-
නව අධ්‍යාපන ප්‍රතිසංස්කරණය පිළිබඳව විශ්වවිද්‍යාල ආචාර්යවරුන්ගේ සංගමය දැනුවත් කරයි…
නව අධ්‍යාපන ප්‍රතිසංස්කරණය පිළිබඳව විශ්වවිද්‍යාල ආචාර්යවරුන්ගේ සංගමය ඇතුළු සියලූ විශ්වවිද්‍යාල නියෝජනය කරන ආචාර්යවරුන් දැනුවත් කිරීම වෙනුවෙන් පැවති සාකච්ඡාව ජුලි 30 දින අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යංශයේදී අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් පැවැත් විය.
නව අධ්‍යාපන ප්‍රතිසංස්කරණය සම්බන්ධව මෙහිදී අග්‍රාමාත්‍යතුමිය විසින් විශ්වවිද්‍යාල ආචාර්යවරුන් දැනුවත් කිරීම සිදු කළාය.
නව අධ්‍යාපන ප්‍රතිසංස්කරණ මගින් සිදු කරන විෂයමාලා ප්‍රතිසංස්කරණ, ඩිජිටල් තාක්ෂණය භාවිත කිරීම, මොඩියුල් සහ ක්‍රියාකාරකම් ඇතුළු සමස්ත අධ්‍යාපන ප්‍රතිසංස්කරණය සම්බන්ධව විශ්වවිද්‍යාල ආචාර්ය සංගමය සිය අදහස් පල කළේය.
එහිදී ඉදිරිපත් වූ නව යෝජනා සහ අදහස් පිළිබඳ අග්‍රාමාත්‍යතුමියගේ අවධානය යොමු වූ අතර නව අධ්‍යාපන ප්‍රතිසංස්කරණය සම්බන්ධයෙන් ලබා දෙන නව අදහස් පිළිබඳ අග්‍රාමාත්‍යවරිය ඇගයීමට ලක් කළාය.
අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යංශයේ ලේකම් නාලක කළුවැව ඇතුළු රාජ්‍ය නිලධාරීන්, විශ්වවිද්‍යාල ආචාර්යවරුන්ගේ සංගමයේ නියෝජිතයින් මෙම අවස්ථාවට සහභාගී විය.
මාධ්ය ඒකකය.
-
වර්තමාන ලෝකය තුළ අපේ ස්වාමීන්වහන්සේලා වෙත පැවරිලා තියෙන ඒ සුවිශේෂී කාර්යය භාර්ය මැනවින් ඉෂ්ට කරන්න පුළුවන් විදිහේ අධ්‍යාපනයක් පිරිවෙන් අධ්‍යාපනය තුළ ගොඩ නගන්න වෙනවා.
– අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය
පිරිවෙන් අධ්‍යාපනයට දීර්ඝ ඉතිහාසයක් පවතින බවත් එම ඉතිහාසය සහ සම්ප්‍රදාය රැකගනිමින් ලෝකය තුළ ස්වාමීන් වහන්සේලා වෙත සුවිශේෂී කාර්යභාරයක් ඉටු කිරීමට සිදුවී ඇති බව හා එම කාර්යය මැනවින් ඉටුකිරීමට අවශ්‍ය පිරිවෙන් අධ්‍යාපනයක් ගොඩනැගීම අවශ්‍ය බව අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යවරිය පැවසුවාය.
බත්තරමුල්ල ඉසුරුපාය අධ්‍යාපන අමාත්‍යංශයේ දී ජුලි 30 දින පැවති 203 වන පිරිවෙන් අධ්‍යාපන මණ්ඩලයෙන් අනුමත නවක පරිවේණාචාර්ය පත්වීම් ලිපි ප්‍රධානෝත්සවයට සහභාගී වෙමින් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මේ බව පැවසුවාය.
මෙහිදී පරිවේණාචාර්යවරුන් 273 දෙනෙකු සඳහා පත්වීම් ලිපි ප්‍රදානය සිදු කෙරිණි.
මෙහිදී අදහස් දැක්වූ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය,
“අද දවසේ අපේ ස්වාමීන්වහන්සේලාට බුද්ධාගම තුළ පැවරිලා තියෙන්නේ විශේෂ කාර්යය භාර්යයක්. සාම්ප්‍රදානුකූලව, චාරිත්‍රානුකූලව කරගෙන ආපු ඒ වැඩ කොටස, ඒ විශාල සේවය වගේම අද අපි ලෝකයටම විවෘත වෙලා තියෙනවා. බුදුදහමේ ඉගැන්වීම්, දර්ශනය හා එහි අන්තර්ගතය පිළිබඳ ලෝකයම අවධානයෙන් ඉන්නේ.
එනිසා අපේ ස්වාමීන්වහන්සේලා ලෝකය සමග සම්බන්ධ වෙන්න ඕනේ. ලෝකය තුළ අද සිදුවන වෙනස්වීම් හා සමාජ ආර්ථික තත්ත්වයන් තුළ බුදුදහමේ කාර්යභාර්ය වෙනදාටත් වඩා සුවිශේෂී සහ අත්‍යවශ්‍යයි.
ඒ සන්දර්භය තුළ අපි මොන වගේ ගුරු භවතුන් මොනවගේ පිරිවෙන් අධ්‍යාපනයක් ද නිර්මාණය කළ යුත්තේ කියන එක ගැන අපිට හොදින් සිතන්න වෙනවා සහ එය අපේ ඉතිහාසය සහ සම්ප්‍රදායන් රැක ගන්නා අතර අදට ගැලපෙන ඒ භික්ෂූන් වහන්සේලාට පැවරෙන විශේෂ කර්යාභාරයටත් අපි සූදානම් විය යුතුයි.
ඔබවහන්සේලා සියලුදෙනාට සුවිශේෂී අභියෝගයක් තියෙනවා. ඉගැන්වීම පමණක් නෙමෙයි අපේ බුදු දහම රකින ඒ සංඝ පරපුර නිර්මාණය කරන එක සුවිශේෂී කාර්යභාරයක්. බුදුදහම තුළ උගන්වන ඒ දර්ශනය තුළ පවතින ප්‍රායෝගික බව, විනය, ශික්ෂණය කියලා දෙන එක විතරක් නෙමෙයි ඒක අපේ ක්‍රියාවෙන් පෙන්නුම් කරන්නත් වෙනවා. එහිදී දැනුම සහ අධ්‍යාපනයට එහා ගිය වගකීමක් ඔබ වහන්සේලා සියලු දෙනාටම තියෙනවා.
මේ වෙනකොට විශාල කතාබහකට ලක් වෙන ඒ අපේ අධ්‍යාපන ක්‍රමය, පරිවර්තනයකට අපි භාජනය කරන්න සූදානම් වෙන මොහොතේ ඒක කොහොමද පිරිවෙන් අධ්‍යාපනයටත් ගලපා ගන්නේ කියන එක ගැන අපට යම් සංවාදයක් සාකච්ඡාවක් අවශ්‍ය වෙනවා.” යැයි අග්‍රාමාත්‍යවරිය පැවසීය.
මෙම අවස්ථාවට පිරිවෙන් අධ්‍යාපන අධ්‍යක්ෂ රාජකීය පණ්ඩිත ආචාර්ය කුඹල්ගොඩ ධම්මාලෝක ස්වාමීන් වහන්සේ ප්‍රධාන මහා සංඝරත්නය හා අධ්‍යාපන අමාත්‍යංශයේ ලේකම් නාලක කලුවැව මහතා ඇතුළු නිලධාරින් පිරිසක් සහභාගී වූහ.
මාධ්ය ඒකකය
-
ප්‍රතිසංස්කරණය 2026 වසරේ ක්‍රියාතමක වෙන්නේ 1 වසර සහ 6 වසරට, මූලික ප්‍රමුඛතාව ඒ වෙනුවෙන් ලබා දෙනවා.
ගුරුවරයා කතාකරන දරුවන් අහගෙන ඉන්න සාම්ප්‍රදායික ක්‍රමයට විනාඩි 50ක කාල පරිච්ඡේද දිහා බලන්න එපා,
මාලිමා රජය මොඩියුල් වලට පේටන්ට් ගන්න බලාපොරොත්තුවක් නැහැ, මෙිඩියුල් ක්‍රමය ලෝකයේ පවතින ක්රමවේදයක්අධ්යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය,
2026 වසර තුළ 1 වසරට සහ 6 වසරට පමණක් නව අධ්‍යාපන ප්‍රතිසංස්කරණය හදුන්වා දෙන බැවින් මූලික ප්‍රමුඛතාව ඒ වෙනුවෙන් ලබා දෙන බවත්, ගුරුවරයා කතාකරමින් දරුවන් අසා සිටින සම්ප්‍රදායික ඉගෙනුම් ක්‍රියාවලියේ සිට විනාඩි 50 කාලපරිච්ඡේද විවේචනය නොකරන ලෙසත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසුවාය.
නව අධ්‍යාපන ප්‍රතිසංස්කරණ සම්බන්ධයෙන් සබරගමුව පලාත් අධ්‍යාපන බලධාරීන් දැනුවත් කිරීම වෙනුවෙන් අද (26) රත්නපුර දිස්ත්‍රික් ලේකම් කාර්යාලයේ පැවති වැඩසටහනේදී අග්‍රාමාත්‍යතුමිය මේ බව සඳහන් කළාය.
මෙහිදී වැඩිදුරටත් අදහස් දැක් වූ අග්‍රාමාත්‍ය ආචාර්ය හරිනි අමරසූරිය මෙසේද කීය,
පවතින අධ්‍යාපන ක්‍රමය සියයට සියයක් වැරදියි කියලා අපි කියන්නේ නැහැ, ඒ තුලින් විශිෂ්ඨයන් බිහි වුණා. නමුත් වසරකට දරුවන් විශාල ප්‍රමාණයක් අතර මගින් හැලෙනවා. ඒ අය ගැන කාගෙවත් අවධානයක නැහැ. නව අධ්‍යාපන ප්‍රතිසංස්කරණය මෙතෙක් පැවති විෂය මාලා සංවර්ධනයට එහා ගිය සමස්ත ව්‍යුහයම ප්‍රතිසංස්කරණය කිරීමක් සිදු කරන්නේ.
2026 සිට මේ ක්‍රමය හදුන්වා දෙන්නේ 1 වසරට සහ 6 වසරට ඒ වෙනුවෙන් මුලික ප්‍රමුඛතාව ලබා දෙනවා. අදියරෙන් අදියර ඉදිරි ප්‍රතිසංස්කරණය සිදු කරනවා. අධ්‍යාපන කාර්යය තුළ තීරණාත්මක සාධකය ගුරුවරයායි. ගුරු හිඟය විසඳීමට නිවැරදිව ගුරු මාරු ප්‍රතිපත්තිය ක්‍රියාත්මක කිරීම, ගුරු තුළනය නිසි පරිදි සිදු කළ යුතුයි.
සබරගමුව පළාතේ දරුවන් 10ට අඩු පාසල් තිබෙනවා. සමහර පාසල්වල එක ගුරුවරයෙකුට ළමයි ගණන 5යි. මේ තත්වය නිවැරදි විය යුතුයි. ජාතික සහ පලාත් පාසල් අතර ගුරු මාරුව පිලිබඳව මේ වනවිට අමාත්‍යංශය සාකච්ඡා කරමින් යනවා ඉදිරියේදී ඒ පිලිබඳ තිරණයක් ගන්න කටයුතු කරනවා.
2024 අධ්‍යාපන අමාත්‍යංශය කළ සංගණනයකින් හෙළි වුණා ළමුන් 20,000ක් අධ්‍යාපනයෙන් අතරගම නතරවෙලා තිබෙනවා අදටත් ඒ දරුවන්ට සිද්ධ වුණු දේ ගැන කිසි තොරතුරක් නැහැ. ඒ වගෙිම 80,000ක් දරුවන් හරියට පාසලට පැමිණ නැහැ මේක ලොකු ගැටලුවක්,
මේ වෙනකොට අධ්‍යාපන පද්ධතිය දුවන්නේ සුළු පිරිසකගේ කැපවීම මත පුද්ගලයෙක් මත අධ්‍යාපන පද්ධතිය ක්‍රියාත්මක වෙන්න බැහැ, පද්ධතියක් විදිහට ශක්තිමත්ව පැවතිය යුතුයි.
මේ වනවිට කාලපරිච්ඡේදය විනාඩි 50ක් දක්වා දීර්ඝ කිරීම ගැන යම් විවාදයක් මතු කරමින් තිබෙනවා, සාම්ප්‍රදායික ඉගෙන්වීම් ක්‍රියාවලියේ සිට මේ කාලය තීරණය කරන්න යන්න එපා. ගුරුවරු කතා කරන දරුවන් අහගෙන ඉන්න ක්‍රමය නෙමෙයි නව ප්‍රතිසංස්කරණයෙන් හදුන්වා දෙන්නේ. ප්‍රායෝගිකව දරුවන් සහභාගී කරවන ක්‍රමවේදයක්.
මොඩියුල් ක්‍රමය හදුන්වා දෙන්නේ මාලිමා රජය මොඩියුල්වලට පේටන්ට් ගන්න නෙමෙයි, ඒක ලෝකයේ භාවිත කරන ක්‍රම වේදයක්,
මෙතෙක් කලක් පැවති රජයන් අධ්‍යාපනය භාවිත කළේ තමන්ගේ නම ප්‍රචාරය කරගැනීමට බවත්, ඡන්දය ලබාගැනීමේ අරමුණින් දරුවන් පාසලට ඇතුලත් කිරීම හේතුවෙන් අධ්‍යාපනය තවත් අවුලට ගිය බවත් ඒ තත්වය මේ වනවිට වෙනස් කර ඇති බවද අග්‍රාමාත්‍ය ආචාර්ය හරිනි අමරසූරිය පැවසුවාය,
මෙහිදී අදහස් දැක් වූ අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා,
සමහරු චෝදනා කරනවා අපි කිසියම් පිරිසකගේ උවමනාවට අධ්‍යාපන ප්‍රතිසංස්කරණය කරනවා කියලා විශේෂඥයින්ගේ දැනුම යොදාගෙන නැහැ කියලා ඒක අපි සම්පූර්ණයෙන් බැහැර කරනවා. අපි කාගෙවත් උවමනාවට නෙමෙයි ජාතික අවශ්‍යතාවක් අනුවයි මේ ප්‍රතිසංස්කරණය සිදු කරන්නේ ඔවුන් සමාජ මාධ්ය වල ප්‍රචාරය කරන තොරතුරු සහ නව අධ්‍යාපන ප්‍රතිසංස්කරණය අතර කිසිදු සම්බනධයක් නැහැ කියන කාරණය අපි වගකීමෙන් කියනවා.
මෙම අවස්ථාවට සබරගමුව පළාත් ආණ්ඩුකාර චම්පා ජානකී රාජරත්න, රත්නපුර දිස්ත්‍රීක් සංවර්ධන කමිටු සභාපති ශාන්ත පද්මකුමාර ඇතුළු පාර්ලිමේන්තු මන්ත්‍රීවරුන්, අධ්‍යාපන අමාත්‍යංශයේ ලේකම් නාලක කලුවැව, අධ්‍යාපන අමාත්‍යංශය,ජාතික අධ්‍යාපන, ආයතනය, විභාග දෙපාර්තමේන්තුව නියෝජනය කරන නිලධාරීන් සබරගමුව පලාත් අධ්‍යාපන බලධාරීන් විශාල පිරිසක් සහභාගී වූහ.
මාධ්ය ඒකකය
-
ශිෂ්‍ය පාර්ලිමේන්තුව ඉදිරිපත් කරන සාධනීය යෝජනා නව අධ්‍යාපන ප්‍රතිසංස්කරණයට ඇතුළු කරන්න සූදානම්.
මගේ ළමා කාලය ගැන කතා කරනවා වෙනුවට දරුවන්ට සුන්දර ළමා කාලයක් උරුම කර දෙන්න කටයුතු කරනවා…
අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය
ශිෂ්‍ය පාර්ලිමේන්තුව ඉදිරිපත් කරන සාධනීය යෝජනා නව අධ්‍යාපන ප්‍රතිසංස්කරණයට ඇතුළු කරන්න සූදානම් බවත්, තම ළමා කාලය ගැන කතා කරනවා වෙනුවට දරුවන්ට සුන්දර ළමා කාලයක් උරුම කර දීමට කටයුතු කරන බවත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය පැවසුවාය.
රත්නපුර සීවලී මධ්‍ය විද්‍යාලයේ ශිෂ්‍ය පාර්ලිමේන්තුවේ පස්වන සැසිවාරය නැරඹිමෙන් අනතුරුව අද (26) පෙරවරුවේ අග්‍රාමාත්‍යවරිය වේ බව පැවසීය.
” වත්මන් පාසල් අධ්‍යාපන ප්‍රතිසංස්කරණ මඟින් ලොව දකින දරුවන් අනාගත ගෝලීය අභියෝග ජයගැනීමට සුදානම් ද ? යන තේමාව යටතේ ශිෂ්‍ය පාර්ලිමේන්තුවේදී විවාදයට ගැනුණ අතර පාර්ලිමේන්තු සභාවාරය අවසානයේ දරුවන් වෙනුවෙන් සහතිකපත් ප්‍රදානය අග්‍රාමාත්‍යතුමිය අතින් සිදු කෙරිණ .
එහිදී වැඩි දුරටත් අදහස් දක්වමින් අග්‍රාමාත්‍ය ආචාර්ය හරිනි අමරසූරිය මෙසේද කීය,
නව අධ්‍යාපන ප්‍රතිසංස්කරණ පිලිබඳව වැඩිහිටියන්ට වඩා හොදින් ශිෂ්‍ය පාර්ලිමේන්තුවේ දරුවන් තේරුම් අරගෙන තියෙනවා. ඔවුන් අධ්‍යාපන ප්‍රතිසංස්කරණය හොදින් විශ්ලේෂණය කරලා තිබුණා. එහි තිබෙන හොඳ නරක අභියෝග ශිෂ්‍ය පාර්ලිමේන්තුවේ ඔබ ඉතාමත්ම දක්ෂ විදියක් ඉදිරිපත් කළා. මම ඇත්තටම යෝජනා කරනවා ඔබත් මේ ගැන කතා කරන්න, මේ අධ්‍යාපන ප්‍රතිසංස්කරණය අමාත්‍යංශයේ ඉන්න නිලධාරින්ගේ හෝ අමාත්‍යවරු විතරක් හදන දෙයක් වෙන්න බෑ. මේ අධ්‍යාපන ප්‍රතිසංස්කරණ කියන්නේ රටක ඇතිවෙන සංවාදයක් තුළ අපි එකතුවෙලා නිර්මාණය කරගත යුතු දෙයක් දෙයක්. ඒකට සෘජුවම මේ රටේ තරුණ පරපුර, සිසු සිසුවියන් සම්බන්ධ විය යුතුයි.ඒ නිසා මම ඔබ සියලු දෙනාටම ආරාධනා කරනවා. ඔබ පාර්ලිමේන්තු විශේෂ සැසිවාරයක් තියලා හරි අධ්‍යාපන ප්‍රතිසංස්කරණ ගැන ඔබේ වයසේ අනිත් ශිෂ්‍යයා ශිෂ්‍යාවන්ගෙන් අදහස් යෝජන අරගෙන අපිට එවන්න ඒවා අපිට හරිම වැදගත්.
මට පාසලේ සිසුවියක් පරිසර හිතකාමී සැලසුම් ව්‍යාපෘතියක් භාරදුන්නා ඒ උත්සාහයන් ගොඩාක් වටිනවා.
ශිෂ්‍ය පාර්ලිමේන්තුවේ මෙතන විවාදයේදි එක අමාත්‍යවරියක් කළ කතාවක් මට ඉතා තදින් දැනුණා. ඒ තමයි ළමා කාලයේ සුන්දරත්වය ගැන කථා කරන වැඩිහ්ටියන් අපේ ළමා කාලය විනාශ කරනවා කියලා. මම අද තීරණය කළා ආපසු මගේ ළමා කාලය ගැන මම දරුවන් ඉදිරියේ කතා කරන්නේ නැහැ ඒ වෙනුවට මේ රටේ දරුවන්ට සුන්දර ළමා කාලයක් උරුම කර දෙන්න කටයුතු කරනවා.
ඒ වගේම ඔබ සියලු දෙනා ශිෂ්‍ය පාර්ලිමේන්තු සැසිවාරය කළමනාකරණය කළ ආකාරය, ඒ තුළ කතා කරපු විදිහ දැක්කම ඒක අහගෙන ඉන්නකොට හිතටත් පුදුම සතුටක් හරිම ආඩම්බරයක් දැනුනා රට ගැන විශ්වාසයක් ඇතිවුණා. අනාගත පරපුර දියුණුයි අනාගත පරිපුර හරිම දක්ෂයි කියලා.
විදුහල්පතිතුමා ඇතුළු ගුරු බවතුන්ටත්, දෙමව්පියන්ටත් මෙවැනි දරු පරපුරක් බිහිකිරීම පිළිබඳව ස්තුතිවන්ත වන බව අග්‍රාමාත්‍ය ආචාර්ය හරිනි අමරසූරිය පැවසුවාය.
බෞද්ධ කටයුතු, ආගමික සහ සංස්කෘතික කටයුතු අමාත්‍ය හිනිදුම සුනිල් සෙනෙවි, සබරගමුව පළාත් ආණ්ඩුකාර චම්පා ජානකී රාජරතන , පාර්ලිමේන්තු මන්ත්‍රීවරුන් වන ශාන්ත පද්ම කුමාර, සුනිල් රජපක්ෂ, වෛද්‍ය ජනක, පළාත අධ්‍යාපන අධ්‍යක්ෂකතුමිය, දිස්ත්‍රික්කයේ අධ්‍යාපන බලධාරීන්, සීවලි මධ්‍ය විද්‍යාලයේ විදුල්පති කපිතාන් නීල් ධම්මික වතුකාරවත්ත ඇතුළු විදුහල්පතිවරුන්, ගුරුවරුන්, දෙමාපියන් සහ දූදරුවන් මෙම අවස්ථාවට සහභාගී වී සිටියහ.
මාධ්ය ඒකකය
-
විභාගය සමත් අසමත් බව මත අපි අධ්‍යාපනය මනින්න පුරුදු වෙලා තියෙනවා. ඒ ක්‍රමය වෙනස් කරන්න තමයි අපි මේ මොඩියුල ක්‍රමය හඳුන්වා දීලා තියෙන්නේ. ඒ ක්‍රමය තුළින් දරුවාට ගුණාත්මක අධ්‍යාපනයක් ලබා දීමයි අපේ අරමුණ.
-අධ්‍යාපන උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය-
විභාගය සමත් අසමත් බව මත අපි අධ්‍යාපනය මැනීමට පුරුදු වී ඇති බවත් , ඒ ක්‍රමය වෙනස් කිරීමට මොඩියුල ක්‍රමය හඳුන්වා දී ඇති බවත් , ඒ ක්‍රමය තුළින් දරුවන්ට ගුණාත්මක අධ්‍යාපනයක් ලබා දීම තම රජයේ අරමුණ බවත්, අග්‍රාමාත්‍යවරිය පැවසුවාය.
2026 වර්ෂයේ සිට ක්‍රියාත්මක කිරීමට නියමිත නව අධ්‍යාපන ප්‍රතිසංස්කරණ පිළිබඳ ජුලි 23 දින බත්තරමුල්ල ඉසුරුපාය, අධ්‍යාපන අමාත්‍යාංශයේ දී පැවැති මාධ්‍යවේදීන් දැනුවත් කිරීමේ සාකච්ඡාවට සහභාගීවෙමින් අග්‍රාමාත්‍යවරිය මේ බව පැවසුවාය.
2026 වර්ෂයේ සිට ක්‍රියාත්මක කිරීමට නියමිත නව අධ්‍යාපන ප්‍රතිසංස්කරණ පිළිබඳව සියලු මාධ්ය ආයතනවල මාධ්‍යවේදීන් දැනුවත් කිරීම අධ්‍යාපන උසස් අධ්‍යාපන හා වෘත්තීය අධ්‍යාපන අමාත්‍යාංශ ලේකම් නාලක කලුවැව මහතා සහ ජාතික අධ්‍යාපන ආයතනයේ නියෝජ්‍ය අධ්‍යක්ෂ ජනරාල්, ආචාර්ය අශෝක ද සිල්වා මහතා විසින් සිදු කරන ලදී.
එහිදී, මාධ්‍යවේදීන් නැගූ ප්‍රශ්නවලට පිළිතුරු දුන් අග්‍රාමාත්‍යවරිය,
” අපි පුරුදු වෙලා තියෙන්නේ ගුරුවරු දෙමව්පියෝ වගේම ළමයිනුත් විභාගෙකට සූදානම් වෙන අධ්‍යාපන ක්‍රමයකටයි. නමුත් මේ මොඩියුල ක්‍රමයේදී විවිධ ක්‍රියාකාරකම් ඔස්සේ ළමයි ඉගෙන ගැනීමට යොමුවන අතරෙම, ඇගැයීමටත් ලක්වෙනවා“.
නව විෂය නිර්දේශය අනුව අ.පො.ස සාමාන්‍ය පෙළ විභාගය ක්‍රියාත්මක කිරීමට නියමිත 2029 වර්ෂයේ දීය. 2026 සිට මෙය අපි ක්‍රියාත්මක කරන්නේ 1 ශ්‍රේණිය සහ 6 වෙනි ශ්‍රේණියට පමණයි. අපිට මේ ක්‍රමය නිරීක්ෂණය කරන්න අවුරුදු 03ක් තියෙනවා. එහිදී මුහුණ දෙන්න වෙන තත්ත්වයන් සහ අවශ්‍යතා එක්ක අපිට පුළුවන් මේ ක්‍රමයේ අවශ්‍ය වෙනස්කම් කරන්න. අපි කොහෙදිවත් කියලා නෑ මේ ඉදිරිපත් කරන ප්‍රතිසංස්කරණ අවසානාත්මකයි කියලා. අවස්ථානුකූලව එය වෙනස් කරන්න අපි බලාපොරොත්තු වෙනවා. ඒ වගේම ඔබටත් ඒ සම්බන්ධයෙන් ඔබගේ අදහස් සහ යෝජනා ඉදිරිපත් කරන්න පුළුවන්.
පන්ති කාමරය තුළ ළමයින් 25 – 30 දක්වා අඩු කරන්න අවශ්‍යයි. දැනට පන්ති කාමරයක ළමයි 40 ඉක්මවලා ඉන්න පන්ති කාමරත් තියෙනවා. එහෙම වෙලා තියෙන්නේ නියමිත සිසුන් ගණනට වඩා සිසුන් ප්‍රමාණයක් පාසලට ඇතුළත් කරගන්න කියන අධ්‍යාපන ඇමති සහ ලේකම්ගේ නිර්දේශ මත සිදුවන ඇතුළත් කිරීම් නිසා. ඒ ක්‍රමය අපේ රජය යටතේ සම්පූර්ණයෙන්ම නවත්තලා තියෙනවා. ඒ නිසා ඉදිරියේදී පාසල්වලට ඇතුළත් වෙන්නේ ඒ අදාළ නියමිත සිසුන් ප්‍රමාණය පමණයි.
ඒ වගේම පහේ ශිෂ්‍යත්වය අහෝසි කරන්න අපි තාම තීරණයක් අරගෙන නැහැ. එහෙම කරන්න නම් පාසල් අතර තියෙන විෂමතාවය නැති කරන්න ඕනේ. ඒක අපිට එකපාරටම කරන්න පුළුවන් දෙයක් නෙවෙයි. ශිෂ්‍යත්ව විභාගය නිසා දරුවන්ට ඇති වී තිබෙන, පීඩාකාරී අධ්‍යාපන ක්‍රමයේ බර අඩු කරන්න තමයි අපි මේ ප්‍රතිසංස්කරණ වලදි බලාපොරොත්තු වෙන්නේ.
පූර්ව ළමා විය සංවර්ධන මධ්‍යස්ථාන පවත්වාගෙන යාම සහ එම ගුරුවරුන් පුහුණු කිරීම පිළිබඳ පූර්ණ නිරීක්ෂණය අධ්‍යාපන අමාත්‍යංශය හරහා සිදු කිරීමටත් මෙම ප්‍රතිසංස්කරණ යටතේ අපි යෝජනා කරලා තියෙනවා. ” යැයි අග්‍රාමාත්‍යවරිය පැවසුවාය.
මෙහිදී අදහස් දැක්වූ අධ්‍යාපන නියෝජ්‍ය අමාත්‍ය මධුර සෙනවිරත්න මහතා,
“ගුරු පුහුණුව පිළිබඳව අපි විශේෂ අවධානයක් මෙහිදී යොමු කරලා තියෙනවා. අපි ඉදිරිපත් කරලා තියෙන කුලුනු පහට ගුරු පුහුණුවත් ඇතුළත් වෙලා තියෙනවා. එළැඹෙන අගෝස්තු මාසයේ ගුරු පුහුණුව ආරම්භ කරන වැඩපිළිවෙළ මේ වන විටත් සකස් කරලා තියෙනවා. ” යැයි පැවසීය.
මෙම ප්‍රතිසංස්කරණ පිළිබඳ විශ්වවිද්‍යාල ආචාර්යවරුන්, ගුරු සංගම් සහ අධ්‍යාපන ප්‍රධානීන් දැනුවත් කිරීමේ හමු කිහිපයක්ම ඉදිරියේදී පැවැත්වීමට ද මේ වන විටත් කටයුතු යොදා තිබේ.
මාධ්ය ඒකකය
-
ශ්‍රී ලංකා උසස් තාක්ෂණ අධ්‍යාපන ආයතනයේ ප්‍රමාණ සමීක්ෂණය සහ ඉංග්‍රීසි ඩිප්ලෝමාවලට NVQ 6 සහතිකය පිරිනැමීමට අනුමැතිය
ශ්‍රී ලංකා උසස් තාක්ෂණ අධ්‍යාපන ආයතනය (SLIATE) විසින් පවත්වනු ලබන උසස් ජාතික ඩිප්ලෝමා පාඨමාලා දෙකක් වන ප්‍රමාණ සමීක්ෂණය පිළිබඳ උසස් ජාතික ඩිප්ලෝමාව (HNDQS) සහ උසස් ජාතික ඉංග්‍රීසි ඩිප්ලෝමාව (HNDE) පාඨමාලාව සඳහා NVQ 6 මට්ටමේ සමානතා තත්ත්වය ප්‍රදානය කිරීමට අනුමැතිය හිමි වී තිබේ.
2025 ජූලි 8 වන දින පැවති අංක 2025/05/303 දරන තෘතියික හා වෘත්තීය අධ්‍යාපන (TVEC) කොමිෂන් සභා රැස්වීමේදී, ඉහත පාඨමාලා දෙක NVQ 6 මට්ටමේ ප්‍රමිතීන්ට අනුකූල බව තීරණය කළ අතර ඒ අනුව ප්‍රමාණ සමීක්ෂණය පිළිබඳ උසස් ජාතික ඩිප්ලෝමාව සහ උසස් ජාතික ඉංග්‍රීසි ඩිප්ලෝමාව පාඨමාලා සාර්ථකව නිම කළ අයට NVQ 6 මට්ටමේ සමානතා සහතිකය නිකුත් කිරීම සඳහා රු. 1000.00 ක ගාස්තුවක් සමඟ SLIATE අධ්‍යක්ෂ/විදුහල්පති/අධ්‍යක්ෂ ජනරාල් විසින් සහතික කරන ලද අවසන් සහතිකයේ පිටපතක් සමඟ තම ඉල්ලීම් එවිය හැකිය. ඊට අදාල චක්‍රලේඛය 2025.07.09 දින සිට ක්‍රියාත්මක කෙරේ. ඉහත පාඨමාලා දෙක NVQ 6 මට්ටමේ ප්‍රමිතීන්ට අනුකූල බව තීරණය කළ අතර ඒ අනුව ප්‍රමාණ සමීක්ෂණය පිළිබඳ උසස් ජාතික ඩිප්ලෝමාව සහ උසස් ජාතික ඉංග්‍රීසි ඩිප්ලෝමාව පාඨමාලා සාර්ථකව නිම කළ අයට NVQ 6 මට්ටමේ සමානතා සහතිකය නිකුත් කිරීම සඳහා රු. 1000.00 ක ගාස්තුවක් සමඟ SLIATE අධ්‍යක්ෂ/විදුහල්පති/අධ්‍යක්ෂ ජනරාල් විසින් සහතික කරන ලද අවසන් සහතිකයේ පිටපතක් සමඟ තම ඉල්ලීම් එවිය හැකිය. ඊට අදාල චක්‍රලේඛය 2025.07.09 දින සිට ක්‍රියාත්මක කෙරේ.
-
නව අධ්‍යාපන ප්‍රතිසංස්කරණවලට පක්ෂ විපක්ෂ පාර්ලිමේන්තු මන්ත්‍රීවරුන්ගෙන් සාධනීය ප්‍රතිචාර…
යෝජිත නව අධ්‍යාපන ප්‍රතිසංස්කරණ පිළිබඳ පාර්ලිමේන්තු මන්ත්‍රීවරුන් දැනුම්වත් කිරීමේ හමුවක් අද 22 දින අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරියගේ සහභාගිත්වයෙන් පාර්ලිමේන්තු පරිශ්‍රයේ දී පැවැත්විණි.
එහිදී අදහස් දැක් වූ අග්‍රාමාත්‍ය ආචාර්ය හරිනි අමරසූරිය,
“අපගේ රජය විසින් ක්‍රියාත්මක කරන්න සැලසුම් කරමින් ඉන්න යෝජිත නව අධ්‍යාපන ප්‍රතිසංස්කරණ පිළිබඳ සමාජය තුළ ලොකු උනන්දුවක් වගේම සැලකිය යුතු මට්ටමේ කතාබහකුත් ඇති වී තිබෙනවා. ඒ පිළිබඳ අපි රජයක් හැටියට සතුටු වෙනවා. ජාතික වැදගත්කමක් තියෙන මේ වැඩපිළිවෙළ ගැන සමාජ සංවාදයක් ඇතිවෙන එක ඉතාම වැදගත්.
මේ නිසා පාර්ලිමේන්තු මන්ත්‍රීවරුන් හැටියට ඔබ සියලුදෙනාම යෝජිත නව අධ්‍යාපන ප්‍රතිසංස්කරණ පිළිබඳ නිවැරදි අවබෝධයකින් කටයුතු කිරීමේ අවශ්‍යතාවය තේරුම් අරගෙන, ඒ අනුව ඔබ දැනුම්වත් කිරීමේ සහ මේ පිළිබඳ ඔබගේ යෝජනා සහ අදහස් ලබාගැනීමේ එක් පියවරක් විදිහටයි අද අපේ මේ හමුව පැවැත්වෙන්නෙ.
යෝජිත නව අධ්‍යාපන ප්‍රතිසංස්කරණ පිළිබඳ සැකසු විස්තරාත්මක ලේඛනයක් ඔබ වෙත ලබාදීමෙන් සහ නව අධ්‍යාපන ප්‍රතිසංස්කරණ පිළිබඳ ඔබව දැනුම්වත් කිරීමෙන් අනතුරුව ඒ පිළිබඳ ඔබගේ අදහස් සහ යෝජනාවලට ඇහුම්කන් දෙන්න අපි සූදානම්” යනුවෙන් අග්‍රමාත්‍යතුමිය ප්‍රකාශ කළා ය.
අගමැතිතුමියගේ මූලික කරුණු දැක්වීමෙන් අනතුරුව, ජාතික අධ්‍යාපන ආයතනයේ නියෝජ්‍ය අධ්‍යක්ෂ ආචාර්ය දර්ශන සමරවීර මහතා විසින් විස්තරාත්මක දෘශ්‍ය මාධ්ය පැහැදිලි කිරීමක් පැමිණ සිටි ගරු පාර්ලිමේන්තු මන්ත්‍රීවරුන් වෙනුවෙන් ඉදිරිපත් කරනු ලැබීය.
අනතුරුව, පාර්ලිමේන්තු මන්ත්‍රීවරුන් වන ගරු විපක්ෂ නායක සජිත් ප්‍රේමදාස, සිවඥානම් ශ්‍රීධරන්, අජිත් පී පෙරේරා, රෝහිණි කවිරත්න, ආචාර්ය හර්ෂ ද සිල්වා, දයාසිරි ජයසේකර ඇතුළු පක්ෂ විපක්ෂ ගරු මන්ත්‍රීවරුන් කිහිප දෙනෙක්ම අදහස් දැක් වූ අතර, අධ්‍යාපන ප්‍රතිසංස්කරණයක් සිදු කිරීම කාලීන අවශ්‍යතාවයක් බවත්, වත්මන් රජය ගෙන ඒමට සූදානම් වන නව අධ්‍යාපන ප්‍රතිසංස්කරණයේ සාධනීය කාරණා වෙත තම සහායෝගය ලබා දෙන බවත් එහිදී පක්ෂ විපක්ෂ ගරු මන්ත්‍රීවරුන් පැවසූහ.
ඉංග්‍රීසි බස අධ්‍යාපන මාධ්ය ලෙස යොදාගැනීම කෙරෙහි සහ ඉංග්‍රීසි බස වඩා ප්‍රචලිත කිරීම, අධ්‍යාපනයට අවශ්‍ය මානව සම්පත් හැකි උපරිමයෙන් ලබාදීම යනාදි කරුණු පිළිබඳ වැඩි අවධානයක් යොමු කිරීමේ අවශ්‍යතාවය පිළිබඳ ගරු පාර්ලිමේන්තු මන්ත්‍රීවරුන් බහුතරයකගේ අවධානය යොමු වු අතර, අධ්‍යාපන ප්‍රතිසංස්කරණය පිළිබඳ ඔවුන් මතු කළ ප්‍රශ්නවලට, අගමැතිතුමියත්, අධ්‍යාපන අමාත්‍යාංශයේ ලේකම්වරයාත්, ජාතික අධ්‍යාපන ආයතනයේ නියෝජ්‍ය අධ්‍යක්ෂවරයාත් පිළිතුරු ලබා දුන්හ.
එහිදී තවදුරටත් අදහස් දැක් වූ අග්‍රාමාත්‍යතුමිය,
විෂයමාලා ප්‍රතිසංස්කරණය හා අධ්‍යාපන ප්‍රතිසංස්කරණය යනු එකක් නොව එකිනෙකට වෙනස් කාරණා දෙකක් බවත්, ඒ අනුව මෙවර සිදු වන්නේ පවතින අධ්‍යාපන ක්‍රමය (System) එකම වෙනස් කිරීම බවත් පෙන්වා දුන් අග්‍රාමාත්‍යතුමිය, එය කඩිමුඩියේ නොව කාලයක් අරගෙන පරික්ෂාකාරීව අදියරෙන් අදියර ඉදිරියට කරගෙන යාමට නියමිත ක්‍රියාවලියක් බවත් ප්‍රකාශ කළාය.
මෙහි පළමු අදියර 2026 දී පළමු වසර සහ හය වසර සිසුන් සඳහා ක්‍රියාත්මක කරන බවත්, එහිදී ලැබෙන ප්‍රතිචාර සැලකිල්ලට ගනිමින් අවශ්‍ය වෙනස්කම් සිදුකරමින් ඉදිරියට යාමට අපේක්ෂා කරන බවත් ප්‍රකාශ කළාය. එසේම නව අධ්‍යාපන ප්‍රතිසංස්කරණය පෙර අධ්‍යාපන ප්‍රතිසංස්කරණවලට සාපේක්ෂව වෙනස් මෙන්ම නව ප්‍රවේශයකින් ක්‍රියාත්මක කරන බව පැවැසූ අග්‍රාමාත්‍යතුමිය, යෝජිත අධ්‍යාපන ප්‍රතිසංස්කරණ ක්‍රියාවලිය, විෂයමාලා සංවර්ධනය, මානව සම්පත් සංවර්ධනය, අධ්‍යාපන ක්ෂේත්‍රයේ යටිතල පහසුකම්, අධ්‍යාපන පරිපාලන ව්‍යුහයේ ප්‍රතිසංකරණ, තක්සේරුකරණය සහ ඇගයීම් ක්‍රියාවලිය, මහජනයා දැනුම්වත්කිරීම හා ප්‍රචාරණය යන කුළුණු පහ මත පදනම් වන බවත් පෙන්වා දුන්නාය.
පක්ෂ විපක්ෂ සියලූම ගරු මන්ත්‍රීවරුන්ගේ කරුණු දැක්වීම් සහ ඔවුන්ගෙන් මතු වූ ප්‍රශ්නවලට සාවධානව සවන් දෙමින් ඒවාට නිසි පිළිතුරු ලබා දුන් අග්‍රාමාත්‍යතුමිය, මෙවැනි දැනුම්වත් කිරීම් ඉදිරියේදිත් සිදු කරන බවත්, මෙම අවස්ථාවේදී ගරු මන්ත්‍රීවරුන්ගෙන් ඉදිරිපත් වූ යෝජනා සහ අදහස් පිළිබඳ තම අවධානය යොමු කරන බවත්, එසේ කරුණු ඉදිරිපත් කිරීම ගැන තමන් බෙහෙවින් ස්තූතිවන්ත වන බවත් ප්‍රකාශ කළාය.
මෙම හමුවට පක්ෂ විපක්ෂ නියෝජනය කරමින් ගරු පාර්ලිමේන්තු මන්ත්‍රිවරුන් ද, අග්‍රාමාත්‍ය ලේකම් ප්‍රදීප් සපුතන්ත්‍රි මහතා, අධ්‍යාපන අමාත්‍යාංශයේ ලේකම් නාලක කළුවැව මහතා සහ ජාතික අධ්‍යාපන ආයතනයේ නිලධාරීන් පිරිසක් ද සහභාගී වූහ.
මාධ්ය ඒකකය
-
ගුරු ශික්ෂණලාභීන්ට පීඩනයෙන් තොර ඉගෙනුම් පරිසරයක් නිර්මාණය කිරීම සඳහා කඩිනම් පියවර ගන්නවා.
– අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න
ජාතික අධ්‍යාපන විද්‍යා පීඨවල ඉගෙනුම ලබන ගුරු ශික්ෂණලාහීන්ට පීඩනයෙන් තොර ඉගෙනුම් පරිසරයක් නිර්මාණය කිරීමත්, අධ්‍යාපන පීඨවල ගුණාත්මකභාවය සංවර්ධනය සඳහා ක්‍රියාකාරි සැලැස්මක් දියත් කිරීමත් සිය විශේෂ අවධානය යොමුව ඇති බව අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා ප්‍රකාශ කළේ ය. ඒ මහතා මේ බව පැවසූයේ ජාතික අධ්‍යාපන විද්‍යාපීඨවල පීඨාධිපතිවරුන් සඳහා බත්තරමුල්ල අධ්‍යාපන අමාත්‍යාංශ පරිශ්‍රයේදී පැවති සාකච්ඡාවක් අමතමනි.
මෙම සාකච්ඡාව සඳහා දිවයිනේ සියලු අධ්‍යාපන විද්‍යා පීඨවල පීඨාධිපතිවරුන් සහභාගී වී සිටි අතර එක් එක් අධ්‍යාපන විද්‍යා පීඨය සඳහා සිය අධ්‍යයන සහ අනධ්‍යයන ගැටලු, යටිතල පහසුකම් සංවර්ධනය සම්බන්ධයෙන් වන ගැටලු සාකච්ඡා කිරීමට අවස්ථාව හිමි විය. ගුරු ශික්ෂණලාහීන්ට ගුණාත්මක අධ්‍යයන පරිසරයක් නිර්මාණය කිරීම සඳහා මෙතෙක් කල් අවධානය යොමු නොවුණු ගැටලුවලට සිය විශේෂ අවධානය යොමු කරන බවත්, සුවිශේෂි ගැටලු පවතින විද්‍යා පීඨවල නිරීක්ෂණ චාරිකාවක් සිදු කර කඩිනම් විසඳුම්වලට එළඹෙන බවත් නියෝජ්‍ය අමාත්‍යවරයා ප්‍රකාශ කළේ ය.
මෙහිදී වැඩි දුරටත් අදහස් දැක් වූ නියෝජ්‍ය අමාත්‍යවරයා,
ගුරු ශික්ෂණලාහීන්ට නිදහස් ඉගෙනුම් පරිසරයක් සකසා දීම සහ ඔවුන්ගේ මානසික යහ පැවැත්ම වෙනුවෙන් පියවර ගැනීම අනාගත ආයෝජනයක් වෙනවා. මොකද ඉදිරියේ දී පාසල් ගුරුවරුන් විදියට සිසුන් අතරට යන්නෙ ඔවුන් නිසා. ඔවුන්ගේ මානසික සෞඛ්‍ය නගා සිටුවීම සඳහා උපදේශන සේවා ශක්තිමත් කිරීමට මේ වන විටත් අප පියවර ගනිමිනුයි තිබෙන්නෙ.
මේ අවස්ථාව සඳහා ගුරු අධ්‍යාපන ප්‍රධාන කොමසාරිස් ඉරෝෂිණී කේ. පරණගම මහත්මිය සහ අධ්‍යාපන අමාත්‍යාංශයේ නිලධාරි පිරිසක් සහභාගි වී සිටියහ.
-
රජයේ හා රජයේ ආධාර ලබාදෙන සියලු පාසල් වෙත 2025 වර්ෂය සදහා නිල ඇඳුම් ප්‍රදානයට අදාළ සහතිකය හුවමාරු කෙරේ.
2025 වර්ෂය සඳහා රුපියල් මිලියන 5,171 වටිනා පාසල් නිල ඇඳුම් රෙදි සඳහා අවශ්‍ය මුළු රෙදි ප්‍රමාණයම චීන රජයේ ප්‍රදානයක් ලෙස ලබා දී අවසන් බව නිල වශයෙන් දැනුම් දීමේ අවස්ථාව ජුලි 16 දින බත්තරමුල්ල අධ්‍යාපන අමාත්‍යංශයේදී අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරියගේ සහභාගිත්වයෙන් පැවැත්විණි.
එහිදී 2025 වර්ෂයේ සඳහා අවශ්‍ය මුළු නිල ඇඳුම් අවශ්‍යතාවය ප්‍රදානය කර අවසන් බව දැනුම් දීමට අදාල සහතික පත්‍ර හුවමාරුව අග්‍රාමාත්‍ය ආචාර්ය හරිනි අමරසූරිය හා ශ්‍රී ලංකාවේ චීන තානාපති Qi Zhenhong මහතා අතර සිදු විය.
මේ වන විට 2026 වර්ෂය සඳහා ද පාසල් නිල ඇඳුම් රෙදි ප්‍රදානයක් ලෙස ලබාදීමට කටයුතු කරන ලෙස ඉල්ලීමක් විදේශ සම්පත් දෙපාර්තමේන්තුව හරහා මහජන චීන සමූහාණ්ඩුවේ ලංකාවේ චීන තානාපති කාර්යාලය වෙත යොමු කර ඇත.
එහිදී අදහස් දැක්වූ අධ්‍යාපනය, උසස් අධ්‍යාපන හා වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය, “ශ්‍රී ලංකාව සහ චීනය අතර පවතින්නේ සහයෝගීතාවයෙන් යුත් දිගු කාලීන මිත්‍රත්වයක්. අපේ රටේ පාසල් දරුවන්ට ලබා දුන් මෙම නිල ඇඳුම් ප්‍රදානය ද මෙම දීර්ඝ කාලීන මිතුදමේ එක් පියවරකි.
2023 සහ 2024 වර්ෂවල චීන රජය පාසල් නිල ඇඳුම් රෙදි සඳහා අපගේ ජාතික අවශ්‍යතාවයෙන් සැලකිය යුතු කොටසක් ලබා දී ඇති අතර, 2025 වර්ෂයේ සම්පුර්ණ නිල ඇඳුම් අවශ්‍යතාවයම අප රටේ දරුවන්ට ලබා දී ඇත.
ශ්‍රී ලංකාවට අතිශයින් දුෂ්කර කාලයකදී අප රටේ දරුවන්ගේ අධ්‍යාපනය වෙනුවෙන් චීන රජයෙන් ලබා දුන් මෙම පරිත්‍යාගය අපට බොහොම වටිනවා.2026 වසර සදහා ද , චීන රජයේ අඛණ්ඩ සහාය ලබා දෙන ලෙස අප රජය දැනටමත් ඉල්ලීමක් ඉදිරිපත් කර තිබෙනවා. එමෙන්ම අපේ රටේ දරුවන් සහ දෙමාපියන් වෙනුවෙන් චීන රජයට සහ ජනතාවට මාගේ ස්තූතිය පුද කරනවා” යැයි පැවසීය.
එහිදී අදහස් දැක්වූ ශ්‍රී ලංකාවේ චීන තානාපති Qi Zhenhong මහතා,
“ශ්‍රී ලංකාවට අවශ්‍ය සෑම අවස්ථාවකදීම චීනය ඔබේ විශ්වාසවන්ත සහෝදරයා මෙන්ම සහායකයා ලෙසද කටයුතු කරනවා. දරුවන් යනු මේ රටේ අනාගතය පමණක් නොව චීන ශ්‍රී ලංකා මිතුදමේ උරුමක්කාරයන්.
ඔවුන්ගේ නිල ඇඳුමේ ඇති සෑම මැහුමකින්ම අපේ පැරණි ශිෂ්ටාචාර දෙක අතර අන්‍යෝන්‍ය සහයෝගීතාවයේ කතාව කියනු ඇත.අග්‍රාමාත්‍ය ආචාර්ය හරිනි අමරසූරිය මැතිනිය මේ රටේ අධ්‍යාපනය වෙනුවෙන් දක්වන දායකත්වය සහ කැපකිරීම් මම ඉතාමත් අගය කොට සලකනවා. ”
මෙම අවස්ථාවට ශ්‍රී ලංකාවේ චීන තානාපති කාර්යාලය නිලධාරීන් සහ අධ්‍යාපන අමාත්‍යංශයේ නිලධාරීන් පිරිසක් සහභාගී වූහ.
-
තාක්ෂණික හා වෘත්තීය විෂය ධාරාවේ විෂය මාලා සංශෝධනය කරමින් නව සමාලෝචන රැසක්.
– අග්‍රාමාත්‍ය ආචාර්ය හරිනි අමරසූරිය
2026 වසරේ නව අධ්‍යාපන ප්‍රතිසංස්කරණ යටතේ පාසල් අධ්‍යාපනය තුළ තාක්ෂණික හා වෘත්තීය අධ්‍යාපනය නගා සිටුවීමට විෂය මාලා සංශෝධනය කිරීමට නියමිත බවත් ඒ වෙනුවෙන් සැලසුම් සකස් කොට ඇති බවත් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය ජුලි 09 වැනි දා පාර්ලිමේන්තුවේ දී පවසන ලදී.
මෙම නව ප්‍රතිසංස්කරණ යටතේ වෘත්තීය විෂය ධාරාවන් 10 සහ 11 ශ්‍රේණි සඳහා හඳුන්වාදීමට නියමිත අතර එහිදී සෑම පාසලකම 10 සහ 11 ශ්‍රේණි සඳහා කාණ්ඩ විෂයක් ලෙස මෙම වෘත්තීය විෂයන් හඳුන්වා දෙනු ඇති බවත්, ඒ අනුව 10 ශ්‍රේණියේ සිට වසර හතරක පාසල් කාලයක් වෘත්තීය විෂයක් හදා‍රා NVQ 4 සහතිකය ලබා ගැනීමේ හැකියාව සිසුන්ට හිමි වේ.
ඒ සඳහා විෂය මාලාව සහ මොඩියුල සංවර්ධනය කිරීම ජාතික අධ්‍යාපන ආයතනය මගින් මේ වන විට සිදුකරමින් සිටින බවත් මේ හරහා උසස්පෙළ වෘත්තීය විෂයන් ක්‍රියාත්මක වන පාසල් සංඛ්‍යාව පවතින පාසල් 609ක ප්‍රමාණයේ සිට පාසල් 1,000ක් දක්වා වර්ධනය කිරිමට බලාපොරොත්තු වන බවත් අමාත්‍යතුමිය පැවසී ය.
පාසල් අධ්‍යාපනයෙන් පසු තාක්ෂණ හා වෘත්තීය අධ්‍යාපන ක්ෂේත්‍රය නගා සිටුවීම සඳහා එම අංශයට අදාළව ආසියානු සංවර්ධන බැංකුවේ ද සහය ඇතිව උපාය මාර්ගික සැලැස්මක් සකස් කිරීම සඳහා එම ක්ෂේයට අදාළ සියලු පාර්ශවකරුවන් සමඟ රැස්වීම් පවත්වමින් මූලික කෙටුම්පතක් සකස් කෙරෙමින් පවතින බවත් එළඹෙන සැප්තැම්බර් වන විට සම්පූර්ණ කෙටුම්පත සකස් කොට ඉදිරිපත් කෙරෙන බවත් අමාත්‍යතුමිය සඳහන් කළාය.
එම සැලසුම් යටතේ තාක්ෂණික හා වෘත්තීය අධ්‍යාපන ක්ෂේත්‍රය සඳහා ගුරුවරුන් පුහුණු කිරීම සහ යටිතල පහසුකම් සංවර්ධනය කිරීම වෙනුවෙන් 10, 11 ශ්‍රේණිවල වෘත්තීය විෂයන් ඉගැන්වීමට ගුරු විද්‍යාල හරහා ගුරුවරුන් බඳවාගෙන පුහුණු කිරීමට කටයුතු කරනු ඇත.
දැනට වෘත්තීය විෂය ධාරාවන් සඳහා පත් කර ඇති ගුරුවරුන් වෙනුවෙන් කර්මාන්ත ක්ෂේත්‍රයේ ද සහය ඇතිව විවිධ වෘත්තීය ක්ෂේත්‍රයන්හි කාලීන ප්‍රවණතා සහ අත්දැකීම් ලබා දෙමින් ගුරු ධාරිතා සංවර්ධන වැඩසටහන් මාලාවක් ඉදිරි අවුරුදු පහක කාලයක් දක්වා වාර්ෂිකව ක්‍රියාත්මක කිරීමට නියමිත බවත් වෘත්තීය විෂය ක්ෂේත්‍රයේ කාලීන ප්‍රවණතා අනුව වෘත්තීය විෂය ධාරාව නැවත සමාලෝචනය කර විෂය මොඩියුල සඳහා අවශ්‍ය වෙනස්කම් ඇතුලත් කිරීම 2026 සහ 2027 වසරවල් තුළ අවසන් කිරීමට නියමිත බවත් අමාත්‍යතුමිය විසින් පාර්ලිමේන්තුවේ දී ප්‍රකාශ කරන ලදී.
මාධ්ය ඒකකය
-
පාසල් සිසුවියන් වෙත සනීපාරක්ෂක තුවා ලබාදීමේ වැඩසටහන – 2025
පාසල් සිසුවියන් සඳහා සනීපාරක්ෂක තුවා ලබාදීම – 2025 වැඩසටහන මෙම වසරේ දී ක්‍රියාත්මක කරනු ලබන්නේ පාසල වෙත පැමිණෙන ශ්‍රී ලංකා ප්‍රමිති ආයතනයේ ලියාපදිංචි වී ඇති SLS – 1732/2022 සහතිකය ලද වෙළඳ ආයතන 4ක් මඟින් පමණයි.
එම ආයතන පාසල් වෙතම පැමිණ සිසුවියන්ට සනීපාරක්ෂක තුවා පැකට් ලබා දෙන බැවින්, එම ආයතන හැර වෙනත් කිසිදු ආයතනයකින් සනීපාරක්ෂක තුවා මිළදී ගත නොහැක.
මාධ්ය ඒකකය
-
නවක වදය මෙන්ම විශ්වවිද්‍යාලවල සිදුවන සියලු හිංසනයන් පිළිබඳ සොයා බලන්න…
අධ්‍යාපන උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය
විශ්වවිද්‍යාල පද්ධතියේ සහ අනෙකුත් උසස් අධ්‍යාපන ආයතන තුළ පවතින නවක වදය, හිංසනය හා සියලුම ආකාරයේ ප්‍රචණ්ඩත්වයන් වැලැක්වීමට අවශ්‍ය නිර්දේශ සහ කටයුතු සම්පාදනය කරන ලෙස අධ්‍යාපන උසස් අධ්‍යාපන හා වෘත්තීය අධ්‍යාපන අමාත්‍ය ආචාර්ය හරිනි අමරසූරිය පැවසුවාය. උසස් අධ්‍යාපන ආයතනවල නවක වදය, හිංසනය හා සියලු ආකාරයේ ප්‍රචණ්ඩත්වයන් තුරන් කිරීම සඳහා වන ජාතික කාර්ය සාධක බලකායේ සාමාජිකයින් සහ අමාත්‍යවරිය අතර අද (02) අධ්‍යාපන අමාත්‍යංශයේදී පැවති සාකච්ඡාවේදී ඇය මේ බව සඳහන් කළාය.
විශ්වවිද්‍යාල පද්ධතියේ මෙන්ම උසස් අධ්‍යාපන ආයතන තුළ ශිෂ්‍යයන්ගෙන්, අධ්‍යයන සහ අනධ්‍යයන කාර්ය මණ්ඩලවලින් සිදු වන සියලු ආකාරයේ හිංසනයන් සොයා බැලීමට සහ ඒ සම්බන්ධව ක්‍රියාමාර්ග ගැනීමට වසර 3ක් සඳහා පත් කර ඇති මෙම කාර්ය සාධක බලකායට අවශ්‍ය බලය සහ රාජ්‍ය අනුග්‍රහය ලබා දෙන බවත් අමාත්‍යවරිය මෙහිදී පැවසීය.
මෙවැනි හිංසනකාරී සිදුවීම් සඳහා පුද්ගලික වශයෙන් මෙන්ම සාමාජීය වශයෙන් බලපාන හේතු පවතින බව මෙහිදී කාර්ය සාධක බලකායේ නියෝජිතයින් පෙන්වා දුන් අතර අධ්‍යාපන පරිපාලනය, අධ්‍යයන සහ අනධ්‍යයන කාර්ය මණ්ඩල මෙන්ම සිසුන් අතර නිසි සබඳතාවක් ගොඩ නැගී නොතිබීම, නවක වදය පිලිබඳ සිසුන් තුළ පවතින වැරදි ආකල්ප, අවනත කරගැනීම සහ ගෞරවය ලබා ගැනීම සඳහා හිංසනය භාවිත කිරීම ඇතුළු කරුණු රැසක් පිළිබඳව මෙහිදී නියෝජිතයින් විසින් පැහැලිදි කරන ලදී. විශ්වවිද්‍යාල පද්ධතියේ සිසුනට ලකුණු ලබා දීමේදී සහ පන්ති සාමර්ථ ලබා දීමේදී පරිපාලනය සහ ආචාර්යවරුන් සිසුන් සඳහා සිදු කරන බලපෑම් නිසා සිසුන් ආතතියට පත්වීම වැනි කරුණු පිළිබඳව ද මෙහිදී අවධානය යොමු විය.
සියලු ආකාරයේ හිංසනයන් නතර කිරීම වෙනුවෙන් අවශ්‍ය ක්‍රියාමාර්ග කෙටිකාලීනව හා දිගුකාලිනව ගත යුතු බවත්, ඒ වෙනුවෙන් අවශ්‍ය ක්‍රමවේද සහ යාන්ත්‍රණ සකස් කරන ලෙසත්, නීතිමය ක්‍රියාමාර්ගවලින් පමණක් මෙය අවසන් කළ නොහැකි බැවින් පවතින නීතී යාවත්කාලීන කරන අතර ආකල්ප සංවර්ධන වැඩසටහන් වැනි දේ සංවිධානය කළ යුතු බවත් අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මෙහිදී පැවසුවා ය.
විවිධ ආකාරයේ හිංසනයන්ට ලක්වන සිසුන් කෙරෙහි අවධානය යොමුකිරීම මෙන් ම, ඔවුන්ගේ ආරක්ෂාව තහවුරු වන පරිදි කටයුතු කළ යුතු බවත් අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා මෙහිදී පැවසීය.
මාධ්ය ඒකකය
-
ශ්‍රී ලංකාවේ දකුණු කොරියානු තානාපතිනිය අධ්‍යාපන හා උසස් අධ්‍යාපන නියෝජ්‍ය අමාත්‍යවරයා හමුවෙයි.
ශ්‍රී ලංකාවේ දකුණු කොරියානු තානාපතිනි මියොන් ලී (Miyon Lee) මහත්මිය හා අධ්‍යාපන, උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා අතර හමුවක් ජූනි 24 දින ඉසුරුපාය අධ්‍යාපන අමාත්‍යාංශ පරිශ්‍රයේදී පැවැත්විණි. එහිදී නියෝජ්‍ය අමාත්‍යවරයා විසින් තානාපතිනිය පිළිගත් අතර ශ්‍රී ලංකාව සහ දකුණු කොරියාව අතර ද්වී පාර්ශවික සබඳතා ශක්තිමත් කිරීම කෙරෙහි අවධානය යොමු කෙරුණි.
රටේ ශ්‍රම බලකායට සරිලන ලෙස වෘත්තීය අධ්‍යාපන අංශය ශක්තිමත් කිරීම, ශ්‍රී ලංකාව හා දකුණු කොරියාව අතර කාර්මික අධ්‍යාපනය සඳහා කෙරෙන හුවමාරු වැඩසටහන් සහ විශ්ව විද්‍යාවල උසස් අධ්‍යාපන අවස්ථා පුළුල් කිරීම පිළිබඳව මෙහිදී අවධානය යොමු විය. එමෙන් ම ශ්‍රි ලංකාවේ පාසල් පද්ධතිය තුළ කොරියානු භාෂාව හැදැරීමේ අවස්ථා වැඩිදියුණු කිරීම සහ කොරියානු සංස්කෘතික මධ්‍යස්ථානයක් ශ්‍රී ලංකාව තුළ ස්ථාපිත කිරීම කෙරෙහිද මෙහිදී විශේෂ අවධානය යොමු විය.
මාධ්ය ඒකකය.
-
වෘත්තීය අධ්‍යාපනය ලබන සිසුන්ට ආකර්ෂණීය ඉගෙනුම් පරිසරයක් නිර්මාණය කර දීමට “ක්ලීන් ශ්‍රී ලංකා” සමග එක්ව ශ්‍රම මෙහෙයුමක්..!
අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය යටතේ පවත්වා ගෙන යනු ලබන වෘත්තීය අධ්‍යාපන ආයතනවල සිසුන්ට ආකර්ෂණිය ඉගෙනුම් පරිසරයක් නිර්මාණය කිරීම සඳහා “ක්ලීන් ශ්‍රී ලංකා” යටතේ “ශ්‍රම මෙහෙයුම” වැඩසටහන ක්‍රියාත්මක කිරීමට සැලසුම් කර තිබේ.
ත්‍රිවිධ හමුදාවේ පූර්ණ සහාය ඇතිව, වෘත්තිය පුහුණු අමත්‍යාංශය යටතේ ක්‍රියාත්මක වන වෘත්තීය පුහුණු මධ්‍යස්ථාන 311ම ආවරණය වන පරිදි ජුලි 04 වන දා පෙ.ව 8.00 මෙම වැඩසටහන ආරම්භ කෙරේ.
වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතාගේ ප්‍රධානත්වයෙන් අද (17) පෙරවරුවේ ජනාධිපති ලේකම් කාර්යාලයේ පැවති සාකච්ඡාවේදී මෙම කරුණු අනාවරණය කෙරිණි.
වසරකට සිසුන් ලක්ෂ 03කට ආසන්න පිරිසක් අධ්‍යාපන පොදු සහතික පත්‍ර උසස් පෙළ විභාගයට පෙනී සිටින අතර, එයින් 240,000කට පමණ විශ්වවිද්‍යාල වරම් අහිමි වේ. එම සිසුන් අතරින්, 125,000ක් පමණ වෘත්තීය අධ්‍යාපන අමාත්‍යාංශය යටතේ ක්‍රියාත්මක වන වෘත්තීය පුහුණ ආයතන වෙත ඇතුළත් වන අතර 50,000ක පමණ පිරිසක් වෙනත් අනුබද්ධ උසස් අධ්‍යාපන ආයතන වෙත යොමු වේ.
ඒ අනුව, වාර්ෂිකව විශ්වවිද්‍යාල වරම් අහිමි වන 175,000ක් පමණ සිසුන් වෘත්තීය අධ්‍යාපනයට නැඹුරු කිරීම සහ ඔවුන්ට අධ්‍යාපනයට සුදුසු පසුබිමක් හා පහසුකම් සපයා දීම සඳහා අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය සහ ක්ලීන් ශ්‍රී ලංකා ලේකම් කාර්යාලය එක් ව මෙම වැඩසටහන ක්‍රියාවට නැංවීමට සැලසුම් කර තිබේ.
මෙම වැඩසටහන සඳහා වෘත්තීය පුහුණු මධ්‍යස්ථානවල අධ්‍යාපනය ලබන සිසුන් 125,000 සමඟ, අනධ්‍යයන කාර්ය මණ්ඩලවල 10,000ක පමණ පිරිසක් සහ ප්‍රදේශවාසින්ද ඇතුළුව 160,000ක පමණ පිරිසක් එක්වීමට නියමිතය.
මෙම සාකච්ඡාවට ක්ලීන් ශ්‍රී ලංකා ලේකම් කාර්යාලයේ ජනාධිපති ජ්‍යෙෂ්ඨ අතිරේක ලේකම් ජී.එම්.ආර්.ඩී. අපොන්සු, ජනාධිපති අතිරේක ලේකම් එස්.පී.සී. සුගීෂ්වර යන මහත්වරු ඇතුළු ක්ලීන් ශ්‍රී ලංකා ලේකම් කාර්යාලයේ නිලධාරිහුද, ආරක්ෂක අමාත්‍යාංශයේ නිලධාරිහුද, ත්‍රිවිධ හමුදාව නියෝජනය කරමින් ජ්‍යෙෂ්ඨ නිලධාරිහු පිරිසක්ද එක්ව සිටියහ.
-
නව ප්‍රතිසංස්කරණ කටයුතු පිලිබඳ සමීක්ෂණය කර නියාමනය කරන්න. අධ්‍යාපන, උසස් අධ්‍යාපන සහ වෘත්තීය අධ්‍යාපන, අමාත්‍ය අග්‍රාමාත්‍ය ආචාර්ය හරිනි අමරසූරිය ජාතික අධ්‍යාපන කොමිසමට උපදෙස් දෙයි.
ජාතික අධ්‍යාපන කොමිසමේ නව නිලධාරී මණ්ඩලය සහ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් ජාතික අධ්‍යාපන කොමිසමේදී පැවැත් විණි.
නව නිලධාරී මණ්ඩලය හඳුන්වා දීම මෙහිදී සිදු වූ අතර අග්‍රාමාත්‍යවරිය විසින් නව අධ්‍යාපන ප්‍රතිසංස්කරණ වෙනුවෙන් කරගෙන යන කාර්ය භාරය මෙහිදී පැහැදිළි කළාය.
නව අධ්‍යාපන ප්‍රතිසංස්කරණය 2026 සිට ආරම්භ කිරීමට සූදානම් බවත්, ඒ වෙනුවෙන් අධ්‍යාපන අමාත්‍යංශය යටතේ පවතින ආයතන ඒකාබද්ධව නිසි ක්‍රමවේදයකට කටයුතු කළ යුතු බවත් අමාත්‍යවරිය මෙහිදී පැවසීය.
නව අධ්‍යාපන ප්‍රතිසංස්කරණ සිදු කිරීමේදී ජාතික අධ්‍යාපන කොමිසමේ කාර්යභාරය පිලිබඳව මෙහිදී දීර්ඝ ලෙස සාකච්ඡා කළේය. එහිදී කොමිසමේ පවතින ගැටළු පිලිබඳවත්, ඉදිරියේදී කළයුතු වැඩසටහන් පිළිබඳවත් අමාත්‍යවරිය කරුණු පැහැදිළි කළාය.
නව අධ්‍යාපන ප්‍රතිසංස්කරණ සිදු කිරීමේදී පාසල් පිලිබඳ සමීක්ෂණ සිදු කිරීමත්, නියාමනය කිරීමත් ජාතික අධ්‍යාපන කොමිසමට පැවරෙන බව ද පැවසූ අමාත්‍යවරිය අධ්‍යාපන ප්‍රතිපත්ති වඩාත් තීව්‍ර ව සිදු කිරීම සඳහා අධ්‍යාපන අමාත්‍යාංශය, ජාතික අධ්‍යාපන ආයතනය සහ ජාතික අධ්‍යාපන කොමිෂම ඒකාබද්ධ ව කටයුතු කරන ලෙසද වැඩිදුරටත් අමාත්‍යවරිය මෙහිදී පැවසුවාය.
අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් නාලක කලුවැව, ජාතික අධ්‍යාපන කොමිසමේ සභාපති මහාචාර්ය ඒ. සරත් ආනන්ද, උප සභාපති තිලක් ධර්මරත්න යන මහත්වරුන් ඇතුළු කොමිසමේ සාමාජිකයින් මෙම අවස්ථාවට සහභාගී විය.
-
විද්‍යාව සහ විද්‍යාවේ දියුණුව මිනිසාගේ දියුණුවටත්, ලෝකය දිනවන්නත් යොදා ගන්න ඉගෙනගන්න… – විදේශ කටයුතු හා සංචාරක අමාත්‍ය විජිත හේරත්
අධ්‍යාපන අමත්‍යංශය වාර්ෂිකව සංවිධානය කරන ජාතික විද්‍යා ඔලිම්පියාඩ් තරගාවලියේ පළාත් හා ජාතික සම්මාන ප්‍රදානෝත්සවය අද දින (20) අධ්‍යාපන අමාත්‍යංශයේ දී විදේශ කටයුතු හා සංචාරක අමාත්‍ය විජිත හේරත් මහතාගේ සහ අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතාගේ ප්‍රධානත්වයෙන් පැවැත්විණි.
ජාතික ඔලිම්පියාඩ් තරගාවලිය, විද්‍යාව, ගණිතය, තොරතුරු විද්‍යාව හා සංඛ්‍යානය යන විෂයයන් කේන්ද්‍ර කරගනිමින් අංශ ගණනාවක් ඔස්සේ පැවැත්වේ. මෙම විෂයයන් සඳහා දක්ෂතා දක්වන සිසුන් හඳුනා ගැනීම, දිරිමත් කිරීම හා විෂයානුබද්ධ දැනුම්වත්භාවය ඉහළ නැංවීම මෙන්ම අන්තර්ජාතික විද්‍යා ඔලිම්පියාඩ් තරගාවලිය සඳහා ඉදිරිපත් කරන ජාතික කණ්ඩායම තෝරා ගැනීම අරමුණු කර ගනිමින් මෙම තරගාවලිය සංවිධානය කෙරේ.
2024 වර්ෂයේ පැවති විද්‍යා ඔලිම්පියාඩ් තරගාවලියේ පළාත් හා සමස්ත ලංකා තරගාවලිය ජයගත් සිසුන් 101 ක් සඳහා කුසලතා සහතිකපත් බෙදාදීම හා පදක්කම් සම්මාන ප්‍රදානය මෙහිදී සිදු කෙරිණි.
එම උත්සව සභාව ඇමැතු, අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනවිරත්න මහතා, ඔබ මෙතැනින් නොනැවතී ලෝකය දිනන ආකාරය සැලසුම් කරන්නැයී ඔවුන්ගෙන් ඉල්ලා සිටියේ ය.
මෙම අවස්ථාවට විදේශ කටයුතු හා සංචාරක අමාත්‍ය විජිත හේරත්, අධ්‍යාපන හා උසස් අධ්‍යාපන නියෝජ්‍ය අමාත්‍ය මධුර සෙනවිරත්න, අධ්‍යාපන අමාත්‍යංශයේ ලේකම් නාලක කළුවැව මහතා ඇතුළු අධ්‍යාපන අමාත්‍යංශයේ උසස් නිලධාරීන්, පළාත් හා ජාතික මට්ටමේ සම්මානලාභී සිසුන්, විද්‍යා ඔලිම්පියාඩ් ජාත්‍යන්තර තරගාවලියේ ශ්‍රී ලංකාව නියෝජනය කළ සිසුන්, ඔවුන්ගේ දෙමාපියන් ඇතුළු විශාල පිරිසක් සහභාගී වූහ.
-
සාර්ථක පුරවැසියෙක් යනු හොඳ රැකියාවක් කිරීම ම නොව අනෙකාගේ අපහසුතා පිළිබඳ, කාන්තාවන්ගේ කාරණා පිළිබඳ සංවේදී වන පුරවැසියෙක් ලෙස සමාජයේ ජීවත් වීමට අවබෝධයක් ඇති අයෙකු වීම බව
අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසුවා ය.
නව යෞවනයේ සනීපාරක්ෂාව පිලිබඳ පාසල් දරුවන් දැනුවත් කිරීම වෙනුවෙන් අද (17) අධ්‍යාපන අමාත්‍යංශයේ පැවති වැඩසටහනකදී අමාත්‍යවරිය මේ බව පැවසීය.
මෙහිදී නව යොවුන්වියේ සනීපාරක්ෂාව පිලිබඳ විශේෂ දේශනය සෞඛ්‍ය ප්‍රවර්ධන කාර්යංශයේ ප්‍රජා විශේෂඥ වෛද්‍ය අසාන්ති ප්‍රනාන්දු බලපිටිය මහත්මිය විසින් සිදු කළාය.
වැඩිදුරටත් අදහස් දැක් වූ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය මෙසේද කීය.
සනීපාරක්ෂාව අධ්‍යාපනයට සෘජුවම සම්බන්ධයි කියලා අපි විශ්වාස කරනවා. සමහර අයට හිතෙන්න පුළුවන් මොකක්ද අධ්‍යාපනය, සනීපාරක්ෂාව සමඟ තියෙන සම්බන්ධය කියලා.
සනීපාරක්ෂාව සියලු දෙනාගේම අයිතියක් සියලුදෙනාටම අවශ්‍ය දෙයක් සහ දත්ත අනුව පෙන්නුම් කරනවා සනීපාරක්ෂක පහසුකම් හරියට පාසලක් තුළ නොතිබීම නිසා විශේෂයෙන් අඩු පහසුකම් තියෙන පාසල්වල ගැහැණු දරුවන්ට මාසෙකට සැරයක්වත් අධ්‍යාපනය අතපසු වෙනවා. ඒ වගේම තමයි සමාජය තුළ ඔවුන්ට නිදහසේ අවශ්‍ය පරිදි ගැවසෙන්න තියෙන අයිතිය සීමා වෙනවා. ඒ සනීපාරක්ෂක පහසුකම් හරියට නැතිවීම හේතුවෙන්.ශිෂ්‍යාවන් වන ඔබ විතරක් නෙවෙයි අපි සියලු දෙනාත් මේ අත්දැකීම ඕන තරම් විඳලා තියෙනවා. පාසල තුළ විතරක් නෙවෙයි. පොදු පහසුකම් අවම වීම තුළින් කාන්තාවන් මේ අපහසුතාවට පොදු සමාජයේ දි මුහුණ දෙනවා.
සනීපාරක්ෂාව කියන එක අතිශයින්ම වැදගත්. ඔබ අහන්න පුළුවන් පිරිමි අපිට මොකක්ද මෙතන දැනගන්න තියෙන දේ කියලා. මේක ගැහැණු ප්‍රශ්නයක් නේ ඒගොල්ලොම විසඳ ගත්තම ඉවරයි කියලා. නමුත් ඔබටත් සනීපාරක්ෂක ගැටළු තිබෙනවා. ඒ වගේම ගැහැණු දරුවන් යම් අපහසුතාවකට පත් වෙනවා නම් ඒ පිලිබඳ සංවේදී වෙන්න පිරිමි පාර්ශවයට අවබෝධයක් සහකම්පනයක් තිබිය යුතුයි.
සාර්ථක පුරවැසියෙක් කියන්නේ හොඳ රැකියාවක් කරන එකම නෙමෙයි. සමාජයේ කිසියම් කෙනෙක් අපහසුතාවයෙන් ඉන්නවා නම් ඒ පිළිබඳ සංවේදීවෙන්න පුලුවන් වෙන්න ඕන. කාන්තාවන්ගේ සංවේදී කාරණාවලදි සහකම්පනයක් ඇති වෙන්න ඕන. ඒ වගේම පුරවැසියෙක් ලෙස සමාජයේ ජීවත් වෙන්න අවබෝධයක් ඔබට තියනවා නම් තමයි ඔබ සාර්ථක.
මෙතනින් ආරම්භ කරලා පාසල් මට්ටමින් සනීපාරක්ෂාව පිලිබඳ දැනුවත් කිරීම් අපි සිදු කරනවා. අධ්‍යාපනය කියන එක විශාල මාතෘකාවක්, මේ සමාජයට, මේ ප්‍රජාවට වැදගත් වන, නායකත්වය දෙන්න පුළුවන්, සමාජය තුළ සියලුම දෙනා සුවපත් කරන්න පුළුවන් ඊළඟ පරපුරක් බිහිකිරීමයි අධ්‍යාපනයෙන් සිදු වෙන්න ඕන. එකිනෙකා පිළිබඳ ගරුත්වය, එකිනෙකාට සළකන ආකාරය ඇතුළු සියල්ල අධ්‍යාපනය තුළ තිබිය යුතුයි.
ඒ නිසා සනීපාරක්ෂාව කියන එක සෞඛ්‍යයට පමණක් සීමා කරන්න පුළුවන් දෙයක් නෙවෙයි. සනීප ආරක්ෂාව කියන්නේ ඔසප් චක්‍රය පිළිබඳව කතා කරන එකම විතරක් නෙමෙයි. සනීපාරක්ෂාවට අවශ්‍ය පහසුකම් පාසල් තුළත්, පොදු සමාජයක් තුළත් තිබීම මූලික අයිතිවාසිකමක් ලෙස රජය සලකනවා. සනීපාරක්ෂාව හංගන්න ඕන දෙයක් නෙවෙයි.ඒ වෙනුවෙන් සමාජය මීට වඩා එකිනෙකාට ගරුත්වය තියෙන සමාජ සාධාරණත්වය හා සමානාත්මතාවය තියන, එකිනෙකාව ආරක්ෂා කරන, එකිනෙකාව රැකබලා ගන්න, මනුෂ්‍යත්වයට මුල් තැන දෙන සමාජයක් බවට පත් කළ යුතුයැයි අමාත්‍යවරිය පැවසුවා ය.
අධ්‍යාපන අමාත්‍යංශයේ අතිරේක ලේකම්වරුන්, පවුල් සෞඛ්‍ය කාර්යංශයේ සහ සෞඛ්‍ය ප්‍රවර්ධන කාර්යංශයේ නිලධාරීන් පාසල් සිසුන් ගුරුවරුන් ඇතුළු පිරිසක් මෙම අවස්ථාවට සහභාගී වූහ.
මාධ්ය ඒකකය.
-
2026 වසරේ සිට ක්‍රියාත්මක කිරීමට නියමිත නව අධ්‍යාපන පරිවර්තන ක්‍රියාවලියට අදාළ මාර්ගෝපදේශ මෙම වසරේ අගෝස්තු මාසයේ එළි දැක්වේ.
2026 වසරේ ක්‍රියාත්මක කිරීමට නියමිත නව අධ්‍යාපන පරිවර්තන ක්‍රියාවලියට අදාළ මාර්ගෝපදේශ මෙම වසරේ අගෝස්තු මාසයේ එළි දැක්වීමට අවශ්‍ය පියවර හා ඒ සම්බන්ධයෙන් ගුරුවරුන් පුහුණු කිරීම පිළිබඳව සාකච්ඡාවක් ජුනි 16 දින මහරගම ජාතික අධ්‍යාපන ආයතනයේදී අධ්‍යාපන, උසස් අධ්‍යාපන හා වෘත්තිය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසුරියගේ සහභාගිත්වයෙන් පැවැත්විණි.
2026 වසරේ සිට 1 සහ 6 ශ්‍රේණි සඳහා නව විෂය නිර්දේශ හඳුන්වා දෙන බවත්, 2028 වර්ෂයේ 10 ශ්‍රේණියට නව විෂය නිර්දේශය හඳුන්වා දීමට නියමිත බවත් නව විෂය නිර්දේශයට අනුව 2029 වර්ෂයේ සාමාන්‍ය පෙළ විභාගය පැවැත්විමට කටයුතු කරන බව හා 9 වන ශ්‍රේණියේ සිට වෘත්තිය අධ්‍යාපනය හඳුන්වා දීමට නියම්ත බව අධ්‍යාපන, උසස් අධ්‍යාපන හා වෘත්තිය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසුරිය පැවසුවාය.
මෙහිදී ජාතික අධ්‍යාපන ආයතනයේ එක් එක් අංශ ප්‍රධානීන් තම අංශ මඟින් මෙම අධ්‍යාපන ප්‍රතිසංස්කරණ වලට අදාළ ක්‍රියාවලිය ක්‍රියාත්මක වන ආකාරය සහ එහි වර්තමාන තත්ත්වය පිළිබඳව අමාත්‍යවරිය දැනුවත් කරන ලදී.මෙය විෂය නිර්දේශය සංශෝධනය කිරිම, ගුරු පුහුණුව, පරිපාලන හා යටිතල පහසුකම් සැලසීම, නිසි ඇඟයීම් ක්‍රියාවලියක් ඇති කිරීම හා මේ සඳහා මහජන දායකත්වය යන කුළුණු 05ක් මත සිදු කරන ලද අධ්‍යාපන පරිවර්තනයක් බව හා මෙහිදී ආකල්පමය අතින් පොහොසත් ගුරුවරුන් නිර්මාණය කිරිම ජාතික අධ්‍යාපන ආයතනවල වගකීම බව අග්‍රාමාත්‍යවරිය පෙන්වා දුන්නාය. තවද මෙම ප්‍රතිසංස්කරණ වලින් නොනැවතී මේවා ක්‍රියාත්මක වන ආකාරය පරීක්ෂා කිරීමට හා විධිමත් ඇගයුම් ක්‍රියාවලියක් නිර්මාණය කිරීමට කටයුතු කරන ලෙසද අමාත්‍යවරිය නිලධාරීන්ට උපදෙස් ලබා දුන්නාය.
මෙම සාකච්ඡාවට අධ්‍යාපන අමාත්‍යාංශ ලේකම් නාලක කළුවැව මහතා, මහරගම ජාතික අධ්‍යාපන ආයතනයේ අධ්‍යක්ෂ ජනරාල් මහාචාර්ය මංජුලා විතානපතිරණ මහත්මිය, එම ආයතනයේ සියලු අංශවල ප්‍රධානීන් සහභාගී වුහ.
-
බලංගොඩ රජවක මහා විද්‍යාලයේ සිදුවීම සම්බන්ධයෙන් මූලික විමර්ශනයක්. අනාරක්ෂිත බවට සැක ගස් පාසලේ ඇත්නම් වහාම ප්‍රාදේශිය ලේකම්ට සහ දැව සංස්ථාවට දැනුම් දෙන්න…
– අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න
බලංගොඩ රජවක මහ විදුහලේ සිදුවීම සම්බන්ධයෙන් මූලික විමර්ශනයක් සිදු කර සතියක් තුළ වාර්තාවක් ලබා දෙන ලෙසත්, අනාරක්ෂිත බවට සැක කරන ගස් පාසල් භූමිය තුළ ඇති නම් වහාම ප්‍රාදේශිය ලේකම්ට සහ දැව සංස්ථාවට දැනුම් දෙන ලෙසත් අධ්‍යාපන සහ උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා පැවසීය.
බලංගොඩ රජවක මහා විද්‍යාලයේ බෝ ගසක කොටසක් කඩා වැටීම හේතුවෙන් සිදු වූ හානිය නිරීක්ෂණය කරමින් වෛද්‍ය මධුර සෙනවිරත්න මහතා මේ බව සඳහන් කළේය.
මෙම සිදුවීම සම්බන්ධයෙන් කමිටුවක් පත්කර මූලික විමර්ශනයක් සිදු කරන ලෙසත්, එහි වාර්තාව සතියක් තුළ ලබා දෙන ලෙසත්, එම වාර්තාව අනුව ඉදිරි ක්‍රියාමාර්ග ගන්නා ලෙස නියෝජ්‍ය අමාත්‍යවරයා මෙහිදී නිලධාරීන්ට පැවසීය.
මේ සම්බන්ධයෙන් වගකීම් පැහැර හැරීමක් සිදුවී ඇතිද යන්න පිළිබඳ විශේෂ අවධානයක් යොමු කරන ලෙස නියෝජ්‍ය අමාත්‍යතුමන් නිලධාරීන්ට දන්වා සිටියේය. විනාශ වු ගොඩනැගිල්ල වෙනුවට නව ගොඩනැගිල්ලක් ඉදිකිරිමට අවශ්‍ය කටයුතු සලසන ලෙසද අමාත්‍යවරයා පැවසීය.
ඒ අනුව සබරගමුව පළාත් අධ්‍යාපන දෙපාර්තමේන්තුව විසින් අතිරේක පලාත් අධ්‍යාපන අධ්‍යක්ෂකවරුන් දෙදෙනෙකු සහ නියෝජ්‍ය අධ්‍යාපන අධ්‍යක්ෂකවරයෙකු ගෙන් සමන්විත ත්‍රිපුද්ගල කමිටුවක් පත්කර ඉදිරි විමර්ශන සිදු කරන බව සබරගමුව පලාත් අධ්‍යාපන අධ්‍යක්ෂ දර්ශනී ඉද්දමල්ගොඩ මහත්මිය පැවසීය.
මේ වන විට බලංගොඩ මූලික රෝහලේ ප්‍රතිකාර ලබන අනතුරට පත් දරුවන්ගේ සුවදුක් විමසීමට ද නියෝජ්‍ය අමාත්‍ය වෛද්‍ය මධුර සෙනෙවිරත්න මහතා කටයුතු කළේය. අනතුරින් තුවාල ලබා රෝහල් ගත කළ පිරිසෙන් හය දෙනෙකු පමණක් රෝහලේ ප්‍රතිකාර ලබන බවත්, ඉතිරි පිරිස ප්‍රතිකාර ලබා පිටව ගිය බවත් බලංගොඩ මූළික රෝහලේ වෛද්‍ය අධිකාරී කේ. ඒ. එල්. එල්. කේ ආරච්චි මහතා පැවසීය. ප්‍රතිකාර ලබන දරුවන් වෙත සුරක්ෂා රක්ෂණාවරණය මගින් වන්දි ලබා දීම හෝ අවශ්‍ය කටයුතු සිදු කිරීම කඩිනම් කරන ලෙස මෙහිදී නියෝජ්‍ය අමාත්‍යවරයා උපදෙස් ලබා දුන්නේය.
අනතුරුව මෙම සිද්ධියෙන් ජීවිතක්ෂට පත් බලංගොඩ, බිබිලේවෙල ප්‍රදේශයේ පදිංචි කලා අංශයේ ඉගෙනුම ලැබූ කිවිර හිරුජය නැමැති 17 හැවිරිදි සිසුවාට අවසන් ගෞරවය දැක් වීමට නියෝජ්‍ය අමාත්‍ය මධුර සෙනෙවිරත්න මහතා සහභාගී විය. සිද්ධිය සම්බන්ධයෙන් රජයේ කණගාටුව ප්‍රකාශ කළ නියෝජ්‍ය අමාත්‍යතුමන් මියගිය දරුවා වෙනුවෙන් අධ්‍යාපන අමාත්‍යංශයේ සහ අපදා කළමනාකරණ දෙපාර්තමේන්තුවේ මැදිහත් වීමෙන් එම පවුලට සාධාරණයක් ඉටු කරන ලෙසත් දන්වා සිටියේය.
සිසුවාගේ අවසන් කටයුතු අද දින සිදු කරන අතර අධ්‍යාපන අමාත්‍යංශය, පළාත් අධ්‍යාපන දෙපාර්තමේන්තුව, පළාත් සභාව ඒ වෙනුවෙන් විශේෂ මැදිහත්වීමක් සිදු කරන ලෙසද නියෝජ්‍ය අමාත්‍ය මධුර සෙනෙවිරත්න මහතා පැවසීය.
දරුවන් ගේ ආරක්ෂාවට මූලික තැනක් ලබා දිය යුතු බවත්, පාසල තුළ අනාරක්ෂිත යැයි හැඟෙන ගස් තිබේ නම් වහාම ප්‍රාදේශීය ලේකම්ට, දැව සංස්ථාවට සහ පළාත් අධ්‍යාපන කාර්යාලයට දැනුම් දෙන ලෙසත්, අදාල අංශ ඒ වෙනුවෙන් කඩිනම් ක්‍රියාමාර්ග ගතයුතු බවත් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතා මෙහිදී පැවසීය.
මෙම අවස්ථාවට පාර්ලිමේන්තු මන්ත්‍රිවරුන් වන වසන්ත පුෂ්පකුමාර, සුනිල් රාජපක්ෂ, බලංගොඩ කළාප අධ්‍යාපන අධ්‍යක්ෂ ප්‍රභාත් වර්ණසූරිය, ඇතුළු පිරිසක් සහභාගී වූහ.
මාධ්ය ඒකකය.
-
විශ්ව විද්‍යාල ශිෂ්‍ය නේවාසිකාගාර පහසුකම් පිළිබඳව නිර්ණායකයන් ඇතුළත් ජාතික ප්‍රතිපත්තියක් සකස් කිරීමට යෝජනා…
රාජ්‍ය විශ්වවිද්‍යාලයන්හී ශිෂ්‍ය නේවාසිකාගාර පහසුකම් පිළිබඳ ව සොයා බැලීමට පත් කළ කමිටුව හා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් අධ්‍යාපන අමාත්‍යාංශයේ දී පැවැත්විණි.
මෙහිදී නව දෙනෙකුගෙන් යුත් මෙම කමිටුව විසින් රාජ්‍ය විශ්ව විද්‍යාලවලට අයත් ශිෂ්‍ය නේවාසිකාගාරවල පවතින ගැටලු පිළිබඳ වාර්තාවක් අග්‍රාමාත්‍යවරිය වෙත ඉදිරිපත් කරන ලද අතර, එම වාර්තාව සැලකිල්ලට ගෙන ශිෂ්‍ය නේවාසිකාගාරවලට අවශ්‍ය පහසුකම් කඩිනමින් ලබාදීම කෙරෙහි අග්‍රාමාත්‍යවරියගේ අවධානය මෙහිදී යොමු විය.
එසේම, අධ්‍යාපන අමාත්‍යාංශය, විශ්ව විද්‍යාල ප්‍රතිපාදන කොමිෂන් සභාව සහ විශ්ව විද්‍යාල සිසුන් සම්බන්ධ කරගනිමින් නේවාසිකාගාර පහසුකම් පිළිබඳව නිර්ණායකයන් ඇතුළත් ජාතික ප්‍රතිපත්තියක් සකස් කිරීමට ද මෙහිදී යෝජනා විය.
මෙම අවස්ථාවට කමිටුවේ සභාපති මහාචාර්ය කේ.එල් වසන්ත කුමාර මහතා ඇතුළු කමිටු සාමාජිකයින් එක්ව සිටියහ.
මාධ්ය ඒකකය.
-
විදුහල්පති වෘත්තීය සංගම් හා අධ්‍යාපනය අමාත්‍යවරිය අතර හමුවක්…
විදුහල්පති වෘත්තීය සංගම් තුනක් හා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය අතර හමුවක් ජුලි 11 දින අධ්‍යාපන අමාත්‍යාංශයේදී පැවැත්විණි.
මෙහිදී විදුහල්පති සේවාවේ පවතින වැටුප් විෂමතා, උසස් වීම් හා විදුහල්පති සේවය ආශ්‍රිතව පවතින ගැටලු අධ්‍යාපන අමාත්‍යවරිය වෙත ඉදිරිපත් කරන ලදී.
මෙම ගැටලු සොයා බලා සුදුසු ක්‍රියාමාර්ග පිළිබඳව වාර්තාවක් ලබාදෙන ලෙස අධ්‍යාපන අමාත්‍යාංශ නිලධාරීන් වෙත අග්‍රාමාත්‍යවරිය උපදෙස් ලබා දුන්නාය.
මෙම හමුවට අධ්‍යාපන අමාත්‍යාංශයේ නිලධාරීන් සහ විදුහල්පති වෘත්තීය සංගම් නියෝජිතයින් සහභාගී වූහ.
-
ජාතික මට්ටමේ තොරතුරු හා සන්නිවේදන තාක්ෂණ ශූරයෝ තරගාවලිය -2025
- ලියාපදිංචි වීමේ අවසාන දිනය – 2025.07.15
- ව්‍යාපෘති ඉදිරිපත් කිරීමේ අවසන් දිනය – 2025.08.15
වැදගත් :- සියලුම සහභාගිවන්නන් තරඟය සඳහා ලියාපදිංචි විය යුත්තේ මාර්ගගත අයදුම්පත්‍රය භාවිතා කිරීමෙන් පමණි.
ජාතික මට්ටමේ පාසල් මෘදුකාංග තරගාවලිය – (NSSC)
ලියාපදිංචි වීම
තරගය සඳහා අයදුම් කිරීමට C හෝ C++ හෝ Java හෝ C# හෝ පිළිබද මූලික දැනුමක් තිබිය යුතු ය.
- ලියාපදිංචියට අදාළ අයදුම්පත සම්පූර්ණ කර විදුහල්පති සහතික කිරීමෙන් අනතුරුව එහි පරිලෝකිතය (Scan Copy) මාර්ගගත අයදුම්පත්‍රයේ අදාළ ස්ථානයේ උඩුගත.(Upload) කළ යුතුය.
- මාර්ගගත අයදුම්පත සම්පූර්ණ කිරීමේ දී එකම පාසලකින් ශිෂ්‍යයන් කිහිපදෙනෙකු සහභාගී වන අවස්ථාවකදී, එක් එක් ශිෂ්‍යයෙකු විසින් වෙනම අයදුම්පත් පත්‍රයක් ඉදිරිපත් කළ යුතුය. ශිෂ්‍යයන් කිහිප දෙනාගේ තොරතුරු එකම අයදුම්පත් පත්‍රයක ඇතුළත් කිරීම අනුමත නොවේ. තවද , සෑම ශිෂ්‍යයෙකුම වෙන වෙනම මාර්ගගත ලියාපදිංචියක් සිදු කළ යුතුය.
මාර්ගගත අයදුම්පත සදහා මෙතනින් පිවිසෙන්න.
තරුණ පරිගණක විද්‍යාඥයින්ගේ තරගාවලිය –(YCS)
ලියාපදිංචි වීම
නිර්මාණ ඉදිරිපත් කිරීම
- නිර්මාණ ඉදිරිපත් කිරීමට අදාළ විස්තර ඔබ විසින් ලබා දී ඇති විද්‍යුත් තැපෑල ඔස්සේ යොමු කෙරේ. (එබැවින් ඔබගේ විද්‍යුත් තැපෑල නිරන්තරයෙන් පරීක්ෂා කරන්න)
ගුරුවරුන් සදහා වන නිර්මාණාත්මක ගුරුවරු තරගාවලිය
ලියාපදිංචි වීම
•ලියාපදිංචියට අදාළ අයදුම්පත සම්පූර්ණ කර විදුහල්පති සහතික කිරීමෙන් අනතුරුව එහි පරිලෝකිතය (Scan Copy) මාර්ගගත අයදුම්පත්‍රයේ අදාළ ස්ථානයේ උඩුගත (Upload) කළ යුතුය.
•මාර්ගගත අයදුම්පත සදහා මෙතනින් පිවිසෙන්න.
නිර්මාණ ඉදිරිපත් කිරීම
විදුහල්පතිවරයා විසින් සහතික කරන ලද ඉහත අයදුම්පත්‍රය සමග නිර්මාණ ඇතුළත් සංයුක්ත තැටිය අධ්‍යාපන අධ්‍යක්ෂ, තොරතුරු හා සන්නිවේදන තාක්ෂණ ශාඛාව, 4 වන මහල, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය, ඉසුරුපාය,බත්තරමුල්ල යන ලිපිනය වෙත යොමු කරන්න.
අධ්‍යාපන විද්‍යාපීඨ ගුරු සිසුන් සදහා වන නිර්මාණාත්මක ගුරුවරු තරගය
ලියාපදිංචි වීම
ලියාපදිංචියට අදාළ අයදුම්පත සම්පූර්ණ කර අධ්‍යාපන විද්‍යාපීඨයේ පීඨාධිපති සහතික කිරීමෙන් අනතුරුව එහි පරිලෝකිතය (Scan Copy) මාර්ගගත අයදුම්පත්‍රයේ අදාළ ස්ථානයේ උඩුගත (Upload) කළ යුතුය.
•මාර්ගගත අයදුම්පත සදහා මෙතනින් පිවිසෙන්න.
නිර්මාණ ඉදිරිපත් කිරීම
අධ්‍යාපන විද්‍යාපීඨයේ පීඨාධිපති විසින් සහතික කරන ලද ඉහත අයදුම්පත්‍රය සමග නිර්මාණ ඇතුළත් සංයුක්ත තැටිය අධ්‍යාපන අධ්‍යක්ෂ, තොරතුරු හා සන්නිවේදන තාක්ෂණ ශාඛාව, 4 වන මහල, අධ්‍යාපන අමාත්‍යාංශය, ඉසුරුපාය,බත්තරමුල්ල යන ලිපිනය වෙත යොමු කරන්න.
-
විශ්වවිද්‍යාල ආචාර්ය සමිති සම්මේලනය අගමැතිනිය හමුවෙයි.
විශ්වවිද්‍යාල ආචාර්යවරුන්ගේ වැටුප් විෂමතා පිලිබඳ දැනුම්වත් කිරීම වෙනුවෙන් විශ්වවිද්‍යාල ආචාර්යවරුන්ගේ සමිති සම්මේලනයේ නිලධාරීන් සහ මුදල් නියෝජ්‍ය අමාත්‍ය අනිල් ජයන්ත, අධ්‍යාපන නියෝජ්‍ය අමාත්‍ය මධුර සෙනෙවිරතන, ඇතුළු නිලධාරීන් සමඟ සාකච්ඡාවක් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරියගේ ප්‍රධානත්වයෙන් පාර්ලිමේන්තු පරිශ්‍රයේදී පැවැත්විණි.
විශ්වවිද්‍යල ආචාර්යවරුන් මුහුණ දෙන වැටුප් ගැටලු පිළිබඳව මෙහිදි රජය දැනුම්වත් කිරීමට ආචාර්යවරුන්ගේ සමිති සම්මේලනය කටයුතු කළේය.
එහිදී 2025 වසරේ සිදු කළ වැටුප් වැඩි කිරීමේදී රාජ්‍ය සේවකයන් සහ විශ්වවිද්‍යාල ආචාර්යවරුන්ගේ වැටුප් වැඩිවීම අතර වෙනසක් පවතින බවත්, විශ්වවිද්‍යාල අනධ්‍යන සේවකයන් සහ ආචාර්යවරුන් අතර ද වැටුප් වැඩි කිරීමේ දී විෂමතාවක් නිර්මාණය වී ඇති බවත් මෙහිදී විශ්වවිදයාල ආචාර්යවරුන්ගේ සමිති සම්මේලනය පැවසීය.ඒ අනුව විශ්වවිද්‍යාල ආචාර්යවරුන්ගේ වැටුප් සම්බන්ධයෙන් පවතින තාක්ෂණික කාරණා පිළිබඳ අදාළ නිලධාරීන් සමග පළමුව සාකච්ඡා කිරීමටත්, එළඹෙන තීරණ අනුව ඉදිරි ක්‍රියා මාර්ග ගැනීමටත් එහිදී තීරණය විය.
විශ්වවිද්‍යාල ආචාර්යවරුන්ගේ සමිති සම්මේලනයේ සභාපති අනුරුද්ධ කරුණාරත්න, ලේකම් චාරුදත්ත ඉලන්ගසිංහ යන මහත්වරුන් ඇතුළු අධ්‍යාපන අමාත්‍යාංශය, විශ්වවිද්‍යාල ප්‍රතිපාදන කොමිෂන් සභාව, කළමනාකරණ සේවා දෙපාර්තමේන්තුව යන ආයතනවල නිලධාරීන් මෙම අවස්ථාවට සහභාගී විය.
-
නව ප්‍රතිසංස්කරණ කටයුතු පිලිබඳ සමීක්ෂණය කර නියාමනය කරන්න. අධ්‍යාපන, උසස් අධ්‍යාපන සහ වෘත්තීය අධ්‍යාපන, අමාත්‍ය අග්‍රාමාත්‍ය ආචාර්ය හරිනි අමරසූරිය ජාතික අධ්‍යාපන කොමිසමට උපදෙස් දෙයි.
ජාතික අධ්‍යාපන කොමිසමේ නව නිලධාරී මණ්ඩලය සහ අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් ජාතික අධ්‍යාපන කොමිසමේදී පැවැත් විණි.
නව නිලධාරී මණ්ඩලය හඳුන්වා දීම මෙහිදී සිදු වූ අතර අග්‍රාමාත්‍යවරිය විසින් නව අධ්‍යාපන ප්‍රතිසංස්කරණ වෙනුවෙන් කරගෙන යන කාර්ය භාරය මෙහිදී පැහැදිළි කළාය.
නව අධ්‍යාපන ප්‍රතිසංස්කරණය 2026 සිට ආරම්භ කිරීමට සූදානම් බවත්, ඒ වෙනුවෙන් අධ්‍යාපන අමාත්‍යංශය යටතේ පවතින ආයතන ඒකාබද්ධව නිසි ක්‍රමවේදයකට කටයුතු කළ යුතු බවත් අමාත්‍යවරිය මෙහිදී පැවසීය.
නව අධ්‍යාපන ප්‍රතිසංස්කරණ සිදු කිරීමේදී ජාතික අධ්‍යාපන කොමිසමේ කාර්යභාරය පිලිබඳව මෙහිදී දීර්ඝ ලෙස සාකච්ඡා කළේය. එහිදී කොමිසමේ පවතින ගැටළු පිලිබඳවත්, ඉදිරියේදී කළයුතු වැඩසටහන් පිළිබඳවත් අමාත්‍යවරිය කරුණු පැහැදිළි කළාය.
නව අධ්‍යාපන ප්‍රතිසංස්කරණ සිදු කිරීමේදී පාසල් පිලිබඳ සමීක්ෂණ සිදු කිරීමත්, නියාමනය කිරීමත් ජාතික අධ්‍යාපන කොමිසමට පැවරෙන බව ද පැවසූ අමාත්‍යවරිය අධ්‍යාපන ප්‍රතිපත්ති වඩාත් තීව්‍ර ව සිදු කිරීම සඳහා අධ්‍යාපන අමාත්‍යාංශය, ජාතික අධ්‍යාපන ආයතනය සහ ජාතික අධ්‍යාපන කොමිෂම ඒකාබද්ධ ව කටයුතු කරන ලෙසද වැඩිදුරටත් අමාත්‍යවරිය මෙහිදී පැවසුවාය.
අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශයේ ලේකම් නාලක කලුවැව, ජාතික අධ්‍යාපන කොමිසමේ සභාපති මහාචාර්ය ඒ. සරත් ආනන්ද, උප සභාපති තිලක් ධර්මරත්න යන මහත්වරුන් ඇතුළු කොමිසමේ සාමාජිකයින් මෙම අවස්ථාවට සහභාගී විය.
-
ජගත් පරිසර දිනයට සමගාමීව ‘දලුලන්න ඉඩ දෙන්න’ තේමාව යටතේ
රුක් රෝපණ වැඩසටහනක් ‘ඉසුරුපායේ ‘ දී ආරම්භ වෙයි.
‘දලුලන්න ඉඩ දෙන්න’ තේමාව යටතේ ජාතික පරිසර සති සැමරුම හා ඊට සමගාමී ව යෙදී ඇති රුක් රෝපණ දින වැඩසටහන ක්‍රියාවට නංවමින් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය, ආචාර්ය හරිනි අමරසූරිය අග්‍රාමාත්‍යවරිය අද දින පෙරවරුවේ ‘ඉසුරුපාය’ අමාත්‍යාංශ පරිශ්‍ර භූමියේදී පලතුරු පැළයක් රෝපණය කළා ය.
අමාත්‍යවරියගේ ප්‍රධානත්වයෙන් පැවැති ජගත් පරිසර දින සැමරුම් දී අග්‍රාමාත්‍යවරිය ප්‍රකාශ කළේ, ඉදිරි පරපුරට සම්පත් ඉතිරි කර දීමේ තිරසර සංවර්ධන අරමුණු කරා යන ගමනේ දී සොබාදහම හා පරිසරය සුරැකීම පිළිබඳ යහ ආකල්පමය සිතුම්පැතුම් සහිත සංස්කෘතියක් ගොඩනැංවීම උදෙසා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයට පැහැර හැරිය නොහැකි නියමු කාර්යභාරයක් පැවරී ඇති බවයි.
එමෙන් ම සොබාදහම හා පරිසරය සමඟ ඇති කරගන්නා අවියෝජනීය බැඳීම මත වර්තමානයේ අප මුහුණ පා සිටින දේශගුණික විපර්යාසයන්ගෙන් මිදී මතු පරපුර උදෙසා ගහකොළ වන බිම් ඇතුළු ස්වාභාවික පරිසරය සුරැකීමේ දීපව්‍යාප්ත කාර්යභාරය, අමාත්‍යාංශ මට්ටමින් ‘දලුලන්න ඉඩ දෙන්න’ නමින් අද දින සංකේතාත්මක ව ආරම්භ කළ බව ද අමාත්‍යවරිය මෙහි දී වැඩිදුරටත් පැවසුවා ය.
එම වැඩසටහනේ ඉදිරි පියවරයන්හි දී සියලු දෙනා දෛනික ජීවන රටාව තුළ පරිසරය හා සොබාදහම පිළිබඳ මනා විධිමත්බවකින් හා සංවේදීබවකින් කටයුතු කිරීම අපේක්ෂිත වන අතර ඒ අනුව අනවශ්‍ය ලෙස එක විදුලි පහනක් පවා නොදැල්වීම, නිකරුණේ කඩදාසි කොළයක් හෝ නාස්ති නොකිරීම, ප්ලාස්ටික් පොලිතීන් භාවිතයෙන් හැකිතාක් මිදී පරිසර හිතකාමී ජීවන රටාවකට හුරු වීම වැනි හැසිරීම් මගින් අප සියලු දෙනා ද පරිසරයේ ම කොටසක් ය, යන හැඟීම සහිත ව කටයුතු කළ යුතු ව ඇති බවත් අමාත්‍යවරිය මෙහි දී පැවසී ය.
මෙම අවස්ථාවට අධ්‍යාපන හා උසස් අධ්‍යාපන නියෝජ්‍ය අමාත්‍ය මධුර සෙනෙවිරත්න, අමාත්‍යාංශ ලේකම් නාලක කලුවැව, අතිරේක ලේකම් වසන්ත ගුණරත්න යන මහත්වරුන් ඇතුළු නිලධාරීහු සහභාගි වූහ.
මාධ්ය ඒකකය.මාධ්ය ඒකකය.
-
පාසල් පරිශ්‍රවල ඩෙංගු සහ චිකුන්ගුන්යා රෝග නිවාරණය සඳහා කටයුතු සිදු කිරීම
මෝසම් වැසි සමය එළඹීමත් සමඟ දිවයින පුරා ඩෙංගු රෝගය සහ විකුන්ගුන්යා රෝග පැතිර යාමේ දැඩි අවදානමක් පවතින බවත්, 2025 මැයි 31 වැනි දින දක්වා දිවයිනේ විවිධ ප්‍රදේශ වලින් වාර්තා වූ ඩෙංගු රෝගීන් අතරින් ඉහළ ප්‍රතිශතයක් වයස අවුරුදු 5 ත් 19 ත් අතර පාසල් වයසේ පසු වන දරුවන් බවත් සෞඛ්‍ය අංශ මගින් දැනුවත් කර ඇත.
එබැවින් පාසල් ආශ්‍රිත පරිසරය මදුරුවන්ගෙන් තොර ව ආරක්ෂිත ව පවත්වාගෙන යාම සඳහා මීට පෙර නිකුත් කර ඇති 2010/22 හා 30/2017 චක්‍රලේඛ හා උපදෙස් ලිපි වලට අමතර ව ගතයුතු ක්‍රියාමාර්ග හා උපදෙස් නිකුත් කර ඇති අතර සිසු දරුවන් හා අධ්‍යයන / අනධ්‍යයන කාර්ය මණ්ඩලවල සෞඛ්‍ය ආරක්ෂාව වෙනුවෙන් එම උපදෙස් පිළිපදින ලෙස සියලු පලාත් අධ්‍යාපන අධ්‍යක්ෂකවරුන්, කලාප අධ්‍යාපන අධ්‍යක්ෂවරුන් ඇතුලු නිලධාරීන් දැනුම්වත් කර ඇත.
ඒ අනුව සියලුම රජයේ හා රජයේ අනුමත පෞද්ගලික පාසල්වල විදුහල්පතිවරුන්, පිරිවෙන්වල පරිවේනාධිපතිවරුන්, ජාතික අධ්‍යාපන විද්‍යාපීඨවල පීඨාධිපතිවරුන් සහ පළාතේ අනෙකුත් අධ්‍යාපන මධ්‍යස්ථාන හා කාර්යාල ප්‍රධානීන් මෙයින් දැනුම්වත් කෙරේ.
අදාල උපදෙස් පත්‍රය මේ සමඟ අමුණා ඇත.
මාධ්ය ඒකකය.
-
රාජ්‍ය සේවා ප්‍රතිඥා සමගින් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයීය සමස්ත කාර්ය මණ්ඩලය නව වසරේ දී ‘ක්ලීන් ශ්‍රී ලංකා’ වැඩසටහන හා එක් වෙයි
අධ්‍යාපන හා උසස් අධ්‍යාපන නියෝජ්‍ය අමාත්‍ය වෛද්‍ය මධුර සෙනෙවිරත්න මහතාගේ හා අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ ලේකම් නාලක කලුවැව මහතාගේ ප්‍රධානත්වයෙන් අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශයේ කාර්ය මණ්ඩලය 2025 නව වර්ෂාරම්භය සනිටුහන් කර අද උදෑසන ‘ඉසුරුපාය’ පරිශ්‍රයේ දී රාජ්‍ය සේවා ප්‍රතිඥාව ලබා දීම සිදු කළහ.
මේ අවස්ථාවේ දී ජනාධිපති අනුර කුමාර දිසානායක මහතාගේ සංකල්පයක් මත ක්‍රියාත්මක ‘ක්ලීන් ශ්‍රී ලංකා’ වැඩසටහන සමගින් ද අමාත්‍යාංශ නිලධාරීන් ඇතුළු කාර්ය මණ්ඩලය එක් වූහ. තිරසර අනාගතයක් සඳහා විසඳුම් වශයෙන් මෙරට පාලන, සමාජ, පාරිසරික හා ආර්ථික ක්ෂේත්‍රයන්හි තිරසරභාවය ඇති කිරීම උදෙසා ප්‍රධාන අරමුණු හතරක් කෙරෙහි මෙහි දී කාර්ය මණ්ඩලයේ අවධානය යොමු කෙරිණ.
තවදුරටත් ඉවසා දරාගෙන සිටීමකින් තොර ව දූෂණයට එරෙහි වීම හා ඒ වෙනුවෙන් ඇති මහජන වගවීම හා දක්වන විශිෂ්ට ත්‍යාගශීලී ගුණය, එසේ ම පාරිසරික වගවීම හා සමාජ විඥානය පිළිබඳ මානසිකත්වයක් ඇති කරගැනීම, ස්වාභාවික සම්පත් භාවිතය ප්‍රශස්ත කිරීම මගින් පිරිසිදු හා තිරසර පරිසරයක් සහතික කිරීම සහ රාජ්‍ය හා පෞද්ගලික අන්තර් සම්බන්ධීකරණය හරහා යටිතල පහසුකම් වැඩිදියුණු කිරීම මගින් අපද්‍රව්‍ය කළමනාකරණ පද්ධතිය ශක්තිමත් හා විධිමත් කිරීම යන ප්‍රධාන අරමුණු පිළිබඳ මෙහි දී පැහැදිලි අවබෝධයක් ලබා දීම සිදු විය.
මාධ්ය ඒකකය
