පැතිකඩ

ආචාර්ය නිෂාද් හඳුන්පතිරන මහතා ශ්‍රී ලංකා අධ්‍යාපන පරිපාලන සේවයේ විශේෂ ශ්‍රේණියේ නිලධාරියෙකි. ඔහුට වර්ෂ 2006 දී සහ 2014 දී ඉන්දියානු සම්භාව්‍ය සංගීතය සඳහා වන රාජ්‍ය සම්මාන හිමිවී ඇත. ඔහු මීට පෙර වර්ෂ 2016 සිට අධ්‍යාපන අමාත්‍යංශයේ අධ්‍යාපන අධ්‍යක්ෂ (සෞන්දර්යය) ලෙස සේවය කළේය. ඊට පෙර ඔහු 2011 වර්ෂයේ සිට නියෝජ්‍ය අධ්‍යක්ෂ (සංගීතය), 2005 වර්ෂයේ සිට සහකාර අධ්‍යක්ෂ (සංගීතය), 2003 වර්ෂයේ සිට සහකාර අධ්‍යක්ෂ (විදේශ ආයතන සහ විදේශ කටයුතු) ඇතුළු විවිධ තනතුරු හොබවා ඇත.

ආචාර්ය නිෂාද් හඳුන්පතිරන මහතා 1998 වර්ෂයේ ගිරාගම ගුරු විද්‍යාලයේ සංගීත අංශ ප්‍රධානි ලෙස ද 1992 වර්ෂයේ සිට එහි කථිකාචාර්ය වරයකු හැටියට ද සේවය කළේය. ඔහු 1989 දී රජයේ සංගීත උප ගුරුවරයකු ලෙස තම වෘත්තිය ආරම්භ කළේය.

ඔහුගේ ශාස්ත්‍රීය සුදුසුකම් අතරට පේරාදෙනිය විශ්ව විද්‍යාලයේ වාණිජවේදී (ගෞරව) විශේෂ උපාධිය, පශ්චාත් උපාධි අධ්‍යාපන ඩිප්ලෝමා (එන්.අයි.ඊ.), පේරාදෙනිය විශ්ව විද්‍යාලයේ අධ්‍යාපනපති උපාධිය, බී.එම්.අයි. විශ්ව විද්‍යාල‍යේ (ලක්නව්, ඉන්දියාව) ආචාර්ය උපාධිය ද ඇතුලත් වේ. තව දුරටත් ඔහු ලක්නව්හි සංගීත නිපුන් සහ සංගීත විශාරද සහතික ද විභාග දෙපාර්තමේන්තුවේ ජාතික සංගීත අවසාන සහතික පත්‍රය සහ ගිරාගම ගුරු විද්‍යාලයේ ගුරු පුහුණු සහතිකය ද ලබාගෙන තිබේ.

ඔහුගේ පරිපාලන තනතුරුවලට අමතරව ආචාර්ය හඳුන්පතිරන මහතා පේරාදෙනිය විශ්ව විද්‍යාලය, කැළණිය විශ්ව විද්‍යාලය, සෞන්දර්ය කලා විශ්ව විද්‍යාලය සහ ශ්‍රී ජයවර්ධනපුර විශ්ව විද්‍යාලය යන ආයතනවල සංගීතය පිළිබඳ බාහිර කථිකාචාර්යවරයකු ලෙස දීර්ඝ කාලීන අත්දැකීම් ලබා ඇත. එ‍සේම ඔහු පී එච් ඩී සහ එම් ෆිල් විද්‍යාර්ථීන්ගේ පරීක්ෂකවරයකු ලෙස ද සේවය කර ඇති අතර සංගීත අධ්‍යාපනය පිළිබඳ පර්යේෂණ ලිපි දහයක් පමණ ප්‍රකාශයට පත්කර තිබේ.

ආචාර්ය හඳුන්පතිරන මහතාට 1984 වර්ෂයේ සිට රූපවාහිනී සහ රේඩියෝ නාලිකාවල පෙනී සිටිමින් සංගීතමය ඉදිරිපත් කිරීමේ විශේෂඥතාවක් තිබෙන අතර 1980 වර්ෂයේ සිට වේදිකා සංදර්ශනවලට සහභාගිවී තිබේ. ඔහු 100 වරකට වඩා විවිධ ආයතනවල, වැඩසටහන්වල සහ සංවිධානවල ගායන හා වාදන දෙඅංශයෙන්ම ඉදිරිපත් කිරීම් සිදුකර තිබෙන අතර නාට්‍ය කිහිපයකම චරිත ද රඟපා තිබේ.