අනාගත වැඩලෝකය හා බද්ධ තාක්ෂණික දැනුමින් සන්නද්ධ ගුරු සිසු පරපුරක් උදෙසා අධ්‍යාපනයේ දිශානතිය යොමු කෙරෙන බව අධ්‍යාපන ඇමති පවසයි…
නව තාක්ෂණය වෙත දරුවන් ප‍්‍රමුඛ අධ්‍යාපන ක්ෂේත‍්‍රය ම යොමු වීම, පසුගිය ව්‍යසන සමයේ අත්දුටු සාධනීය වෙනසක් බව 2022 මැයි 04 වන දින අධ්‍යාපන අමාත්‍යාංශ පරිශ‍්‍රයේ පැවති සිය ප‍්‍රථම උත්සව සභාව අමතමින් අධ්‍යාපන සහ වැවිලි කර්මාන්ත අමාත්‍ය වෛද්‍ය රමේෂ් පතිරණ මහතා ප‍්‍රකාශ කළ අතර පාසල තුළ දරුවාට ඇති අධ්‍යාපන පීඩනය අවම කර, ඔවුන් වැඩ ලෝකය හා ප‍්‍රායෝගික ව බද්ධ කිරීමත් පාසල් පද්ධතියට නව තාක්ෂණය හා භාෂා දැනුම ලබා දීමත් තම ධුර කාලය තුළ ඉටු කරගැනීමට අපේක්ෂිත ප‍්‍රධාන ම අභිමතාර්ථ ද්විත්වය වන බවත් පෙන්වා දුන්නේ ය.
නිදහසට පෙර වසර 450ක කාලයක් තුළ ශ‍්‍රී ලංකාවේ පැවති 3000ක පාසල් සංඛ්‍යාව නිදහසින් පසු මේ දක්වා වසර 73ක් තුළ පාසල් 10,000ක් දක්වා සංඛ්‍යාත්මක ව ප‍්‍රසාරණය වී ඇති අතර ශ‍්‍රී ලංකා ජාතික විශ්වවිද්‍යාලය නමින් පැවති එක ම විශ්වවිද්‍යාලය වෙනුවට අද රජයේ විශ්වවිද්‍යාල පමණක් 17ක් හා පිළිගත හැකි මට්ටමේ පෞද්ගලික විශ්වවිද්‍යාල ද 40ක් පවතින බවත් 1948 දී 52%ක් වූ දරුවන් පාසල් පැමිණීමේ ප‍්‍රතිශතය අද 99% දක්වා වර්ධනය වී ඇති බවත් සඳහන් කරමින් ආධ්‍යාපනික ගමන්මගේ සාධනීය සන්ධිස්ථාන සිහිපත් කළ අමාත්‍යවරයා මේ වර්ධනය අඛණ්ඩ ව ඉදිරියට ගෙන යෑමේ වැදගත්කම වටහා ගනිමින් විවිධ මූල්‍ය දුෂ්කරතා හමුවේ වුව විශ්වවිද්‍යාල ප‍්‍රවේශ අවස්ථා 30,000 සිට 40,000 දක්වා පුළුල් කර රුපියල් බිලියන 30ක වාර්ෂික වැටුප් වර්ධක ප‍්‍රමාණයක් ගුරුභවතුන් උදෙසා ලබා දීමටත් වත්මන් රජය ක‍්‍රියා කළ අතර මේ සියල්ල හරහා අනාගත වැඩලෝකයට ගැළපෙන නව තාක්ෂණික දැනුමෙන් පොහොසත් සමබර මනසක් සහිත දරුවකු බිහි කරගැනීමට අවශ්‍ය ආධ්‍යාපනික දිශානතියකට නැඹුරු ව බාධක මධ්‍යයේ වුව ගමන් කිරීම රජයේ මුඛ්‍ය අරමුණ බව වැඩිදුරටත් සඳහන් කළේ ය.
ජාතික පාසල් දහසක් සංවර්ධනය කිරීමේ ජාතික වැඩසටහනට සමගාමී ව දිවයිනේ සෙසු පාසල්වල ප‍්‍රමිතිගත තුලනාත්මක සංවර්ධනය සඳහා ක‍්‍රියාත්මක පොකුරු පාසල් හා ත්‍රෛභාෂා පාසල් ව්‍යාපෘති දෙක යටතේ එම පාසල්වල යටිතල පහසුකම් හා සේවා සම්පාදනයට අවශ්‍ය පාසල් උපකරණ ලබා දීමේ වැඩසටහනට එක් වෙමින් අධ්‍යාපන අමාත්‍යවරයා මේ අදහස් දැක්වී ය.
අධ්‍යාපන සේවා රාජ්‍ය අමාත්‍ය පියල් නිශාන්ත මහතාගේ විෂය මූලිකත්වයෙන් අධ්‍යාපන සේවා රාජ්‍ය අමාත්‍යාංශය හා එක් ව ‘නිදහස් දහසක්’ මැයෙන් 2021 සිට සිව් වසරක් සඳහා ක‍්‍රියාවට නංවා ඇති මේ වැඩසටහනේ දී පළමු අදියර තුළ විද්‍යා, ක‍්‍රීඩා, සෞන්දර්ය අධ්‍යයන, තොරතුරු තාක්ෂණ, කෘෂි යන ක්ෂේත‍්‍රවලට අදාළ උපකරණ, ගුරු-සිසු පුුටු-මේස වශයෙන් පොකුරු පාසල් සඳහා රුපියල් මිලියන 20.6ක් හා ත්‍රෛභාෂා පාසල් සඳහා රුපියල් මිලියන 56.5ක් වශයෙන් වූ මූල්‍යමය වටිනාකමක් සහිත උපකරණ ලබා දීම සිදු විය.
මේ උත්සව අවස්ථාවට අධ්‍යාපන ලේකම් මහාචාර්ය කේ. කපිල සී. කේ. පෙරේරා මහතා සහ අධ්‍යාපන සේවා රාජ්‍ය අමාත්‍යාංශයේ ලේකම් කේ. එම්. එස්. ඞී. ජයසේකර මහත්මිය ඇතුළු නිලධාරීහු එක් ව සිටියහ.
