ජාතික අධ්‍යාපන ආයතනය(NIE) ප්‍රථමවරට හඳුන්වාදෙන අධ්‍යාපනික තක්සේරුව හා ඇගයීම පිළිබඳ ඩිප්ලෝමා පාඨමාලාව අද සිට ඇරඹෙයි
අදක්ෂයින් අතහැර දක්ෂයින් තෝරාගැනීම වෙනුවට, කිසිදු දරුවකු අධ්‍යාපනයෙන් මඟනොහැර, දැනුම සහ දක්ෂතා අත්පත් කරදීමට සමත් ඇගයුම් හා තක්සේරුකරණ වැඩපිළිවෙළක් අධ්‍යාපන පද්ධතිය තුළ ස්ථාපිත කිරීම ඉදිරි අධ්‍යාපන ප්‍රතිසංස්කරණ ක්‍රියාදාමය තුළ මතුවන අතිශයින් කාලෝචිත ජාතික අවශ්‍යතාවක් ලෙස ජාතික අධ්‍යාපන ආයතනය (NIE)) හඳුනාගෙන සිටී.
ඒ අනුව, මෙරට අධ්‍යාපන පද්ධතිය තුළින් විසිඑක්වැනි සියවසේ අභියෝගවලට සාර්ථකව මුහුණ දිය හැකි සුහුරු මානව සම්පත් බිහිකිරීම වෙනුවෙන් අධ්‍යාපන ක්ෂේත්‍රයේ නිරත අධ්‍යාපනඥයින්, විදුහල්පතිවරුන්, ගුරුවරුන් ඇතුළු සියලු වෘත්තීකයන් වෙත ජාතික අධ්‍යාපන ආයතනයේ විභාග දෙපාර්තමේන්තුව විසින් ප්‍රථමවරට හඳුන්වාදෙනු ලබන අධ්‍යාපනික තක්සේරුව හා ඇගයීම් පිළිබඳ ඩිප්ලෝමා පාඨමාලාව අද (18) සිට ආරම්භ කෙරිණි.
අධ්‍යාපන රාජ්‍ය ලේකම් ආචාර්ය උපාලි සේදර, විභාග කොමසාරිස් ජනරාල් සනත් පූජිත, ජාතික අධ්‍යාපන ආයතනයේ අධ්‍යක්ෂ ජනරාල් ආචාර්ය සුනිල් ජයන්ත නවරත්න (වීඩියෝ තාක්ෂණය ඔස්සේ) මහතාගේ ප්‍රධානත්වයෙන් හා ජාතික අධ්‍යාපන ආයතනයේ නියෝජ්‍ය අධ්‍යක්ෂ ජනරාල් දර්ශන සමරවීර, විභාග කොමසාරිස් (පර්යේෂණ හා සංවර්ධන) ගයාත්‍රී අබේගුණසේකර, ජාතික අධ්‍යාපන ආයතනයේ විභාග දෙපාර්තමේන්තුවේ අධ්‍යක්ෂිකා පද්මිණි පෙරේරා මහත්මිය ඇතුළු ආයතනයේ ජ්‍යේෂ්ඨ නිලධාරීන් රැසකගේ සහභාගීත්වයෙන් ජාතික අධ්‍යාපන ආයතන පරිශ්‍රයේ දී මෙම සමාරම්භක හමුව පැවැත්විණි.
ඉගෙනුම්-ඉගැන්වීම් මෙන්ම ඇගයීම් හා තක්සේරුකරණය සම්බන්ධව පැවති සාම්ප්‍රදායික සුසමාදර්ශයන්හි වෙනසක් සිදුව ඇති මෙවන් සමයක, දරුවන් නව සුසමාදර්ශ වෙත රැගෙන යමින්, ජාතික ආර්ථිකයට ඵලදායී ව දායක විය හැකි,
භාෂා, සන්නිවේදන, සෞන්දර්ය, තාක්ෂණික හැකියාවන්ගෙන් සපිරි දරුවන් රටේ අධ්‍යාපනය තුළින් ගොඩනැංවීම වෙනුවෙන් අධ්‍යාපන පද්ධතිය සකස් කිරීම මෙම පාඨමාලාවේ අරමුණයි.
නව සියවසට හා ඉදිරි අධ්‍යාපන ප්‍රතිසංස්කරණවලට ගැළපෙන, දරුවාගේ දක්ෂතාවන්හි ගුණාත්මකභාවය මැන බලන ඇගයීම් හා තක්සේරුකරණ වැඩපිළිවෙළක අවශ්‍යතාව අදට අතිශයින් ම වැදගත් වන බව ද, වසර ගණනාවක් පුරා දරන ලද පරිශ්‍රමයක ප්‍රතිඵලයක් ලෙස ජාතික අධ්‍යාපන ආයතනයේ විභාග දෙපාර්තමේන්තුව විසින් මෙම පාඨමාලාව සැලසුම් කර, සංවර්ධනය කිරීමට ගත් පියවර වෙනුවෙන් කෘතවේදීත්වය පළ කළ යුතු බව ද මේ සම්බන්ධයෙන් අදහස් දක්වමින් ජාතික අධ්‍යාපන ආයතනයේ අධ්‍යක්ෂ ජනරාල් ආචාර්ය සුනිල් ජයන්ත නවරත්න මහතා සඳහන් කළේය.
