මෙවර පැවැත්වූ  ශිෂ්‍යත්ව විභාගයේ ප්‍රතිඵල මත 2021 වර්ෂයේ 6 වැනි ශ්‍රේණියට ඇතුළත් කරගන්නා සිසුන්ට නව පාසල් ලබාදීමේ වැඩසටහන ප්‍රථමවරට මාර්ගගත ක්‍රමයට සිදුකිරීමට අධ්‍යාපන අමාත්‍යාංශය පියවර ගෙන ඇති අතර එම වැඩපිළිවෙළෙහි නිල සමාරම්භය අද (10) පෙරවරුවේ අධ්‍යාපන අමාත්‍ය මහාචාර්ය ජී එල් පීරිස් මහතාගේ ප්‍රධානත්වයෙන් අධ්‍යාපන අමාත්‍යාංශයේ දී පැවැත්විණි.

මෙවර ශිෂ්‍යත්ව පරීක්ෂණයෙන් දිස්ත්‍රික් කඩඉම් ලකුණු ඉක්මවා සමත් වූ සිසුන්ට නව පාසල් අයදුම් කිරීමට අදාළ අයදුම්පත් මේ වනවිට දෙමව්පියන් වෙතින් කැඳවා ඇති අතර, ඒ අනුව, සිසුන් අයදුම් කර ඇති පාසල්වල නම් ඇතුළු  අදාළ අයදුම්පත්වල සඳහන් අනෙකුත් තොරතුරු දත්ත පද්ධතියට එක් කිරීම විදුහල්පතිවරුන් විසින් සිදුකරනු ලැබේ.

අද සිට දෙසැම්බර් මස 24 වැනි දා දක්වා කාලය ඇතුළත සිංහල හෝ දෙමළ මාධ්‍යයෙන් සියලු විදුහල්පතිවරුන්ට මෙම දත්ත ඇතුළත් කිරීමේ කටයුතු සිදුකිරීමට අවස්ථාව ලබා දී ඇත. මොබිටෙල් ආයතනයේ අනුග්‍රාහක දායකත්වයෙන් රුපියල් මිලියන 7.5 මූල්‍ය පිරිවැයක් දරමින් අධ්‍යාපන අමාත්‍යාංශය වෙත මෙම සේවා පහසුකම නොමිළයේ ලබා දී තිබේ.

අඩු ආදායම්ලාභී සිසු දරුවන්ගේ අධ්‍යාපනයට සහාය වීම සඳහා ශිෂ්‍යාධාර ලබාදීමත්, දිස්ත්‍රික් කඩඉම් ලකුණු ඉක්මවා ඇති සියලු සිසුන්ට පහසුකම් සහිත පාසලකට පිවිසීමට අවස්ථාව ලබාදීමත් අරමුණු කරගෙන 1952 වසරේ සිට 5 ශ්‍රේණි ශිෂ්‍යත්ව විභාගය පවත්වනු ලබයි.  රට තුළ මතු වූ කොවිඩ් අභියෝග හමුවේ වුව ද මෙවර  සාර්ථක ව ශිෂ්‍යත්ව විභාගය පැවැත්වීමට හැකි වූ අතර, විභාගයට පෙනී සිටි සිසුන් 326,264ක් අතරින් සිසුන් 47,193 දෙනෙකු කඩඉම් ලකුණු ඉක්මවමින් නව පාසලක් සඳහා අයදුම්කිරීමේ සුදුසුකම් ලැබූහ.

05 ශ්‍රේණි ශිෂ්‍යත්ව මාර්ගගත වැඩසටහන මේ වන විට දියත් කර අවසන්ව ඇති අතර 05 ශ්‍රේණි ශිෂ්‍යත්ව විභාගයෙන් සුදුසුකම් ලද සිසුන්ගේ අයදුම්පත් සම්පූර්ණ කිරීම සඳහා මේ වන විට විදුහලපතිවරුන්ට අවස්ථාව ලබා දී ඇත.මේ සඳහා ලබා දී ඇති කාල සීමාව 2020.12.24 දිනෙන් අවසන් වන අතර එදින සිට 2020.12.31 දක්වා ඉල්ලුම් කරන ලද පාසල් සංශෝධනය කිරීමට පමණක් අවස්ථාව සැලසෙනු ඇත.

මෙම සබැඳිය මඟින් අයදුම්පත් සම්පූර්ණ කිරීම සඳහා පිවිසිය හැකි ය. https://g6application.moe.gov.lk/#/