාලනය නිරන්තර සහයෝගයෙන් එකඟතාව මත කටයුතු කිරීමට වගබලාගත යුතු බවද අග්‍රාමාත්‍ය ආචාර්ය හරිනි අමරසූරිය පැවසුවා ය.

නියෝජ්‍ය අමාත්‍ය උපාලි සමරසිංහ, පාර්ලිමේන්තු මන්ත්‍රීවරුන් සහ යාපනය විශ්වවිද්‍යාලයේ උපකුලපති සිවකුලුන්දු සත්ගුණරාජා ඇතුළු පීඨාධිපතිවරුන්, අධ්‍යයන අනධ්‍යන සේවකයින් සහ විශ්වවිද්‍යාල සිසුන් මෙම අවස්ථාවට සහභාගී විය.

මාධ්‍ය ඒකකය

නව අධ්‍යාපන ප්‍රතිසංස්කරණය පිළිබඳව විශ්වවිද්‍යාල ආචාර්යවරුන්ගේ  සංගමය ඇතුළු  සියලූ විශ්වවිද්‍යාල නියෝජනය කරන ආචාර්යවරුන්  දැනුවත් කිරීම වෙනුවෙන් පැවති සාකච්ඡාව ජුලි 30 දින අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යංශයේදී අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් පැවැත් විය.

නව අධ්‍යාපන ප්‍රතිසංස්කරණය සම්බන්ධව මෙහිදී අග්‍රාමාත්‍යතුමිය විසින් විශ්වවිද්‍යාල ආචාර්යවරුන් දැනුවත් කිරීම සිදු කළාය.

නව අධ්‍යාපන ප්‍රතිසංස්කරණ මගින් සිදු කරන විෂයමාලා ප්‍රතිසංස්කරණ, ඩිජිටල් තාක්ෂණය භාවිත කිරීම, මොඩියුල් සහ ක්‍රියාකාරකම් ඇතුළු සමස්ත අධ්‍යාපන ප්‍රතිසංස්කරණය සම්බන්ධව විශ්වවිද්‍යාල ආචාර්ය සංගමය සිය අදහස් පල  කළේය.

එහිදී ඉදිරිපත් වූ නව යෝජනා සහ අදහස් පිළිබඳ අග්‍රාමාත්‍යතුමියගේ අවධානය යොමු වූ අතර නව අධ්‍යාපන ප්‍රතිසංස්කරණය සම්බන්ධයෙන් ලබා දෙන නව අදහස් පිළිබඳ අග්‍රාමාත්‍යවරිය ඇගයීමට ලක් කළාය.

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශයේ ලේකම් නාලක කළුවැව ඇතුළු රාජ්‍ය නිලධාරීන්, විශ්වවිද්‍යාල ආචාර්යවරුන්ගේ සංගමයේ නියෝජිතයින් මෙම අවස්ථාවට සහභාගී විය.

මාධ්‍ය ඒකකය.

පිරිවෙන් අධ්‍යාපනයට දීර්ඝ ඉතිහාසයක් පවතින බවත් එම ඉතිහාසය සහ සම්ප්‍රදාය රැකගනිමින් ලෝකය තුළ ස්වාමීන් වහන්සේලා වෙත සුවිශේෂී කාර්යභාරයක් ඉටු කිරීමට සිදුවී ඇති බව හා එම කාර්යය මැනවින් ඉටුකිරීමට අවශ්‍ය පිරිවෙන් අධ්‍යාපනයක් ගොඩනැගීම අවශ්‍ය බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යවරිය පැවසුවාය.

බත්තරමුල්ල ඉසුරුපාය අධ්‍යාපන අමාත්‍යංශයේ දී ජුලි 30 ^දින පැවති 203 ^වන පිරිවෙන් අධ්‍යාපන මණ්ඩලයෙන් අනුමත නවක පරිවේණාචාර්ය පත්වීම් ලිපි ප්‍රධානෝත්සවයට සහභාගී වෙමින් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මේ බව පැවසුවාය.

මෙහිදී පරිවේණාචාර්යවරුන් 273 දෙනෙකු සඳහා පත්වීම් ලිපි ප්‍රදානය සිදු කෙරිණි.

මෙහිදී අදහස් දැක්වූ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය,

“අද දවසේ අපේ ස්වාමීන්වහන්සේලාට බුද්ධාගම තුළ පැවරිලා තියෙන්නේ විශේෂ කාර්යය භාර්යයක්. සාම්ප්‍රදානුකූලව, චාරිත්‍රානුකූලව කරගෙන ආපු ඒ වැඩ කොටස, ඒ විශාල සේවය වගේම අද අපි ලෝකයටම විවෘත වෙලා තියෙනවා. බුදුදහමේ ඉගැන්වීම්, දර්ශනය හා එහි අන්තර්ගතය පිළිබඳ ලෝකයම අවධානයෙන් ඉන්නේ.

එනිසා අපේ ස්වාමීන්වහන්සේලා ලෝකය සමග සම්බන්ධ වෙන්න ඕනේ. ලෝකය තුළ අද සිදුවන වෙනස්වීම් හා සමාජ ආර්ථික තත්ත්වයන් තුළ බුදුදහමේ කාර්යභාර්ය වෙනදාටත් වඩා සුවිශේෂී සහ අත්‍යවශ්‍යයි.

ඒ සන්දර්භය තුළ අපි මොන වගේ ගුරු භවතුන් මොනවගේ පිරිවෙන් අධ්‍යාපනයක් ද නිර්මාණය කළ යුත්තේ කියන එක ගැන අපිට හොදින් සිතන්න වෙනවා සහ එය අපේ ඉතිහාසය සහ සම්ප්‍රදායන් රැක ගන්නා අතර අදට ගැලපෙන ඒ භික්ෂූන් වහන්සේලාට පැවරෙන විශේෂ කර්යාභාරයටත් අපි සූදානම් විය යුතුයි.

ඔබවහන්සේලා සියලුදෙනාට සුවිශේෂී අභියෝගයක් තියෙනවා. ඉගැන්වීම පමණක් නෙමෙයි අපේ බුදු දහම රකින ඒ සංඝ පරපුර නිර්මාණය කරන එක සුවිශේෂී කාර්යභාරයක්. බුදුදහම තුළ උගන්වන ඒ දර්ශනය තුළ පවතින ප්‍රායෝගික බව, විනය, ශික්ෂණය කියලා දෙන එක විතරක් නෙමෙයි ඒක අපේ ක්‍රියාවෙන් පෙන්නුම් කරන්නත් වෙනවා. එහිදී දැනුම සහ අධ්‍යාපනයට එහා ගිය වගකීමක් ඔබ වහන්සේලා සියලු දෙනාටම තියෙනවා.

මේ වෙනකොට විශාල කතාබහකට ලක් වෙන ඒ අපේ අධ්‍යාපන ක්‍රමය, පරිවර්තනයකට අපි භාජනය කරන්න සූදානම් වෙන මොහොතේ ඒක කොහොමද පිරිවෙන් අධ්‍යාපනයටත් ගලපා ගන්නේ කියන එක ගැන අපට යම් සංවාදයක් සාකච්ඡාවක් අවශ්‍ය වෙනවා.” යැයි අග්‍රාමාත්‍යවරිය පැවසීය.

මෙම අවස්ථාවට පිරිවෙන් අධ්‍යාපන අධ්‍යක්ෂ රාජකීය පණ්ඩිත ආචාර්ය කුඹල්ගොඩ ධම්මාලෝක ස්වාමීන් වහන්සේ ප්‍රධාන මහා සංඝරත්නය හා අධ්‍යාපන අමාත්‍යංශයේ ලේකම් නාලක කලුවැව මහතා ඇතුළු නිලධාරින් පිරිසක් සහභාගී වූහ.

මාධ්‍ය ඒකකය