-අධ්‍යාපන අමාත්‍ය සුසිල් ප්‍රේමජයන්ත
වගකිව යුතු පරිපාලන ධුර හෙබවූ නිලධාරීන් ඇතුළු රාජ්‍ය සේවයේ විශාල පිරිසක් වාර්තාගත ලෙස පසුගිය සිකුරාදා එක වර විශ්‍රාම යෑමෙන් අනතුරු ව ඒ පුරප්පාඩු පුරවමින් අද සඳුදා දින වැඩ භාර ගත් නව නිලධාරීන් සමග 2023 නව වර්ෂයට පිවිසෙද්දී පෙර වර්ෂයේ ඉතිරි වූ ගැටලු මෙන් ම දේශගුණික විපර්යාස වැනි නව අභියෝග ද ජයගනිමින් බහුතර ජනතා පැතුම වන පවත්නා ක්‍රමයෙහි වෙනස, විප්ලවීය අධ්‍යාපන පරිවර්තන ක්‍රියාදාමය ඔස්සේ සිදු කළ යුතු ව ඇතැයි අධ්‍යාපන අමාත්‍ය ආචාර්ය සුසිල් ප්‍රේමජයන්ත මහතා නව වසරට සුබ පතමින් අධ්‍යාපන අමාත්‍යාංශයේ සේවක පිරිස හමුවේ ප්‍රකාශ කළේ ය.
මේ වන විට ලෝකය ම පොදු දේශගුණික විපර්යාසයන්ට අහිතකර අන්දමින් නිරාවරණය වෙමින් සිටීමේ අභියෝගයට තීරණාත්මක ලෙස මුහුණ දීමට සිදු ව තිබෙන අතර වර්තමානයේ බොහෝ රටවල් මුහුණ දී සිටින අධික ශීත කාලගුණ තත්වය වෙනස් වී ඉදිරියේ දී එහි ප්‍රතිවිරුද්ධ දේශගුණ විපර්යාසයකට වුව මුහුණ පෑමට අපට සිදු විය හැකි බව පැවසූ අමාත්‍යවරයා අනිකුත් ගෝලීය ගැටලු හා අභියෝග මධ්‍යයේ වුව අධ්‍යාපන පරිවර්තනීය වෙනස සිදු කිරීමේ අත්‍යවශ්‍යභාවය පැහැදිලි කළේ ය. එම පරිවර්තනය, හුදෙක් පුද්ගල මාරුවකට පමණක් සීමා නොවී අපට දැරිය හැකි මට්ටමේ වෙනස්කම් සහිත පරිපාලන ව්‍යුහය තුළින් ම ඇරඹෙන ප්‍රායෝගික වූවක් විය යුතු බවත් සාමාන්‍ය පෙළ, උසස් පෙළ ආදි විභාග පැවැත්වීම වැනි අනෙකුත් අධ්‍යාපන කාර්යන් අතරතුර ම එය සිදු කරමින් අඛණ්ඩ ව ඉදිරියට ගලා යා යුතු බවත් අමාත්‍යවරයා පැවසී ය.
නව රාජකාරි ලයිස්තු සමගින් කැපවීමෙන් රාජකාරි ආරම්භ කළ යුතු බව පෙන්වා දුන් අමාත්‍යවරයා, දරුවන්ගේ පමණක් කාර්ය සාධනය මැනීම කිසි සේත් ප්‍රමාණවත් නොවන අතර නිලධාරීන්ගේ මෙන් ම දේශපාලනඥයන්ගේ පවා කාර්ය සාධනය මැන බැලීම රටක දියුණුවේ අනිවාර්ය සාධකයක් බවත් මෙහි දී අවධාරණය කළේ ය.
පන්ති කාමරයට යන ගුරුවරයාගේ ගුණාත්මකභාවය පිළිබඳ සිසුන් හා දෙමාපියන් තුළ විශ්වාසයක් ජනිත කරවීමට සමත් වීම හරහා සිසුන්ගේ පාසල් පැමිණීම ප්‍රවර්ධනය කිරීම තුළ සැමට ගුණාත්මක අධ්‍යාපනයක් ලබා දීමේ තිරසර සංවර්ධන ඉලක්ක සපුරා ගැනීමට යොමු වීම ඉතා වැදගත් බවත් අමාත්‍යවරයා වැඩිදුරටත් අදහස් දක්වමින් පැවසී ය.
2024 වර්ෂය ආරම්භ වන විට 2023 වර්ෂය දෙස ආපසු හැරී බලා සතුටු විය හැකි වන ලෙස සියලු දෙනා එක් ව කැපවීමෙන් පැවති ක්‍රමයට වඩා වෙනස් ව වැඩ කර අනාගත දරු පරපුරට එහි ප්‍රතිලාභ උරුම කර දිය යුතු බව ද අමාත්‍යවරයා මෙහි දී පැවසී ය.
