ජාතික අධ්‍යාපන විද්‍යාපීඨවල 2018/2020 වර්ෂවල පාඨමාලා හදාරන ලද ශික්ෂණලාභීන්ට පත්වීම් ලබාදීම සඳහා වන තොරතුරු රැස්කිරීම මාර්ගගත ක්‍රමය ඔස්සේ සිදු කිරීමට නියමිතය.
ඒ අනුව ncoe.moe.gov.lk ඔස්සේ එහි ඇති උපදෙස් පරිදි 2023.04.21 දින සිට 2023.04.25. දින දක්වා එම ශික්ෂණලාභීන්ට මේ සඳහා අයදුම් කළ හැකිය.
සැලකිය යුතුයි.
I. එක් අයදුම්කරුවෙකුට මාර්ගගත පද්ධතියට පිවිසීමට පරිශීලක නාමය (user name) ලෙස ජාතික හැදුනුම්පත් අංකය හා මුරපදයක් (password) භාවිතා කර පරිශීලක ගිණුමක් විවෘත කළ යුතු අතර, ස්ථානගත කිරීම සම්බන්ධ තොරතුරු ලබා දෙන තෙක් පද්ධතියට පිවිසීම සඳහා එම පරිශීලක නාමය හා මුරපදය ඔබ සතුව පැවතීම අත්‍යාවශ්‍ය වේ.
II. එසේම මාර්ගගත පද්ධතියට පිවිස අයදුම්පත සම්පුර්ණයෙන්ම පුරවා එය පද්ධතියට ඇතුළත් කළ පසු (submit) නැවත සංශෝධනය කිරීමට අවස්ථාව ලබා නොදෙන බැවින් උපදෙස් මාළාව හොඳින් කියවා දත්ත ඇතුළත් කිරිම සිදු කළ යුතුය.
III. කෙසේ නමුත් ගිණුමේ පරිශීලක නාමය (user name) හා මුරපදය (password) භාවිතා කර මාර්ගගත පද්ධතිය විවෘතව පවතින කාල සීමාව තුළ ඕනෑම අවස්ථාවක ඔබගේ සම්පූර්ණ කරන ලද අයදුම් පත්‍රය පරීක්ෂා කිරීමට හැකියාව ඇත.
IV. ස්ථානගත කිරීමේදී ඔබ බඳවා ගනු ලැබූ පළාතට ප්‍රමුඛතාව ලබාදෙමින් ජාතික අධ්‍යාපන ආයතනයෙන් සපයා ඇති ප්‍රතිඵල ලේඛනයේ සඳහන් ඔබගේ විෂයයට අදාළ කුසලතා අනුපිළිවෙල සැලකිල්ලට ගනිමින් පමණක් ස්ථානගත කිරීම් සිදු කරනු ලැබේ.
V. අත්‍යාවශ්‍ය පුරප්පාඩු සඳහා ඔබ විසින් මනාපය පළ කර නොතිබුණද, කුසලතා ලේඛණයේ පහළම කුසලතාවයක් ලබා ඇති අයදුම්කරුවන්ගෙන් සේවා අවශ්‍යතාවය සලකා එම අත්‍යාවශ්‍ය පුරප්පාඩු පිරවීමට කටයුතු කරනු ලබන අතරම, ඔබ අයත් පළාත තුළ පවතින අදාළ විෂයන්හි පුරප්පාඩු ප්‍රමාණවත් නොවන්නේ නම්, පුරප්පාඩු පවතින වෙනත් පළාතක් වෙත ඔබව යොමු කිරීමට ද සිදුවේ.
VI. තවද තහවුරු කර ගත් පුරප්පාඩු සඳහා පමණක් ස්ථානගත කිරිම් සිදු කරනු ලබන අතර, විදුහල්පතිවරුන් විසින් ඉදිරිපත් කරනු ලබන ඉල්ලීම් ලිපි කිසිදු අයුරකින් සලකා බලනු නොලැබේ.
VII. ඉහත සඳහන් කරනු ලැබූ ක්‍රමවේදය දැඩිව අනුගමනය කරමින් විශයයන්ට අදාළව ජාතික අධ්‍යාපන ආයතනයෙන් සපයා ඇති කුසලතාවයේ අනුපිළිවෙලින් මාර්ගගතව (online) පදනම්ව පමණක් ස්ථානගත කිරීම් සිදු කරන බැවින්, ඔබ අපේක්ෂා කරන සේවා ස්ථානයටම පත්වීම් ලබා දෙන බවට පොරොන්දු ලබා දෙමින්, මුදල් ලබා ගැනීම සඳහා උත්සාහ කරන වංචනික පුද්ගලයන්ට හසුවීමෙන් වලකින ලෙස විශේෂයෙන් අවධාරණය කරනු ලැබේ.
