13 වසරක අධ්‍යාපනය වැඩසටහන

නිදහස් අධ්‍යාපනයට නව ප්‍රවේශයක් සමඟ රටේ දරුවන්ට පිරුණු හැකියාවක් - දිනන රැකියාවක්

මාලුවෙකු විනිශ්චය කරන විට ඌට ගස් නඟින්නට හැකිද කියා සොයා බැලීම කෙ‍තරම් ප්‍රායෝගික වේ ද? . ගස් නඟින්නට නොහැකි නිසා මාලුවා අදක්ෂ යැයි තීරණයක් ලබාදුන්නොත්.. ඔව් එවිට මාලුවාට සිදුවන්නේ ජීවිත කාලය පුරාවට ම සිදුවන්නේ තමා අදක්ෂයකු ලෙස සිතා ජීවත් වන්නටයි. ඇගයීම් ලබාදීමේ දී නිවැරදිව ම හඳුනාගත යුතු කරුණ නම්, දක්ෂතා දක්වන ක්ෂේත්‍රය කුමක් ද යන්නයි. ලොව ම හඳුනන භෞතික විද්‍යාඥයෙකු වූ ඇල්බර්ට් අයින්ස්ටයින් දක්වන මේ අදහස ගැන ඔබට සිතෙන්නේ මොනවාද?

දක්ෂයින් හඳුනාගැනීම

වයස අවුරුදු තුන වන තුරුම අයින්ස්ටයින් හරිහැටි කතා නොකළේය. කිසිවක් කියන්නට වුවමනා වුවිට ඔහු එය මිමිනුවේය. ඒ මිමිනීම පවා සිදුවුනේ කෙනෙකුගේ කනට නෑසෙන තරමටය.. කතා බහක් නැතිව පැත්තකට වී සිටින කුඩා අයින්ස්ටයින් දිනක් මව්පියන් සමඟ රාත්‍රී කෑම මේසයට වාඩි වුයේය. “මේ සුප් එක උණුයි” යැයි කියා ඔහු එක්වරම මවුපියන්ට පවසා තිබේ. පුතාගේ කතාවෙන් මවිතයට පත් අම්මාත් තාත්තාත් පුතාගෙන් අසා ඇත්තේ මෙයට පෙර මේ වගේ කතා නොකළේ මන්දැයි කියාය. “ඒකට හේතුව මේ වෙනකන් හැමදෙයක්ම පිළිවෙළට සිද්ධ වීම.” යැයි ඔහු පිළිවදන් සපයා ඇත. පාසලේ දී පවා අයින්ස්ටයින් අඩුවෙන් කතා බහෙහි යෙදුණු අතර, මේ නිසා ප්‍රාථමික අධ්‍යාපනයේ දී පමණක් නොව ද්විතියික අධ්‍යාපනයේදීත් ඔහු ගුරුවරුන් අතර ජනප්‍රිය දරුවෙකු වුයේ නැත. ගුරුවරුන් සිතුවේ අයින්ස්ටයින් යනු පිළිවෙළක් නැතිව හැදුණු, කම්මැලි දරුවෙකැයි කියාය. එහෙත් පසුකාලීන ව තත්වය සහමුලින් වෙනස් විය. ඇල්බර්ට් අයින්ස්ටයින් යන නම සඳහන් නොකර සාපේක්ෂතා වාදය, ප්‍රකාශ විද්‍යුත් ආචරණය, ස්කන්ධ ශක්ති තුල්‍යතාව වැනි කාරණා ගැන කතා කරන්නට පුළුවන් කමක් නැති තරමට ම තත්වය යහපත් අතට වෙනස් විය. නුතන භෞතික විද්‍යාවේ කොතැනක ස්පර්ශ කළත් අයින්ස්ටයින් ගැන සදහන් නොවන ඉසව්වක් ඇත්තේම නැති තරමට ම තත්වය අතිශයින් ම සුබවාදී විය.

මිනුම් දඞුවල වරදින් දක්ෂයින්ට පසුගාමීවන්නට ඉඩ දිය යුතු නැත. අධ්‍යාපනය සකස්විය යුත්තේ දක්ෂයින් අතිදක්ෂයින් බවට පත්කිරීමට හැකි අයුරින් මිස විභාග ඇගයීම් හරහා අදක්ෂ යැයි සම්මත කරගන්නා පිරිස් අධ්‍යාපනයෙන් ගලවා දැමීම හරහා නොවේ. අයින්ස්ටයින්වරුන් මතුකරගැනීමට නම් වැඩි ම අවධානය යොමු කළ යුත්තේ මිණුම්දඩු මතින් ඇදහැලෙන එවන් දරුවන් වෙනුවෙනි.

සාමාන්‍ය පෙළින් පසු පාසල් ගමන නතර කරදමන සිසුදරුවන්ගේ අනාගතය සම්බන්ධව පැහැදිලි විනිශ්චයක් ලබාදෙමින්, විභාග සමත් අසමත්භාවය නොසලකා වෘත්තීය විෂය ධාරාව යටතේ උසස් පෙළ හැදෑරීමට අවස්ථාව සමඟ වසර 13ක සහතික කළ අධ්‍යාපනයක් රටේ සියලු දරුවන්ට අත්පත් කරදීමට අධ්‍යාපන අමාත්‍ය අකිල විරාජ් කාරියවසම් මහතාගේ මූලිකත්වයෙන් සියලු කටයුතු ක්‍රියාවට නැංවෙන්නේ අයින්ස්ටයින්ලා මෙන් ම සැඟවුණු නිපුනතා සපිරි දරුවන්ගේ අනාගතයට ආලෝකයක් එක් කරදෙන්නටයි.

කෙටි මතකයක සීමාව

විභාග කේන්ද්‍රීය අධ්‍යාපනය දරුවන්ගේ කෙටි මතකය මතින් ජීවිතය ගැන තීන්දු ලබාදෙයි. දරුවන්ගේ වසර කිහිපයක පාසල් කාලය තුළ ලබාගත් විෂය දැනුම සම්බන්ධ මතකය පැය කිහිපයක් තුළ සිදුකෙරෙන පැන විමසුමක් හරහා මැන බැලෙයි. සමත් අසමත්භාවය මත ඉදිරි අනාගතය තුළ කෙනෙක් වෛද්‍යවරයෙක් වෙයි. තවත් කෙනෙක් ඉංජිනේරුවෙක් වෙයි. තවත් කෙනෙක් විභාග සහතිකවල වරදින් රැකියා විරහිතව හෝ අවිනිශ්චිත රැකියාවල යෙදෙමින් හෝ තමාට අත් වූ අපහසුතාවන් සම්බන්ධ ව සමාජයට වෛර කරමින් හෝ පසුවෙති. රට තුළ සිදුවන අපරාධ, වංචා, දූෂණ, මිනීමැරුම්, මංකොල්ලකෑම්, කැරලි, උද්ඝෝෂණ, ගැටුම්, විප්ලවවලට නායකත්වය සපයන්නට ඔවුහු පෙරමුණ ගනිති. කාලාන්තරයක් තිස්සේ පීඩිත පන්තියට එක්ව පීඩකයින්ට සාප කරති. අධ්‍යාපනය අවශ්‍ය වන්නේ මේ අරගලය නිමකරන්නට මිස මේ අරගලයට දිය පොහොර සපයන්නට නොවේ. පීඩා විඳින්නන්ගේ පාර්ශවයේ සාමාජිකයන් සංඛ්‍යාව බිංදුවට ම අඩු කරන්නට ය. වත්මන් අධ්‍යාපන අමාත්‍යවරයාගේ නායකත්වය යටතේ බොහෝ ප්‍රතිපත්තිමය තීන්දු තීරණ ක්‍රියාවට නැංවෙන්නේ ඒ වෙනස පද්ධතියට එක්කරන්නට ය. ලෝකයේ සංවර්ධිත රටවල වෙසෙන මිනිසුන් ඔවුන්ගේ ශ්‍රමයට ලබාදෙන වටිනාකම, තක්සේරුව සහ ගරුත්වය අපේ රටේ මිනිසුන්ට ද ලබාදෙන්නට ය. ගොවියාගේ පුතා තාත්තා හා සමාන ගොවියෙකු ම වීමේ සම්ප්‍රදාය හෝ සීමාව අද වනවිට බිඳ වැටී හමාරය. ගොවියාගේ පුතාට තාත්තා ට වඩා අඩුවෙන් වෙහෙස වී වැඩි පලදාවකට යා හැකි තරමට කෘෂි තාක්ෂණය දියුණු වී ඇත. ගවයින් යොදා ගැනීම වෙනුවට යන්ත්‍රානුසාරයෙන් මහා පරිමාණයෙන් ගොවිකම කරන්නට ඔහුට හැකියාව සහ ශක්තිය ඇත. ඇතැම්විට තාත්තා නොසිතූ ක්ෂේත්‍රයක දක්ෂතා මතින් පුතාට තමන්ගේ අනාගතය පාදා ගැනීමට ද හැකියාව ඇත. විද්‍යා, තාක්ෂණ, සන්නිවේදන, ප්‍රවාහන, ආදී සියලු ක්ෂේත්‍රයන්හි නව ප්‍රවණතා සමඟ අනාගත ලෝකයට එක්වන්නට පුළුල් ඉඩ ප්‍රස්තා විවර ව ඇත.

ඇදහැලෙන්නන්ගේ ඉරණම

පළමු ශ්‍රේණියේ සිට සරසවිය දක්වා ම නිදහස් අධ්‍යාපන අවස්ථා ලබා දෙන රටක් ලෙස ශ්‍රී ලංකාවට අභිමානවත් පිළිගැනීමක් පවතියි. නොමිළේ පෙළපොත්, නොමිළේ නිල ඇඳුම්, හඳුනාගත් පාසල් දරුවන් වෙනුවෙන් නොමිලේ දිවා ආහාර ඇතුළු සුබසාධන පහසුකම් ද සහිතව නිදහස් අධ්‍යාපන අවස්ථා රටේ සියලු දරුවන්ට ලබා දී තිබෙයි. වසරකට ශ්‍රී ලංකාවේ පාසල් පද්ධතියට පළමු ශ්‍රේණියට අලුතින් එක්වන සිසුන් සංඛ්‍යාව ලක්ෂ තුනකට අධික ය. මෙසේ එක්වන දරුවන්ගෙන් සෑම වසරක ම සාමාන්‍ය පෙළ විභාගය ප්‍රමාණවත් මට්ටමට සමත් නොවීම හේතුවෙන් උසස් පෙළ වරම් අහිමි ව පාසලින් ඇදහැලෙන සිසුන් සංඛ්‍යාව දළවශයෙන් 80,000 කට අධික ය. උසස් පෙළ හදාරන සිසුන්ගෙන් සරසවි ප්‍රවේශය ලබන්නේ සියයට දහයකටත් වඩා අඩු ප්‍රතිශතයකි. උසස්පෙළ‍ අවසන් කොට පාසල හැරයන සිසුන් අතරින් ද ප්‍රමාණවත් විභාග ප්‍රතිඵල ලබාගැනීමට අසමත් වූ බොහෝ සිසුන්ට සිදුවන්නේ සාමාන්‍ය පෙළටත් පෙර පාසල් ගමන අත්හිට වූ දරුවන් අතරට ම එක් වී ඉතා සුළු වැටුපකට කවර හෝ ආයතනයක හෝ පුද්ගලයෙකු යටතේ දැඩිව කය වෙහෙසා සිදුකළ හැකි කුමක් හෝ රාජකාරියක නිරත වීමයි. අඩු වැටුප නිසා වන මානසික පීඩනය, අධික අවිවේකය නිසා සහ අඩු පුහුණුව නිසා අත්විදින්නට සිදුවන ශාරීරික හා මානසික අපහසුතා ආදී සියල්ලට එතැන්සිට ඔවුන් මුහුණ දිය යුතුය.

මඟපෙන්වීම්, වැඩිදුර පුහුණුකිරීම් වෙනුවට ‍අතපසුවීම්, මඟහැරීම්, වැරදීම්, පැහැරහැරීම්, සේවා අතෘප්තිය මත ඇතිවන වැඩ කල්දැමීම්, සහිත ව අධ්‍යාපනය ගැන බංකොලොත් හැඟිමෙන් කටයුතු කරන සුළු සේවක පිරිස අතරට එක් ව ඔවුන්ගේ ම පන්තියේ මිනිසුන් රස්තියාදු කරන්න‍ට, අපහසුතාවන්ට පත්කරන්නට, බැනවදින්නට ඔවුන් එතැන්පටන් හුරුවෙයි. සටන්පාඨ කියමින් අයිතිවාසිකම් දිනාගන්නට විප්ලව කරන ඔවුහු දේශපාලන අත් යටින් රිංගන්නට ඇති හැකියාවන් සොයා බලමින් සමාජ සාධාරණය යුක්තිය සහ අයිතිවාසිකම් ගැන නිරන්තරයෙන් දැවෙමින් තැවෙමින් ජීවිතය ගෙවා දමති. බොහෝ දෙනෙක් ජීවිතය ගෙවී යන තුරු බලා සිටිති.

විප්ලවීය වෙනස

අධ්‍යාපනයේ විප්ලවීය වෙනසක් වෙනුවෙන් වඩාත් ප්‍රායෝගික ව ක්‍රියාත්මක විය යුත්තේ මේ අගාධයට යන මිනිස් පරපුරේ අලුත් පුරුක් ගලවා ගැනීම වෙනුවෙනි. අධ්‍යාපන අමාත්‍යවරයාගේ පූර්ණ මැදිහත්වීමෙන්‍‍‍ 13 වසරක සහතික කළ අධ්‍යාපනයක් රටේ සියලු දරුවන් වෙත ලබාදීමට පියවර ගැනෙන්නේ ඒ සද්අපේක්ෂාව ඉටු කරගැනීම වෙනුවෙනි. සාමාන්‍ය පෙළ සමත් අසමත්භාවය පදනම් කරනොගෙන ඕනෑම සිසුදරුවෙකුට සාමාන්‍යපෙළින් පසු උසස් පෙළ හැදෑරීමේ ඉඩප්‍රස්ථා වෙත විවර වූයේ 2017 වසරේ සිට නියාමන ව්‍යාපෘතියක් ලෙස දිවයිනේ පාසල් 42ක් කේන්ද්‍ර කරගනිමින් 13 වසරක සහතික කළ අධ්‍යාපන වැඩසටහන ආරම්භ කිරීමත් සමඟිනි. දෙවැනි අදියරේ දී මෙම පාසල් සංඛ්‍යාව 153 ක් දක්වා ව්‍යාප්ත කර ඇති අතර මේ වනවිට සිසුන් 19000 කට අධික පිරිසක් උසස් පෙළ වෘත්තීය විෂය ධාරාව හැදෑරීමට අවස්ථාව සලසා දී ඇත.

සියලු සිසුන්ට සුහුරු පන්ති කාමර

‍සිසුන‍්ට තම අධ්‍යයන කටයුතු පහසුවෙන් ඉටු කරගැනීම වෙනුවෙන් සුහුරු පන්තිකාමර (Smart Class Rooms) ලබාදීමට ද මේ යටතේ පියවර ගෙන ඇත. ඒ අනුව පළමු අදියර යටතේ පන්ති කාමර 133 ක් දෙවැනි අදියර යටතේ සුහුරු පන්ති කාමර 424ක් තෙවැනි අදියරේ දී 1331ක් සහ 2019 වසර වනවිට සුහුරු පන්ති කාමර 1888ක් සකස්කිරීමට මේ වනවිටත් කටයුතු සූදානම් කර ඇත.

උනන්දුව පිළිබඳ ගැටළුව

ඇතැම්පිරිස් විසින් මෙහි දී මතුකළ කරුණ වූයේ, සාමාන්‍ය පෙළ විභාගය කෙරෙහි සිසුන් තුළ පැවති උද්යෝගය මේ හරහා තුරන් විය හැකි බවයි. එහෙත් මේ තුළින් සිදුවූයේ සාමාන්‍ය පෙළ හදාරන දරුවන්ට තම අනාගතය පිළිබඳ එතෙක් පැවති අවිනිශ්චිත හැඟීම තුරන්වීමයි. සාමාන්‍ය පෙළ විභාගයේ සමත් අසමත්භාවය නොතකා උසස් පෙළ හැදෑරීමේ ඉඩ ප්‍රස්ථා පැවතීම තුළ ඔවුන් තුළ තමන් වැඩියෙන් කැමති විෂය ක්ෂේත්‍රයක් හැදෑරීමටත් එහි ප්‍රවීණත්වය අත්පත්කරගැනීමටත් වන අපේක්ෂාව වැඩිදියුණු විය.

2018 වසරේ පළමු ශ්‍රේණියට ඇතුළත් වන දරුවා 13 වසරක අධ්‍යාපනය නිම කොට පාසලින් නිකුත් වන්නේ 2031 වසරේ දී ය. ඒ දරුවා මුහුණ දෙන රැකියා අභියෝග ගැන අද අපට දළ වශයෙන් හෝ අවබෝධයක් තිබිය යුතුය. මොහොතින් මොහොත ලෝකය තාක්ෂණය විද්‍යාව සහ සන්නිවේදන ප්‍රවණතා සමඟ වෙනස් වන ලෝකයේ අනාගත රැකියාවන් අද අප කරන රැකියාවන්ට වඩා සහමුලින් ම වෙනස් වන බව අප හඳුනාගත යුතුය. යල්පැනගිය විෂය දැනුම කරපින්නාගෙන දරුවන්ටත් අප හැදෑරූ ශිල්ප ශාස්ත්‍ර ම හුරුකරවීම කිසිසේත් කාලෝචිත නොවේ. අධ්‍යාපන අමාත්‍යවරයාගේ දූරදර්ශී තීන්දු තීරණ ඉලක්ක වන්නේ අදට නොව අනාගතයේ රැකියා වෙළඳපළට එක්වන ඒ දරු පරපුරටයි.

වෘත්තීය විෂය ධාරාව හැදෑරීමට පිවිසෙන දරුවන්ගේ දෑවුරුදු උසස් පෙළ පාසල් සමය සකස් වන්නේ මෙපරිද්දෙනි. පළමු මාස 6 තුළ ඔවුන් අත්‍යවශ්‍ය ඉගෙනුම් නිපුනතා සාක්ෂාත් කරගැනීමට අවස්ථාව සැලසෙයි. මේ යටතේ පොදු විෂයයන් 10 ක් හැදෑරීමට සිසුන්ට ඉඩප්‍රස්ථා සැලසෙයි.

· පළමු බස (සිංහල/දෙමළ)

· ව්‍යවහාරික ඉංග්‍රීසි සහ සන්නිවේදන කුසලතා

· තොරතුරු සහ සන්නිවේදන තාක්ෂණ කුසලතා

· සෞන්දර්ය රසාස්වාදය

· පුරවැසිභාවයට අදාළ කුසලතා

· සමාජ යහපැවැත්ම සඳහා අවශ්‍ය සෞඛ්‍ය හා ජීවන කුසලතා

· ව්‍යවසායකත්ව කුසලතා

· ක්‍රීඩා හා අනෙකුත් විෂය සමගාමී ක්‍රියාකාරකම්

· වෘත්තීය මාර්ගෝපදේශන වැඩසටහන්

යන විෂයයන් සම්බන්ධ මූලික නිපුනතා වර්ධනය කරගැනීමට මේ යටතේ සිසුන්ට මඟපෙන්වීම් සිදුකරනු ලබයි. ඉතිරි මාස 18 ක කාලය තුළ සිසුන් විසින් උසස් පෙළ වෘත්තීය විෂය ධාරාව යටතේ හඳුන්වා දී ඇති වෘත්තීය විෂයයන් 26 අතරින් තෝරාගන්නා එක් විෂයයක් හැදෑරීමට අවස්ථාව සැලසෙයි.

වෘත්තීය විෂයයන්

1 ආහාර නිෂ්පාදන තාක්ෂණ අධ්‍යයනය

2 ළමා මනෝවිද්‍යාව හා ආරක්ෂණය

3 සෞඛ්‍ය හා සමාජ ආරක්ෂණය

4 ප්‍රාසාංගික කලාව

5 කාර්ය සිද්ධි කළමනාකරණය

6 ජලජ සම්පත් තාක්ෂණ අධ්‍යයනය

7 ශිල්ප කලා

8 අභ්‍යන්තර නිර්මාණකරණය

9 විලාසිතා නිර්මාණකරණය

10 ග්‍රැෆික් නිර්මාණකරණය

11 කලාව හා පිරිසැලසුම්කරණය

12 පශු සම්පත් නිෂ්පාදන තාක්ෂණ අධ්‍යයනය

13 ශාරීරික අධ්‍යාපනය හා ක්‍රීඩා

14 භූ දර්ශන නිර්මාණකරණය

15 පාරිසරික අධ්‍යයනය

16 ඉදිකිරීම තාක්ෂණ අධ්‍යයනය

17 ව්‍යවහාරික උද්‍යාන විද්‍යා තාක්ෂණ අධ්‍යයනය

18 සංචරණය හා ආගන්තුක සත්කාර

19 ව්‍යවහාරික උද්‍යාන විද්‍යා තාක්ෂණ අධ්‍යයනය

20 වෙබ් නිර්මාණකරණය

21 මෘදුකාංග සංවර්ධනය

22 ඇලුමිනියම් පිරිසැකසුම් තාක්ෂණ අධ්‍යයනය

23 ලෝහ සැකසුම් තාක්ෂණ අධ්‍යයනය

24 පේෂකර්ම හා ඇඟලුම් තාක්ෂණ අධ්‍යයනය

25 විදුලිය හා ඉලෙක්ට්‍රොණික තාක්ෂණ අධ්‍යයනය

26 මෝටර් යාන්ත්‍රික තාක්ෂණ අධ්‍යයනය

නවක ගුරුවරුන් 1150ක් අධ්‍යාපන පද්ධතියට

මෙම විෂයයන් ඉගැන්වීමට අධ්‍යාපන පද්ධතියේ මෙතෙක් පැවති අඩුපාඩු සියල්ල මඟහරිමින් විෂය දැනුම සහිත නවක ගුරුවරුන් 1150 ක් පද්ධතියට අලුතින් බඳවාගැනීමට ද කටයුතු කර ඇත. සම්පූර්ණයෙන් ම ශිෂ්‍ය කේන්ද්‍රීය අධ්‍යාපන ක්‍රමවේද මත ඉගැන්වීම් කටයුතු මෙහෙයවන්නට මෙහි දී ගුරුවරුන් පුහුණු කෙරෙයි. ගුරු පුහුණු කටයුතු සියල්ල ජාතික අධ්‍යාපන ආයතනය මඟින් දිවයින පුරා පිහිටි ජාතික අධ්‍යාපන විද්‍යාපීඨ සම්බන්ධ කරගනිමින් සිදුකරනු ලබයි. මේ සඳහා මොඩියුල සකස් කිරීම ද ජාතික අධ්‍යාපන ආයතනය විසින් මේ වනවිටත් සිදුකර අවසන්ව ඇති අතර, බඳවාගන්නා සියලු ගුරුවරුන්ට එළඹෙන අගෝස්තු මස 06 වැනි දා සිට ඇරඹෙන කෙටිකාලීන නේවාසික පුහුණුවකින් අනතුරුව පාසල් වෙත මුදාහැරීමට පියවර ගැනේ.

NVQ Level 4 සහිත උසස් වෘත්තීය ප්‍රවේශයකට ඉඩ ප්‍රස්ථා

උසස් පෙළ වෘත්තීය විෂය ධාරාව හදාරන සිසුන්ට තම දෑවුරුදු අධ්‍යයන කාලසීමාව අවසානයේ NVQ Level 4 සහිත උසස් වෘත්තීය ප්‍රවේශයකට ඉඩ ප්‍රස්ථා සැලසෙයි. ශ්‍රී ලාංකීය ශ්‍රම බළකායට වෘත්තීය නිපුනතා සපිරි, ආත්මඅභිමානය, ස්වීයත්වය, පෞරුෂ සංවර්ධනය තුළින් සාර්ථකත්වය අත්පත්කරගත හැකි පුරවැසියන් ගොඩනඟන්නට මෙම වැඩසටහන හරහා සැබෑ දායකත්වයක් සැලසෙනු ඇත.

රාජ්‍ය, අර්ධ රාජ්‍ය සහ පෞද්ගලික අංශයේ ශක්තිය, දායකත්වය මත මෙම වැඩසටහන හරහා 2019 වසර වනවිට රටේ සියලු පාසල් දරුවන් උසස් පෙළ හදාරන දරුවන් බවට පත්කරන්නට, වසර 13 ක සහතික කළ අධ්‍යාපනයක් සමඟ අනාගත වැඩලෝකයට ගැ‍ළපෙන නිපුනතා සපිරි දරුවන් යොමුකරන්නට අධ්‍යාපන අමාත්‍ය අකිල විරාජ් කාරියවසම් මැතිතුමන්ගේ මඟපෙන්වීම, උපදෙස් හා ආශිර්වාදය මත ක්‍රියාවට නැංවෙන මෙම වැඩසටහන සමත්වනු ඇති බව අපගේ විශ්වාසයයි.

13 වසරක සහතික කරන ලද අධ්‍යාපන වැඩසටහනට ඇතුළත් පාසල් පිළිබඳ විස්තර සඳහා ඇමතිය යුතු පළාත් සම්බන්ධීකරණ නිලධාරීන්

දකුණු පළාත - සුමිත් පරාක්‍රමවංශ මයා - 0713432236 /0912222087

උතුරු පළාත - ලෙනින් අරිවලහන් මයා - 0777252022

ඌව පළාත - ඩී එම් පී කේ දිසානායක මයා - 0777614333

මධ්‍යම පළාත - ඒ අබේවික්‍රම මයා - 0719783574

උතුරුමැද පළාත - ඊ එම් බී එස් ඒකනායක මිය - 0718077583

සබරගමුව පළාත - සී ආර් මාතර ආරච්චි මිය - 0452222403

වයඹ පළාත - ජේ එච් එම් යසවිමල මයා - 0718172118

බස්නාහිර පළාත - ප්‍රභාත් විතානගේ මයා - 0718617295

නැගෙනහිර පළාත සුගන්ධිනී වරසීලන් මිය - 0773 299594

13 වසරක සහතික කළ අධ්‍යාපන වැඩසටහන පිළිබඳ වැඩිදුර විස්තර, අධ්‍යාපන අධ්‍යක්ෂ (සැමට අධ්‍යාපන ශාඛාව) , දුරකථන අංක 0112787136 මඟින් දැනගත හැකියි.