අටවන ICF කැරම් තරගාවලියට සහභාගී වන ශ්‍රී ලංකා නියෝජිතයන්ට අධ්‍යාපන, ක්‍රීඩා හා තරුණ කටයුතු අමාත්‍යතුමන්ගෙන් සුබපැතුම්

carඅටවන ICF කැරම් තරගාවලිය දෙසැම්බර් 02 වෙනිදා සිට 06 වෙනිදා දක්වා ඉන්දියාවේ පූනි හිදී පැවැත්වීමට කටයුතු යොදා තිබේ. මෙම තරගාවලියට ශ්‍රී ලංකාව නියෝජනය කරමින් සහභාගී වන තරගකරුවන් පසුගිය දා (29) අධ්‍යාපන, ක්‍රීඩා හා තරුණ කටයුතු අමාත්‍ය ඩලස් අලහප්පෙරුම මහතා හමුවූ අතර එහි දී අමාත්‍යවරයා එම නියෝජිත පිරිසට සිය සුබපැතුම් පළ කළේය.

මෙවර තරගාවලිය සදහා රටවල් 18 ක් සහභාගී වන අතර, තරගකරුවන් කේවල, කණ්ඩායම්, යුගල, ස්විස්ලීග් ලෙස ඉසව් 4 ක් යටතේ තරග වැදීමට නියමිතයි.

තරගාවලිය නියෝජනය කරන පිරිමි කණ්ඩායම් අංශය මේ වනවිට ලෝක ශූරතාව දිනාගෙන ලොව අංක එකේ කණ්ඩායම ලෙස මෙම තරගාවලියට සහභාගී වන අතර, කාන්තා කණ්ඩායම ලෝක කැරම් ශූරතාවලියේ අනු ශූරතාව දිනාගෙන ඇත. මෙම තරගාවලියේදී වඩාත් හොඳ දක්ෂතා අතරට පැමිණ ලෝක ශ්‍රේණිගත කිරීම්වල ඉහළම ස්ථානයේ රැඳී සිටීම මෙවර මෙම කණ්ඩායම් දෙකේම අපේක්ෂාවයි.

මේ වසරේ පිරිමි කණ්ඩායමේ නායකත්වය ශ්‍රී ලංකා නාවික හමුදාවේ නිශාන්ත ප්‍රනාන්දු ක්‍රීඩකයා දරන අතර, කාන්තා කණ්ඩායමේ නායකත්වය දරන්නේ ශ්‍රී ලංකා නාවික හමුදාවේ ජෝෂප් රොෂිටා ක්‍රීඩිකාවයි.

තරගාවලිය සදහා කළමනාකරුවන් ලෙස සුසන්ත ප්‍රනාන්දු හා කරු ජයසිංහ යන මහත්වරුන් ද මෙම සංචාරයට එක්වීමට නියමිත ය.