හැකි ඉක්මනින්ම සෞඛ්‍ය මාර්ගෝපදේශයන්ට යටත් ව පාසල් විවෘත කිරීමට කටයුතු කළ යුතු බවට වර්තමාන රජය දැඩි ස්ථාවරයක සිටින බැව් අධ්‍යාපන අමාත්‍ය මහාචාර්ය ජී.එල්. පීරිස් මහතා පැවසී ය. අමාත්‍යවරයා මේ බැව් පැවසූයේ 2020/12/20වන දින පන්නිපිටිය ශ්‍රී ධර්මවිජයාලෝක විහාරයේ දී ශ්‍යාමෝපාලි වංශික මහා නිකායේ කෝට්ටේ ශ්‍රී කල්‍යාණි සාමගී‍්‍ර ධර්ම මහා සංඝ සභාවේ මහානායක ධූරප්‍රාප්ත ආචාර්ය අතිපූජ්‍ය ඉත්තෑපාන ධම්මාලංකාර ස්වාමීන්වහන්සේ හමුවීමෙන් අනතුරු ව ය.
පාසල් විවෘත කිරීම සම්බන්ධ ව ස්ථිර ප්‍රකාශයක් ඉක්මනින් ම ලබාදීම සඳහා අපිට හැකි වේවි. ඇතැම්විට හෙට දිනයේ දී. මේ සම්බන්ධව ගරු නායක ස්වාමීන්වහන්සේගේන් ද උපදෙස් ලබා ගැනීම සඳහා මම පැමිණියේ. උන්වහන්සේගේ ද අදහස වුණේ හැකි ඉක්මනින් රටේ දරුවන්ගේ අධ්‍යාපනයේ අයිතිය සුරක්ෂිත කරදීම පිණිස පාසල් ඉක්මනින් ම විවෘත කළ යුතු ය යන්නයි. මේ සම්බන්ධව සෞඛ්‍ය ඇමතිතුමිය, අමාත්‍යංශ ලේකම්තුමා, සෞඛ්‍ය අධ්‍යක්ෂජෙනරාල්වරයා සමඟ අපි මේ වනවිට සාකච්ඡා කරමින් යනවා. ඒ අය විසින් ලබාදෙන නිර්දේශ සහ මාර්ගෝපදේශයන්ට යටත් ව පාසල් විවෘත කිරීම සුදුසු බව නායක ස්වාමීන්වහනසේ ද දැනුම් දුන්නා.
රටේ පාසල් සියල්ල එකවර විවෘත කිරීම සිදුකළ හැකි දෙයක් නොවුණත් එය ක්‍රමක්‍රමයෙන් සිදු කළ යුතු යි. මේ වනවිට රටේ සියල්ල ම පාහේ යථා තත්ත්වයට පත්වෙමින් පවතිනවා. අපේ රටට පමණක් නොවෙයි කොවිඩ් 19 සමස්ත ලෝකයට ම අභියෝගයක් වෙලා තියෙන්නේ. රජයක් විදියට වගේ ම රටක් විදියට ත් අපි මේ අභියෝගය ජය ගත යුතු යි. අපේ දරුවන්ගේ අධ්‍යාපනයේ අයිතිය තහවුරු කළ යුතු යි. පාසල් ක්‍රමක්‍රමයෙන් විවෘත කිරීමත් ඒ ඒ පාසල්වලට, විදුහල්පතිවරුන්ට සහ කමිටුවලට ලබාදෙන සෞඛ්‍ය මාර්ගෝපදේශ සම්බන්ධවත්, ඒ ඒ සෞඛ්‍ය උපදෙස්වලට අනුව කටයුතු කිරීමේ අධිකාරී බලය පාසල්වලට ලබාදෙන ආකාරය සම්බන්ධව ත් අපි සාකච්ඡා කරනවා. යනුවෙන් ද පැවසී ය.
මාධ්‍යෙව්දියකු එම්.සී.සී. ගිවිසුම පිළිබඳ විමසූ අවස්ථාවේ-
“ඔව් අපේ අතිගරු ජනාධිපතිතුමා ජනාධිපතිවරණයට පැමිණෙන අවස්ථාවේ ම කිවුවා එම්.සී.සී.වලින් රට ගලවා ගන්නට සෘජු ප්‍රතිපත්තියක් ක්‍රියාත්මක කරනවා කියලා. එතුමා ඒ අනුව කටයුතු කළා. අපි දන්නවා එම්.සී.සී අත්සන් කරපු සමහර රටවල්වල ජනතාවට කම්කරුවන්ට බවට පත්වෙන්න සිදුවෙලා තිබෙන හැටි. එහෙම ලොකු අවධානමක් තියෙන නිසා ම එතුමා එම්.සී.සීය අත්සන් කිරීමට නොහැකි හේතු ඉතා ම පැහැදිලිව ඉදිරිපත් කළා. මේ සම්බන්ධයෙන් විපක්ෂයෙන් මුලින් කිවුවා මොනව කිවුවත් හොරෙන් හරි ආණ්ඩුව එම්.සී.සීය අත්සන් කරනවා කියලා. දැන් කියනවා ඒක අහෝසි කලත් වෙන ක්‍රමයකට හරි ඒ දේවල්වලට එකඟ වෙයි කියලා. අපි රජයක් විදියට මෙන් ම අතිගරු ජනාධිපතිතුමා රටේ නායකයා විදියට සෘජු තීරණයක සිටින බව පැහැදිලිව පැවසිය හැකියි. යනුවෙන් ද පැවසීය.
