සාරධර්මවලින් පිරිපුන් සමාජයක් ගොඩ නැඟීමේ අරමුණින් සෞභාග්‍යයේ දැක්ම ප්‍රතිපත්ති ප්‍රකාශයට අනුව වර්තමාන රජය නව නීති-රීති සම්පාදනය කර තිබෙන නමුත් රටේ දැවෙන ප්‍රශ්න හුදෙක් නීති රීති සංශෝධන මඟින් පමණක් විසඳිය නොහැකි බැව් අධ්‍යාපන අමාත්‍ය මහාචාර්ය ජී.එල්.පීරිස් මහතා පැවසී ය. අමාත්‍යවරයා මේ බැව් පැවසූයේ, ජනාධිපතිතුමාගේ ප්‍රධානත්වයෙන් අරලියගහ මන්දිරයේ දී පැවති “පිරිවෙන් වරුණ” ජාතික වැඩසටහනට අදාලව මූලික පිරිවෙන් අවසාන පරීක්ෂණයෙන් සහ ප්‍රාචීන ප්‍රාරම්භ පරීක්ෂණයෙන් ඉහළ ම ලකුණු ලබාගත් ශිෂ්‍ය භික්ෂූන්වහන්සේ 20නමකට විදේශ ශිෂ්‍යත්ව ප්‍රදානය කිරීම, දහම් පාසල්, පිරිවෙන් හා භික්ෂු අධ්‍යාපන රාජ්‍ය අමාත්‍යංශයේ නිල වෙබ් අඩවිය එළි දැක්වීම සහ අධ්‍යාපනික උපකරණ පිරිනැමීමේ අවස්ථාවට එක් වෙමිනි.
කුඩා ළමුන් මෙහෙකාර සේවයට යොදවා ගැනීම, අමානුෂික වද හිංසා පැමිණවීම, ස්ත්‍රී දූෂණ, ළමා අපචාර වැනි දේ දැන් දිනෙන් දින අනාවරණය කර ගනිමින් තිබේ. ඊට අමතර ව 2021 අංක 4 දරණ ආඥාපනත පාර්ලිමේන්තුවට ඉදිරිපත් කර සම්මතකොට ගෙන තිබේ. නමුත් නීති පද්ධතියේ ප්‍රතිසංස්කරණවලින් පමණක් ලක් රජයේ මේ දැවෙන ප්‍රශ්න කිසිසේත් විස‍ඳීම පහසු වන්නේ නැත. ඒ සඳහා ගෞරවනීය සංඝරත්නයේ සම්පූර්ණ මාර්ගෝපදේශකත්වය සහ කාර්යභාර්යය අතිශයින් ම වැදගත් සාධකයකි. ගෝඨාභය රාජපක්ෂ ජනාධිපතිතුමාගේ රජය ඒ සඳහා අවශ්‍ය සහයෝගය, සම්පත්, අවශ්‍ය වටපිටාව නිර්මාණයකර දීමට සැදී පැහැදී සිටී. මහින්ද රාජපක්ෂ ජනාධිපතිතුමාගේ යුගයේ දී ද මෙවැනි ම වැඩසටහනක් අනුරාධපුර ශාන්ති විශාරයෙන් ආරම්භ කළ අයුරු මෙහිදී සිහිපත් කළ හැකි ය.
මෙම අවස්ථාවට පිරිවෙන් අධ්‍යක්ෂ පූජ්‍ය වටිනාපහ සෝමානන්ද හිමි, පූජ්‍ය බලංගොඩ සෝභිත හිමි, පූජ්‍ය නාරම්පනාවේ ආනන්ද හිමි, ආචාර්ය පූජ්‍ය බෝදාගම චන්දිම හිමි ඇතුළු මහා සංඝරත්නය සහ රාජ්‍ය අමාත්‍යවරුන් වන විජිත බේරුගොඩ, සුසිල් ප්‍රේම්ජයන්ත්, පියල් නිශාන්ත, විදුර වික්‍රමනායක සහ සීතා අරඹේපොල යන මහත්ම මහත්මීහු, රේඛීය අමාත්‍යාංශවල ලේකම්වරු සහ නිලධාරිහු ඇතුළු පිරිසක් එක්ව සිටියහ
